سەناتتا ۆلاديمير ۆولكوۆتىڭ توراعالىق ەتۋىمەن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى بولدى. وندا «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوبالارى قارالدى, دەپ حابارلادى سەناتتىڭ ءباسپاسوز قىزمەتى.
«قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىندا پيكەتتەۋ, جينالىس, ميتينگ, دەمونستراتسيا, شەرۋ سياقتى كوپشىلىك پىكىرىن ءبىلدىرۋدى قامتيتىن بەيبىت جينالىستار تۇرلەرى كورىنىس تاپقان جانە ولاردىڭ نەگىزگى پرينتسيپتەرى قاراستىرىلادى, بەيبىت جينالىستار وتكىزۋگە بولاتىن ارنايى ورىنداردى ۇيىمداستىرۋدى قامتاماسىز ەتۋگە قويىلاتىن تالاپتار ايقىندالدى.
زاڭ جوباسىندا سونداي-اق مەملەكەتتىڭ قورعانىس قابىلەتىن, قاۋىپسىزدىگىن جانە حالىقتىڭ تىنىس-تىرشىلىگىن قامتاماسىز ەتەتىن ۇيىمداردى, ونىڭ ىشىندە ستراتەگيالىق جانە اسكەري وبەكتىلەردى, سونداي-اق قازاقستان رەسپۋبليكاسى پرەزيدەنتىنىڭ, قازاقستان رەسپۋبليكاسى تۇڭعىش پرەزيدەنتى – ەلباسىنىڭ رەزيدەنتسيالارىنا ىرگەلەس اۋماقتاردى قوسپاعاندا, كەز كەلگەن جەرلەردە, ونىڭ ىشىندە ورتالىق مەملەكەتتىك ورگانداردىڭ, جەرگىلىكتى اتقارۋشى ورگانداردىڭ عيماراتتارى ماڭىندا جەكە پيكەتتەر وتكىزۋ مۇمكىندىگى ەنگىزىلگەن.
زاڭ جوباسىندا بەيبىت جينالىستاردى ۇيىمداستىرۋشىلاردىڭ, قاتىسۋشىلاردىڭ مارتەبەسى, قۇقىقتارى مەن مىندەتتەرى بەكىتىلەدى, مەملەكەتتىك ورگانداردىڭ بەيبىت جينالىستار ۇيىمداستىرۋشىلارىنا كومەك كورسەتۋ جونىندەگى مىندەتتەرى كوزدەلەدى, جەرگىلىكتى اتقارۋشى ورگاندارعا بەيبىت جينالىستار وتكىزۋدەن باس تارتۋ ءۇشىن نەگىزدەردىڭ تولىق تىزبەسى بەلگىلەنەدى. ودان باسقا, بەيبىت جينالىستار وتكىزۋ كەزىندە ۇگىت ينستيتۋتى ەنگىزىلەدى, ونى ۇيىمداستىرۋشىلار بۇقارالىق اقپارات قۇرالدارى, الەۋمەتتىك جەلىلەر, مەسەندجەرلەر ارقىلى وتكىزە الادى.
زاڭ جوباسىن قابىلداۋ بەيبىت جينالىستاردى وتكىزۋ سالاسىنداعى قوعامدىق قاتىناستاردى ءتيىمدى رەتتەۋگە, ازاماتتاردىڭ بەيبىت جانە قارۋسىز جينالۋعا كونستيتۋتسيالىق قۇقىعىن ىسكە اسىرۋدىڭ قۇقىقتىق نەگىزدەرىن قامتاماسىز ەتۋگە, جينالىستار, ميتينگىلەر مەن دەمونستراتسيالار, شەرۋلەر مەن پيكەتتەر وتكىزۋگە, سونداي-اق ازاماتتىق قوعام ينستيتۋتتارىن جانە جەكە تۇلعا مەن مەملەكەت اراسىنداعى ءوزارا قارىم-قاتىناس تەتىكتەرىنىڭ تيىمدىلىگىن دامىتۋعا مۇمكىندىك بەرەدى.
كوميتەتتىڭ كەڭەيتىلگەن وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن دا قارادى.
بۇل زاڭ جوباسىندا «بەيبىت جينالىس» ۇعىمىنىڭ ەنگىزىلۋىنە بايلانىستى 3 كودەكس پەن 8 زاڭعا وزگەرىستەر مەن تولىقتىرۋلار ەنگىزۋ كوزدەلگەن. سونىمەن قاتار ۇيىمداستىرۋشىلاردىڭ, قاتىسۋشىلاردىڭ اكىمشىلىك زاڭنامانى بۇزعانى ءۇشىن, سونداي-اق سانكتسيا بەرىلمەگەن ميتينگىلەردى ۇيىمداستىرعانى جانە قاتىسقانى ءۇشىن اكىمشىلىك جاۋاپكەرشىلىگىن كۇشەيتۋ ۇسىنىلادى.
زاڭ جوباسىندا سونىمەن قاتار «بۇقارالىق اقپارات قۇرالدارى تۋرالى» زاڭعا تۇزەتۋلەر دە بار, وعان سايكەس بۇقارالىق اقپارات قۇرالدارى سالاسىنداعى ۋاكىلەتتى ورگان بەيبىت جينالىستارعا قاتىساتىن ءجۋرناليستىڭ (بۇقارالىق اقپارات قۇرالدارى وكىلىنىڭ) قىزمەت ەرەجەلەرىن, ءجۋرناليستىڭ ايىرىم بەلگىلەرىنىڭ نىساندارىن بەكىتەدى.
زاڭ جوباسى قوعامدىق قاتىناستاردى رەتتەيدى جانە ازاماتتىق قوعام ينستيتۋتتارىن, ازاماتتار مەن مەملەكەت اراسىنداعى ءوزارا قارىم-قاتىناستاردىڭ جاڭا تەتىكتەرىن دامىتادى, ازاماتتاردىڭ بەيبىت جينالىستار وتكىزۋ قۇقىعىن ىسكە اسىرۋعا بايلانىستى قوعامدىق-ساياسي تۇراقتىلىقتى ورنىقتىراتىن بولادى.
قۇجاتتار پالاتانىڭ قاراۋىنا بەرىلدى.