وبلىس اكىمى گۇلشارا ابدىقالىقوۆا ەپيدەميولوگيالىق احۋالى اۋىر جاڭاقورعان جانە شيەلى اۋداندارىنا بارىپ, ىندەتتىڭ تارالۋىن تەجەۋ باعىتىنداعى جۇمىستارمەن تانىستى.
بۇگىندە وبلىس بويىنشا COVID-19 ينفەكتسياسىن جۇقتىرعان 151 ادام بار. سولاردىڭ 61-ءى شيەلى, ال وتىزى جاڭاقورعان اۋدانى تۇرعىندارى.
وسى كۇنى جاڭاقورعان كەنتىندە 4 سانيتارلىق توسقاۋىل بەكەتى جۇمىس ىستەپ تۇر. مەديتسينا, پوليتسيا جانە اكىمدىك قىزمەتكەرلەرى تاۋلىك بويى كەزەكشىلىكتە. تۇرعىنداردىڭ ءجۇرىپ-تۇرۋىنا قاتاڭ تىيىم سالىنعان. قىزمەتكەرلەر ىستىق تاماق جانە جەكە قورعانىش قۇرالدارىمەن قامتاماسىز ەتىلگەن.
اۋداندا ۆيرۋس جۇقتىرعاندار جۇقپالى اۋرۋلار اۋرۋحاناسىندا, ال ولارمەن قارىم-قاتىناستا بولعاندار جاڭاقورعان شيپاجايىنا جاتقىزىلعان. قازىر 80 ادام دارىگەرلەر باقىلاۋىندا. كەنت ورتالىعىنداعى 15 دۇكەن, «قازاقتەلەكوم», «كازپوشتا» عيماراتتارى ماڭايىنا, ناۋقاستار تىركەلگەن الىمكول, ارالباەۆ, جەڭىس, الشەكەي كوشەلەرىندە زالالسىزداندىرۋ جۇمىستارى جۇرگىزىلدى. جالپى كولەمى 527 667 شارشىمەتر اۋماق دەزينفەكتسيالاندى.
جاسالىپ جاتقان جۇمىسپەن تانىسقان ايماق باسشىسى اۋدان اكىمى سۇلتان ماقاشوۆقا سانيتارلىق-ەپيدەميولوگيالىق جاعدايدى ۇدايى نازاردا ۇستاۋدى جانە كارانتين ەرەجەلەرىن مۇلتىكسىز ورىنداۋدى تاپسىردى.
ال شيەلى اۋدانى ورتالىعىندا 11 سانيتارلىق بەكەت جۇمىس ىستەيدى.
كارانتينگە جابىلعان قودامانوۆ, بالا بي, جيدەلىارىق, ورتاقشىل ەلدى مەكەندەرىنىڭ تۇرعىندارى جەرگىلىكتى كاسىپكەرلەر ەسەبىنەن تەگىن ازىق-ت ۇلىك جانە مەديتسينالىق بۇيىمدارمەن قامتامسىز ەتىلۋدە.
گۇلشارا ناۋشاقىزى كەنتتەگى يندۋستريالدى-اگرارلىق كوللەدجىندە ورنالاسقان پروۆيزورلىق ستاتسيوناردىڭ ماماندارىمەن سويلەستى. دارىگەرلەر قاجەتتى پرەپارات جەتكىلىكتى ەكەنىن, قورعانىش كيىمدەرىمەن قامتاماسىز ەتىلگەنىن ايتتى.
سونىمەن قاتار, ايماق باسشىسى «گەجۋبا شيەلى تسەمەنت» زاۋىتىنىڭ جاتاقحاناسىندا اشىلعان ۋاقىتشا تۇراقتاۋ ورنىنىڭ جۇمىسىمەن دە تانىستى. اۋدان اكىمى قامباربەك مۇباراكوۆ مۇندا دارىگەرلەردىڭ تىنىعىپ, دەمالۋىنا بار جاعداي جاسالعانىن جەتكىزدى.
وبلىس باسشىسى تۇرعىندارىنىڭ كوبى ۆيرۋس جۇقتىرعان قودامانوۆ اۋىلىنا دا باردى. ەلدى مەكەن تولىق وقشاۋلانعان. اۋىلدان شىققان 46 ناۋقاس وبلىس ورتالىعىنداعى جۇقپالى اۋرۋلار اۋرۋحاناسىندا ەم قابىلداپ جاتىر. اۋىلدى جانە توسقاۋىل بەكەتىن ءتارتىپ ساقشىلارى مەن ساربازدار كۇزەتىپ ءجۇر. اۋدانعا كەلىسىمشارت بويىنشا جۇمىس ىستەيتىن 25 اسكەري قىزمەتكەر جىبەرىلگەن. ولاردىڭ قاتارىنا بۇگىن اۋماقتىق قورعانىس بريگاداسىن جاساقتاۋ ماقساتىندا ارناۋلى جيىنعا شاقىرتىلعان تاعى 25 اسكەري مىندەتتى سارباز قوسىلدى.
ء–بىز ءۇشىن قازىر ەڭ باستىسى – دەندەگەن دەرتتى توقتاتۋ. ازىق-ت ۇلىك, ءدارى-دارمەك ارنايى كولىكتەرمەن جەتكىزىلەدى. اۋىلدان ەشكىمدى شىعارماي, سىرتتان ەشكىمدى كىرگىزبەۋ كەرەك. ۆيرۋس جۇقتىرعان ادامداردىڭ تەزىرەك جازىلىپ شىعۋىنا بار كۇشتى جۇمىلدىرامىز, – دەدى وبلىس اكىمى.
اۋداندا وسى كۇنگە دەيىن 1 ملن 262 مىڭ شارشى مەتر اۋماق زالالسىزداندىرىلىپ, 28 ملن تەڭگەگە انتيسەپتيك, حلور, قورعانىش كيىمدەرى جانە باسقا دا مەديتسينالىق بۇيىمدار ساتىپ الىنعان.
ساپار قورىتىندىسىندا گۇلشارا ابدىقالىقوۆا اۋداندا ىندەتتىڭ تارالۋىن بولدىرماۋ شارالارىن ءالى دە شيراتا ءتۇسۋ كەرەكتىگىن ايتتى. تالاپتاردىڭ ۋاقىتىلى ورىندالماۋىنىڭ سالدارىنان كوپشىلىك شارالار وتكىزىلىپ, اۋرۋدىڭ جايىلىپ كەتۋىنە جول بەرىلگەن. اۋدان باسشىلىعى تەز ارادا ولقىلىقتىڭ ورنىن تولتىرىپ, باقىلاۋدى ءبىر ءسات تە باسەڭسىتپەۋى كەرەك.