سىبايلاس جەمقورلىققا قارسى قىزمەت مەمساراپتاما سالاسىنداعى شارالاردى تالقىلادى

اگەنتتىكتىڭ 1-دەپارتامەنتى باسشىسىنىڭ ورىنباسارى باۋىرجان بالعابەكوۆ ءوز سوزىندە «مەمساراپتاما» باسشىلارى مەن ساراپشىلارىنىڭ الەۋمەتتىك ماڭىزدى جانە جاۋاپتى قىزمەت اتقارىپ وتىرعانىن اتاپ ءوتتى.

«مەمساراپتاما» باسشىلارى مەن ساراپشىلارى سىبايلاس جەمقورلىققا قارسى جوعارى قورعانىسى بار ادالدىقتىڭ, پاراساتتىلىق پەن ساتىلماۋشىلىقتىڭ ۇلگىسى بولۋى ءتيىس.

سونىمەن قاتار, 1-دەپارتامەنتتىڭ تەرگەۋ باسقارماسىنىڭ باسشىسى دانيار اقۋان ءوز بايانداماسىندا, 2019 جىلدان اگەنتتىكتىڭ وندىرىسىندە «اقتاۋ قالاسىنىڭ قۇرىلىس ءبولىمى» مم جانە «مەمساراپتاما» رمك باتىس ءوڭىرى بويىنشا فيليالىنىڭ لاۋازىمدى تۇلعالارىنا قاتىستى لاۋازىمدىق وكىلەتتىكتەرىن اسىرا پايدالانۋ فاكتىسى بويىنشا قىلمىستىق ءىس بولعانىن اتاپ ءوتتى.

تەرگەۋ بارىسىندا, 2017 جىلدىڭ قىركۇيەك ايىندا «مەمساراپتاما» رمك باتىس ءوڭىرى بويىنشا فيليالىنىڭ لاۋازىمدى تۇلعالارى جوبالىق سمەتالىق قۇجاتقا وڭ قورىتىندى شىعارۋ بارىسىندا قاتەلىكتەر جىبەرۋ سالدارىنان اقتاۋ قالاسىنداعى كارىزدىك كوللەكتور قۇرىلىس جۇمىستارىنا جۇمسالاتىن ماتەريال شىعىنىنىڭ جوبامەن 500 ملن تەڭگەگە ارتۋىنا جول بەرگەنى انىقتالعان. بۇل جوبانىڭ 2019 جىلى ىسكە قوسىلعانىن ايتا كەتكەن ءجون.

تەرگەۋمەن قىلمىستىق-پروتسەستىك كودەكستىڭ 200 بابىنىڭ تالاپتارىنا سايكەس ۇسىنىم جولدانىپ, ناتيجەسىندە جوبالىق سمەتالىق قۇجاتتىڭ شىعىندى ازايتۋ بولىگىندە تۇزەتۋلەر ەنگىزىلدى. وسىلايشا, جارتى ميلليارد تەڭگە كولەمىندە بيۋدجەت قاراجاتىنىڭ نەگىزسىز اۋدارىلۋىنا جول بەرىلمەدى.

وسىعان وراي, ەلەۋلى زيان كەلمەگەندىكتەن, قىلمىستىق قۇقىق بۇزۋشىلىق قۇرامىنىڭ بەلگىلەرى بولماۋىنا بايلانىستى قىلمىستىق ءىس توقتاتىلدى.

وڭ قورىتىندى شىعارعان «مەمساراپتاما» رمك باتىس ءوڭىرى بويىنشا فيليالىنىڭ باسشىسى مەن ساراپشىسى قاتاڭ تارتىپتىك جاۋاپكەرشىلىككە تارتىلدى.

سونىمەن قاتار اگەنتتىكپەن جوبالىق سمەتالىق قۇجاتقا ۆەدومستۆادان تىس ساراپتاما جۇرگىزۋ كەزىندە زاڭ بۇزۋشىلىققا جول بەرمەۋ ماقساتىندا زاڭ بولىمىندەگى كومپلاەنس سەكتورىن «مەمساراپتاما» رمك-ءنىڭ جەكە قۇرىلىمدىق بولىمشەسىنە ءبولۋ تۋرالى ۇسىنىس جاسالدى.   

اتالعان ۇسىنىس مەكەمە باسشىلىعىمەن تاياۋدا قارالاتىن بولادى.