سەناتتا ولگا پەرەپەچينانىڭ توراعالىق ەتۋىمەن قارجى جانە بيۋدجەت كوميتەتىنىڭ كەڭەيتىلگەن وتىرىسى بولدى. وندا «ارىپتەستىك تۋرالى نەگىزدەمەلىك كەلىسىمدى (2014 جىلعى 4 مامىرداعى قازاقستان رەسپۋبليكاسىنىڭ ۇكىمەتى مەن ازيا دامۋ بانكى اراسىنداعى قازاقستان رەسپۋبليكاسىن ەكونوميكالىق ءارتاراپتاندىرۋ جانە ونىڭ ورنىقتى دامۋىنا, جالپى وسۋىنە جاردەمدەسۋ ماقساتىندا ىنتىماقتاستىقتى كۇشەيتۋ جونىندەگى ارىپتەستىك تۋرالى نەگىزدەمەلىك كەلىسىمگە تۇزەتۋلەر مەن تولىقتىرۋلار) راتيفيكاتسيالاۋ تۋرالى» زاڭ جوباسى قارالدى. بۇل تۋرالى سەناتتىڭ ءباسپاسوز قىزمەتى حابارلادى.
وتىرىستا بايانداما جاساعان ۇلتتىق ەكونوميكا ءمينيسترىنىڭ ورىنباسارى جاسلان ماديەۆ كەلىسىمدە مەملەكەتتىك كەپىلدىكپەن قارىز الۋ كەزىندە ازيا دامۋ بانكىنىڭ ساياساتى مەن ەرەجەلەرىن قولدانۋ جونىندە ەرەجەلەر بەلگىلەنگەنىن اتاپ ءوتتى. «وندا تاۋارلار, جۇمىستار مەن قىزمەتتەردى ساتىپ الۋداعى سىبايلاس جەمقورلىققا قارسى ساياسات جانە ەكولوگيالىق جانە الەۋمەتتىك قورعاۋ شارالارى, نەگىزگى ەڭبەك ستاندارتتارى, تولەمدەر, اقپاراتتاردى اشۋ, گەندەرلىك دامۋداعى ەرەجەلەر بار», - دەدى ول.
ونىڭ ايتۋىنشا, مەملەكەتتىك كەپىلدىكپەن بەرىلگەن قارىز شارتتارىن تاراتۋ جوبالاردى قارجىلاندىرۋ قۇرالدارىن كەڭەيتۋگە مۇمكىندىك بەرەدى.
سەنات دەپۋتاتى نۇرلان قىلىشباەۆ قارالىپ وتىرعان كەلىسىم ەكونوميكانى دامىتۋعا باعىتتالعانىن جانە قازاقستان رەسپۋبليكاسى ۇكىمەتى مەن ازيا دامۋ بانكىنىڭ اراسىنداعى ارىپتەستىكتى نىعايتۋعا جاسالعان تاعى ءبىر قادام ەكەنىن اتاپ ءوتتى.
«ەلىمىزدىڭ ەكونوميكالىق دامۋىنا ازيا دامۋ بانكىنىڭ قىزمەتى جۇمىس ورىندارىن قۇرۋ, يننوۆاتسيالاردى ىنتالاندىرۋ, الەۋەتتى ۇلعايتۋ, ءبىلىم مەن ۇزدىك حالىقارالىق پراكتيكالاردى ەنگىزۋ نەگىزىندە كەڭ اۋقىمدى قولداۋ كورسەتۋ ارقىلى ءوز ۇلەسىن قوسۋدا. ازيا دامۋ بانكى قارىزدان بولەك, «نۇرلى جول», «بيزنەستىڭ جول كارتاسى», «تسيفرلىك قازاقستان», اگروونەركاسىپتى دامىتۋ مەملەكەتتىك باعدارلامالارى بويىنشا تەحنيكالىق كومەك كورسەتەدى», - دەدى ن.قىلىشباەۆ.
زاڭ جوباسىن قابىلداۋ جوبالاردى قارجىلاندىرۋ قۇرالدارىن كەڭەيتۋگە جانە اۋىل شارۋاشىلىعى, كولىك جانە ەكونوميكانىڭ باسقا دا سەكتورلارىندا مەملەكەتتىك قارىزدار جانە مەملەكەتتىك كەپىلدىكپەن قارىزدار تۇرىندە ينۆەستيتسيالار تارتۋدىڭ قوسىمشا مۇمكىندىكتەرىن بەرۋ جولىمەن ينۆەستيتسيالىق جوبالاردى ىسكە اسىرۋعا ادب-نىڭ سالىمىن ۇلعايتۋعا مۇمكىندىك بەرەدى.
زاڭ جوباسى پالاتا قاراۋىنا جىبەرىلدى.