نۇر-سۇلتاندا پوليتسيا قىزمەتكەرلەرى ەپيدەميولوگتارمەن, اكىمدىكتىڭ قىزمەتكەرلەرىمەن بىرگە قىزمەتى رۇقسات ەتىلگەن نىسانداردا سانيتارلىق نورمالاردىڭ ساقتالۋىن كۇندەلىكتى تەكسەرىپ, رەيدتەر جۇرگىزىپ جاتىر. بۇل تۋرالى قالا اكىمدىگىنىڭ رەسمي سايتى حابارلادى.
قىزمەتكەرلەرىن قورعانىس قۇرالدارىمەن, ورتالىقتاندىرىلعان تاسىمالداۋمەن قامتاماسىز ەتپەي, دەزينفەكتسيا جۇمىستارىن جۇرگىزبەگەنى ءۇشىن 15 نىساننىڭ قىزمەتى توقتاتىلدى. جۇمىسى توقتاتىلعان نىسانداردىڭ قاتارىندا قۇرىلىس كومپانيالارى, تاپسىرىسپەن اينالىساتىن مەيرامحانالار مەن قوناق ءۇي بار.
ەلوردا كومپانيالارىنىڭ باسىم بولىگى سانيتارلىق-ەپيدەميولوگيالىق تالاپتاردى قاتاڭ ساقتاپ جاتىر. جۇمىس ۋاقىتى تاڭعى ساعات 9-دان كەشكى 18-گە دەيىن (بۇل تاماق تاسىمالدايتىن ورىندارعا قاتىستى ەمەس). قىزمەتكەرلەردى تاسىمالداۋ ۇيىمداستىرىلدى. ولار ارنايى كيىممەن, قورعانىس قۇرالدارىمەن قامتاماسىز ەتىلدى. قىزمەتكەرلەر سانيتارلىق وڭدەۋدەن وتەدى.
«بۇل قالادا قالعان ادامدار. 50%-دان استامى اۋداندارعا كەتتى. جۇمىسقا جاقىن جەردە تۇراتىن قىزمەتكەرلەر شىعىپ جاتىر. تاڭەرتەڭ ساعات 9-عا دەيىن جانە كەشكى ساعات 18-دەن كەيىن قىزمەتكەرلەر تەپلوۆيزوردا جرۆي بەلگىلەرىنىڭ بار-جوعىنا تەكسەرىلەدى. شتاتقا جۇمىسشىلاردى تەكسەرىپ تۇراتىن مەديتسينا سالاسىنىڭ قىزمەتكەرلەرى قابىلداندى. كىرەبەرىستە كونتروليور ءاربىر كليەنتتى تەپلوۆيزوردا تەكسەرىپ تۇرادى», – دەدى «مەگاستروي» قۇرىلىس گيپەرماركەتى ديرەكتورىنىڭ ورىنباسارى وكسانا سۋحورۋكوۆا.
گيپەرماركەتكە كىرە بەرىستە ارنايى بەلگى جاسالدى. سانيتارلىق نورمالاردى ساقتاۋعا ىڭعايلى بولۋ ءۇشىن ادامدار اراسىنداعى ارا قاشىقتىق – ەكى مەتر.
«ساتىپ الۋشىلار كەزەكپەن كىرەدى. بىزدە جەتى كاسسا جۇمىس ىستەيدى. كاسسادا 2-3 كليەنتتەن ارتىق بولماۋىن قاداعالايمىز. ءدالىز تولىعىمەن دەزينفەكتسيالانادى. زالدا سانيتايزەرلەر ورناتىلدى. كليەنتتەرگە ماسكامەن كىرۋگە عانا رۇقسات. ساعات سايىن دەزينفەكتسيا جۇمىستارى وتكىزىلىپ تۇرادى», – دەدى و. سۋحورۋكوۆا.
سانيتارلىق نورمالار مەن كارانتين رەجيمىن ساقتاماعان جاعدايدا ەلوردادا نىساندارىنىڭ قىزمەتى توقتاتىلادى. ەلوردادا كوروناۆيرۋستىڭ تارالۋىنا جول بەرمەۋ ماقساتىندا قاتاڭ ەرەجەلەر قابىلداندى.