سىبايلاس جەمقورلىققا قارسى كۇرەس اگەنتتىگىنىڭ الماتى قالاسى بويىنشا دەپارتامەنتى جانە ۇلتتىق قاۋىپسىزدىك كوميتەتىنىڭ الماتى قالاسى بويىنشا دەپارتامەنتى ۇلتتىق ۇلاننىڭ «بۇركىت» ارنايى ماقساتتاعى بولىمشەسىن تارتا وتىرىپ, ناۋرىز ايىنان باستاپ ەلدەگى توتەنشە جاعداي مەن الماتى قالاسىنداعى كارانتين رەجىمى ۋاقىتىندا جۇمىس ىستەگەن زاڭسىز ويىن مەكەمەسى ارەكەتىنىڭ جولىن كەسۋ بويىنشا اۋقىمدى وپەراتسيانى وتكىزدى.
اتالعان جەدەل ىزدەستىرۋ ءىس-شاراسى 2020 جىلدىڭ 24-25 ساۋىرىنە قاراعان ءتۇنى وتكىزىلدى, ناتيجەسىندە ۆەدومستۆو قىزمەتكەرلەرى قالا ورتالىعىندا ورنالاسقان اكىمشىلىك عيماراتتا كەلۋشىلەر مەن ونىڭ قىزمەتكەرلەرى اراسىنان قۇمار ويىندارعا قاتىسقان 30-دان استام تۇلعانى ۇستادى.
قۇمار ويىندارى وتەتىن ورىنعا كىرۋ ءۇشىن ارنايى وتكىزۋ جۇيەسى ارەكەت ەتكەن, ول بويىنشا ىشكە تەك تۇراقتى كەلۋشىلەر عانا كىرە الاتىن بولعان.
اۋماعى 1000 شارشى مەتردەن اساتىن كازينونىڭ ىشىندە ءتىنتۋ ءىس-شارالارىن جۇرگىزۋ بارىسىندا پوكەر مەن امەريكالىق رۋلەتكالارعا ارنالعان 6 ۇستەل, كوپتەگەن ويىن كارتالارى مەن فيشكالار, سونداي-اق زاڭسىز ارەكەتتەن تۇسكەن ءبىر كۇندىك ءىرى مولشەردەگى اقشالاي قاراجات الىندى.
زاڭسىز ويىن مەكەمەسىن ۇيىمداستىرۋ فاكتىسى بويىنشا قر قك 307-بابىنىڭ 2-بولىگى بويىنشا قىلمىستىق ءىس قوزعالدى.
«جاسىرىن كازينوعا» قاتىسقان ادامداردىڭ بارلىعىنا قاتىستى توتەنشە جاعداي رەجيمىن بۇزۋ فاكتىسى بويىنشا اكىمشىلىك حاتتامالار تولتىرىلدى.