قازالى اۋدانىندا اسكەري مىندەتتىلەردەن 24 ازامات ىرىكتەلىپ, ارنايى اسكەري جيىنعا شاقىرىلدى. بۇل تۋرالى اۋدان اكىمىنىڭ ءباسپاسوز قىزمەتى حابارلادى.
بۇل ازاماتتاردىڭ نەگىزگى مىندەتى توتەنشە جاعداي كەزىندە قاۋىپسىزدىك شارالارىنىڭ ساقتالۋىن قاداعالاپ, تۇرعىنداردى تارتىپكە شاقىرۋ. اۋدان اكىمى مۇرات ەرگەشباەۆ كومەككە كەلگەن ازاماتتارعا العىسىن ايتىپ, ىستەرىنە ساتتىلىك تىلەدى.
ارناۋلى اسكەري جيىنعا شاقىرىلعاندار ۋچاسكەلىك پوليتسيا ينسپەكتورلارىمەن بىرگە قازالى قالاسى مەن ايتەكە بي كەنتىندە قوعامدىق ءتارتىپتى ساقتاۋعا اتسالىسادى. ولار كيىم-كەشەكپەن, ىستىق تاماقپەن جانە باسقا دا ماتەريالدىق-تەحنيكالىق قۇرالدارمەن قامتاماسىز ەتىلەدى.
جيىن ۋاقىتىندا اسكەري مىندەتتىلەردىڭ جۇمىس ورنى مەن جالاقىسى ساقتالادى, ال جۇمىس ىستەمەيتىندەرگە ەڭ تومەنگى جالاقى تولەنەدى.