قىزىلوردادا قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ماقساتىندا جۇرگىزىلىپ جاتقان قاتاڭ شارالارعا قاراماستان توتەنشە جاعداي رەجىمىن بۇزۋ دەرەكتەرى بايقالىپ قالىپ جاتىر. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى.
14 ءساۋىر كۇنى ساعات 11:30 شاماسىندا سىرداريا اۋدانى اقجارما اۋىلىندا بالاباقشا مەڭگەرۋشىسى ۇجىمىن سەنبىلىككە شاقىرعان. سەنبىلىكتەن كەيىن ۇجىم قىزمەتكەرلەردىڭ ءبىرىنىڭ تۋعان كۇنىن اتاپ ءوتۋدى ۇيعارىپ, داستارحان جايىپ, كەش ۇيىمداستىرادى.
توتەنشە جاعداي كەزىندە ەسكەرتۋلەرگە قۇلاق اسپاعان بالاباقشانىڭ 15 قىزمەتكەرىنە قاتىستى قازاقستان رەسپۋبليكاسى اكىمشىلىك قۇقىق بۇزۋشىلىقتار تۋرالى كودەكسىنىڭ 476-بابىنىڭ 6-بولىگى بويىنشا اكىمشىلىك حاتتاما تولتىرىلىپ, ءتيىستى شەشىم قابىلداۋ ءۇشىن جيناقتالعان قۇجاتتار سوتقا جولداندى.