تۇڭعىش پرەزيدەنت ەلباسى قورى, كونستيتۋتسيالىق كەڭەس, اباي اتىنداعى قازۇپۋ, سوربوننا-قازاقستان ينستيتۋتى جانە ءبىلىم جانە عىلىم مينيسترلىگى عىلىم كوميتەتىنىڭ مەملەكەتتىك تاريح ينستيتۋتىمەن بىرگە «پرەزيدەنتتىك باسقارۋ فورماسى: كونستيتۋتسيالىق نەگىزى جانە ساياسي پراكتيكا» اتتى حالىقارالىق عىلىمي-پراكتيكالىق ونلاين-كونفەرەنتسياسىن وتكىزدى.
قازاقستانداعى پرەزيدەنتتىك ينستيتۋتتىڭ قۇرىلعانىنا 30 جىل تولۋىنا ارنالعان ونلاين كونفەرەنتسيانى تۇڭعىش پرەزيدەنت - ەلباسى قورىنىڭ اتقارۋشى ديرەكتورىنىڭ ورىنباسارى, قازاقستان رەسپۋبليكاسىنىڭ اتىنان ەۋروپا كەڭەسىنىڭ ۆەنەتسيا كوميسسياسىنىڭ مۇشەسى, زاڭ عىلىمدارىنىڭ دوكتورى, پروفەسسور يگور روگوۆ جانە مەملەكەت تاريحى ينستيتۋتىنىڭ ديرەكتورى, ساياساتتانۋشى, تاريح عىلىمدارىنىڭ دوكتورى, پروفەسسور بۇركىتباي اياعان جۇرگىزدى.
تۇڭعىش پرەزيدەنت - ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ بۇگىنگى ماڭىزدىلىعىنا توقتالىپ, پاندەميا كەزەڭىنە قاراماستان ءوتىپ وتىرعان ونلاين باسقوسۋدا ەلىمىزدىڭ بۇگىنگە دەيىن قالىپتاسۋ كەزەڭى, مەملەكەتتىك باسقارۋ جۇيەسى, ماڭىزدى وقيعالاردىڭ فيلوسوفيالىق تۇرعىدان عالىمدار تاراپىنان تالقىلانۋى اسا ماڭىزدى دەپ اتاپ ءوتتى.
ەلباسى قورىنىڭ اتقارۋشى ديرەكتورى قانات جۇماباەۆ ءوزىنىڭ قۇتتىقتاۋ سوزىندە نۇرسۇلتان نازارباەۆتىڭ قازاقستاننىڭ دامۋىنداعى باستى ءرولى تۋراسىندا «قازاقستاننىڭ تۇڭعىش پرەزيدەنتى رەفورمالارىنىڭ نەگىزگى وزەگى قازاقستان رەسپۋبليكاسىنىڭ ۇدەمەلى دامۋىنداعى جان-جاقتى ويلاستىرىلعان ستراتەگياعا ءارى كورەگەن ساياساتقا نەگىزدەلگەن. ونى ءساتتى جۇزەگە اسىرۋ حالىقارالىق قوعامداستىقتا ءوزىنىڭ لايىقتى ورنى بار ساياسي جانە ەكونوميكالىق تۇرعىدان تاۋەلسىز, دەربەس, ەگەمەندى مەملەكەت قۇرۋعا مۇمكىندىك بەردى» دەپ اتاپ ءوتتى.
كونفەرەنتسياعا تۇڭعىش پرەزيدەنت – ەلباسى كەڭسەسىنىڭ باسشىسى ماحمۇت قاسىمبەكوۆ, كونستيتۋتسيالىق كەڭەسىنىڭ توراعاسى قايرات ءمامي, ادىلەت ءمينيسترى مارات بەكەتاەۆ, فرانتسيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى فيليپپ مارتينە, توتەنشە جانە وكىلەتتى ەلشى, ەقىۇ باعدارلامالىق كەڭسەسىنىڭ باسشىسى دەرد سابو, ەۋروپا كەڭەسىنىڭ ۆەنەتسيا كوميسسياسىنىڭ پرەزديەنتى دجانني بۋكيككيو, رەسەي فەدەراتسياسى ۇكىمەتىنىڭ جانىنداعى زاڭگەرلىك جانە سالىستىرمالى قۇقىقتانۋ ينستيتۋتىنىڭ ديرەكتورى, رف رعا پرەزيدەنتى, رف رعا ەۋروپا كەڭەسىنىڭ ۆەنەتسيا كوميسسياسىنىڭ مۇشەسى تاليا حابريەۆا قاتىستى. كونفەرەنتسياعا قاتىسۋشىلار ەلباسىنىڭ ۇلتارالىق كەلىسىم مەن بەيبىتشىلىك ورناعان مەملەكەتتى قالىپتاستىرۋداعى ماڭىزدى ءرولىن اتاپ ءوتتى. سونداي-اق, بايانداماشىلار قازاقستاننىڭ تۇڭعىش پرەزيدەنتىنىڭ ەكونوميكانىڭ دامۋى ءۇشىن قۇقىقتىق بازا مەن جاعداي جاساۋعا, شەتەلدەرمەن دوستىق قارىم-قاتىناس ورناتۋعا باعىتتالعان قىزمەتىنىڭ ماڭىزدىلىعىن اتاپ ءوتتى.
كونفەرەنتسياعا سونىمەن قاتار مەملەكەتتىك قىزمەتكەرلەر, جەتەكشى عالىمدار, تاريحشىلار, ساياساتتانۋشىلار, قۇقىقتانۋشىلار, قازاقستان جانە بىرقاتار شەت ەلدەردىڭ – رەسەي, فرانتسيا, اقش, تۇركيا, ءازىربايجان, قىرعىزستان جانە ت.ب. جوعارى وقۋ ورىندارىنىڭ باسشىلارى قاتىستى.