قازىر كوروناۆيرۋس ىندەتىنە بايلانىستى ءار وڭىردە ساقتىق شارالارى بارىنشا كۇشەيتىلىپ, ادامدار مەن كولىك قوزعالىسى شەكتەلىپ تۇر. بىراق كارانتيننەن كەيىن دە ءومىر بار, شەكتەۋلەر اياقتالىسىمەن سان سالاداعى تىرشىلىك قايتادان قالىپتى ارناسىن تابۋى ءتيىس. سوندىقتان دا قارا كۇزدە ەل نەسىبەسىنىڭ ورتايماۋىن ويلاعان سىر ديقاندارى ساقتىق شارالارىن بارىنشا كۇشەيتىپ, كوكتەمگى ەگىس ناۋقانىنا شىقتى.
جالپى, الا جازداي اتىز باسىندا جۇرەتىن ديقانداردىڭ جىلداعى الاڭى – سۋدىڭ تولىق ءارى دەر كەزىندە جەتۋى بولاتىن. سوعان قوسا ەگىنگە قام جاساعان ءار شارۋانىڭ كوڭىل تۇكپىرىندە «ناۋقان قارساڭىندا باعاسى مىڭ قۇبىلىپ كەتەتىن جانارماي جايى قالاي بولار ەكەن؟..» دەگەن كۇدىك تە جوق ەمەس ەدى. بىراق مەملەكەت باسشىسى توتەنشە جاعداي مەن داعدارىسقا قارسى ءىس-شارالار جونىندەگى مالىمدەمەسىندە ديقانداردى مازالاعان وسى ماسەلەنىڭ وڭ شەشىلەتىنىن ايتتى. پرەزيدەنتتىڭ ۇكىمەتكە اۋىل شارۋاشىلىعى ءونىم وندىرۋشىلەرى ءۇشىن ديزەل باعاسىن 165 تەڭگەدەن اسىرماۋدى تاپسىرعانى ەڭبەككەرلەر ءۇشىن ەرەكشە قولداۋ بولدى.
قازىر وسى تاپسىرما جۇزەگە اسىپ جاتىر. وبلىس ديقاندارىنا مەملەكەت تاراپىنان جەڭىلدەتىلگەن باعامەن بولىنگەن ديزەلدى جەتكىزۋشى وپەراتور بولىپ «نەفتترانس-قىزىلوردا» جشس مەن «رك-مۇناي» كومپانياسى بەلگىلەنىپتى. بۇل ەكى سەرىكتەستىك وبلىستىق اۋىل شارۋاشىلىعى ۇسىناتىن تاپسىرىسقا سايكەس, كۇز بەن كوكتەمگى ناۋقان كەزىندە ديقاندارعا 28 مىڭ توننا ديزەل جەتكىزەدى.
«نەفتترانس-قىزىلوردا» ناۋرىز ايىنىڭ باسىندا عانا شىمكەنتتەگى مۇناي وڭدەۋ زاۋىتىنان جانارمايدىڭ ءار تونناسىن 194 مىڭ تەڭگەدەن الىپ, شارۋالارعا ءليترىن 178 تەڭگەدەن جەتكىزگەن. ال ءساۋىر ايىنان باستاپ زاۋىت ءونىمى ەداۋىر ارزانداپ, تونناسى 174 تەڭگە بولىپتى.
– ءبىز وعان تاسىمالداۋ شىعىندارىن قوسىپ, ءليترىن 162 تەڭگەدەن شارۋاشىلىققا جەتكىزەمىز. بەلگىلەنگەن كەستە بويىنشا ديقاندارعا جانارماي ۋاقتىلى بارىپ تۇر, – دەيدى «نەفتترانس-قىزىلوردا» جشس ديرەكتورى نۇرىمجان سوپبەكوۆ.
مۇناي تاسىمالداۋشى كومپانيا باسشىسىنىڭ ايتۋىنشا, الدا زاۋىتتاعى باعا ءتۇسىپ جاتسا, ايماققا جەتەتىن ديزەل دە ارزانداپ وتىرادى.
مەملەكەتتىڭ قولداۋىن سەزىنىپ, كوڭىلدەگى سەكەمى سەيىلگەن شارۋالار ەل نەسىبەسىن ەسەلەۋگە كىرىسىپ كەتتى. بيىل وبلىس بويىنشا 183,1 مىڭ گەكتارعا ەگiس ەگۋ مەجەلەنىپ وتىر. نەگىزگى داقىل كۇرىش كولەمى 88 مىڭ گەكتاردان اسادى. ەگىستىككە قاجەتتى مينەرالدىق تىڭايتقىشتار بار, تۇقىم دا تولىعىمەن جەتەدى.
قىزىلوردا وبلىسى