قازاقستان رەسپۋبليكاسىنىڭ ەنەرگەتيكا مينيسترلىگى بەكىتكەن جوندەۋ جۇمىستارىن جۇرگىزۋ كەستەسىنە سايكەس 2020 جىلى «پاۆلودار مۇناي-حيميا زاۋىتى» جشس-دە اعىمداعى جوسپارلى-الدىن الۋ جوندەۋ جۇمىستارى وسى جىلدىڭ 25 مامىرى مەن 13 ماۋسىمى ارالىعىندا جوسپارلانعان بولاتىن, دەپ حابارلايدى «قازمۇنايگاز» كومپانياسىنىڭ قوعاممەن بايلانىس دەپارتامەنتى.
توتەنشە جاعداي ءتارتىبىن ساقتاۋ ماقساتىندا «پمحز» جشس-دە جوندەۋ جۇمىستارىن قاۋىپسىز جۇرگىزۋىن قامتاماسىز ەتۋ بويىنشا ءتيىستى تالداۋ جاسالدى. «پمحز» جشس قىزمەتكەرلەرىنىڭ قاۋىپسىزدىگىن قامتاماسىز ەتۋ ءۇشىن 8 ساعاتتىق جۇمىس كەستەسى قولدانىلا وتىرىپ, جۇمىستاردى جۇرگىزۋ كەستەسى مەن مەردىگەر ۇيىمداردىڭ جۇمىس ءتارتىبى قايتا قارالدى. بۇل جوندەۋ جۇمىستارىن جۇرگىزەتىن قىزمەتكەرلەرگە جۇمىس الاڭدارىندا, قوعامدىق تاماقتانۋ ورىندارىندا جانە تاسىمالداۋ كەزىندە ىڭعايلى جاعداي تۋعىزادى.
توتەنشە جاعدايدى ەسكەرىپ جانە جۇمىس كولەمىن تولىق ورىنداۋ ماقساتىندا «پمحز» جشس-دە جوسپارلى-الدىن الۋ جوندەۋ جۇمىستارىن 2020 جىلعى 25 ساۋىردە باستاۋ تۋرالى شەشىم قابىلداندى.
«قازمۇنايگاز» ۇك اق اقپاراتىنا سايكەس اتىراۋ جانە شىمكەنت مۇناي وڭدەۋ زاۋىتتارى ءوز قىزمەتىن قالىپتى جاعدايدا جالعاستىرۋدا. قولدا بار قوردى قوسا العاندا زاۋىتتاردىڭ ءوندىرىس كولەمى ەلىمىزدىڭ ىشكى نارىقتاعى اعىمداعى قاجەتتىلىگىن 3 ايدان استام مەرزىمگە قامتاماسىز ەتەدى.