وبلىس اكىمى گۇلشارا ابدىقالىقوۆانىڭ قاتىسۋىمەن وبلىستىق ءماسليحاتتىڭ كەزەكتەن تىس 44-سەسسياسى ءوتتى. بەينە-كونفەرەنتسيا فورماتىندا ۇيىمداستىرىلعان سەسسيادا 2020-2022 جىلدارعا ارنالعان وبلىستىق بيۋدجەتتى ناقتىلاۋ ماسەلەسى قارالدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
– مەملەكەت باسشىسىنىڭ تاپسىرماسىن جەرگىلىكتى جەردە جۇزەگە اسىرۋ ءۇشىن وبلىستىق ءماسليحات سەسسياسىنىڭ كۇن تارتىبىنە 2020-2022 جىلدارعا ارنالعان وبلىستىق بيۋدجەتتى 34,8 ملرد.تەڭگەگە ناقتىلاپ وتىرمىز. اقپارات رەتىندە ايتا كەتەيىن, بۇل قارجىنىڭ 25,9 ملرد تەڭگەسى رەسپۋبليكالىق بيۋدجەتتەن ءبولىنىپ وتىر,– دەدى وبلىس اكىمى.
گۇلشارا ناۋشاقىزىنىڭ ايتۋىنشا, بيۋدجەتتەن قارالعان قارجىنىڭ 2,6 ملرد تەڭگەسى مەملەكەتتىك اتاۋلى الەۋمەتتىك كومەك بەرۋگە, 1,5 ملرد تەڭگە الەۋمەتتىك كەپىلدەندىرىلگەن پاكەتكە, ونىڭ ىشىندە توتەنشە جاعدايعا بايلانىستى از قامتىلعان وتباسىلاردى ازىق-ت ۇلىك جانە تۇرمىستىق جيىنتىقپەن قامتاماسىز ەتۋگە باعىتتالادى. ال ەڭبەك نارىعىن دامىتۋ, ونىڭ ىشىندە جالاقىنى ءىشىنارا سۋبسيديالاۋ, جاستار پراكتيكاسىنا, "NEET" ساناتىنداعى جاستارعا, تابىسى تومەن كوپبالالى وتباسىلارعا, ەڭبەككە قابىلەتتى مۇمكىندىگى شەكتەۋلى جاندارعا, جاڭا بيزنەس يدەيالارعا بەرىلەتىن گرانتتارعا جانە قوعامدىق جۇمىستارعا 4,3 ملرد تەڭگە قاراستىرىلعان.
«2020-2021 جىلدارعا ارنالعان جۇمىسپەن قامتۋدىڭ جول كارتاسى» مەملەكەتتىك باعدارلاماسىنا رەسپۋبليكالىق بيۋدجەتتەن ترانسفەرت رەتىندە 9,1 ملرد تەڭگە بولىنۋدە. قارجى ايماقتا جاڭا جۇمىس ورىندارىن اشۋعا, تۇرعىن ءۇي-كوممۋنالدىق شارۋاشىلىعى, ينجەنەرلىك-كولىك ينفراقۇرىلىم جوبالارىن جۇزەگە اسىرۋعا جانە الەۋمەتتىك-مادەني نىسانداردى جوندەۋ مەن ەلدى مەكەندەردى اباتتاندىرۋعا جۇمسالادى.
اۋىل تۇرعىندارىنىڭ ءومىر ءسۇرۋ ساپاسىن جاقسارتۋعا باعىتتالعان «اۋىل – ەل بەسىگى» باعدارلاماسى بويىنشا وبلىستا ماڭىزدى سانالاتىن 22 جوباعا 3 ملرد تەڭگە بولىنەدى. سونىمەن قاتار, «بيزنەستىڭ جول كارتاسى-2025» مەملەكەتتىك باعدارلاماسى شەڭبەرىندە نەسيەنىڭ پايىزدىق مولشەرلەمەسىن سۋبسيديالاۋ مەن شاعىن جانە ورتا بيزنەس نەسيەلەرىن كەپىلدەندىرۋگە 1,7 ملرد تەڭگە قارالادى.
بۇدان بولەك ايماق باسشىسى وبلىستىق بيۋدجەت قاراجاتىنىڭ جۇمسالۋ بارىسىنا توقتالىپ ءوتتى.
– ايماقتا جۇزەگە اسىرىلىپ جاتقان قۇرىلىس, ەنەرگەتيكا, مادەنيەت, سپورت, ەلەكتر جانە سۋمەن جابدىقتاۋ سالالارىنداعى 49 جوبانى قوسا قارجىلاندىرۋعا 3 ملرد, ارال, قازالى, جالاعاش, شيەلى اۋداندارىندا تۇرعىن ءۇي سالۋعا قۇندى قاعازداردى شىعارۋ ەسەبىنەن 895,5 ملن تەڭگە بولىنەتىن بولادى. سونىمەن قاتار, ءبىلىم, دەنساۋلىق, مادەنيەت جانە سپورت سالالارىنا 516 ملن.تەڭگە قارالادى. ال قۇقىق قورعاۋ ورگاندارىنىڭ ماتەريالدىق-تەحنيكالىق بازاسىن نىعايتۋعا 219 ملن تەڭگە جۇمسالادى,- دەدى گ.ابدىقالىقوۆا.