قازاقستاندا بەت-الپەتتى تانۋ تەحنولوگياسىنىڭ كومەگىمەن پيلوتتىق جوبا ىسكە قوسىلادى

جوبا ستسەناريىنە سايكەس, بيلەتتى ونلاين ساتىپ العان كەزدە, جولاۋشى Digital ID سەرۆيسى ارقىلى تۇلعانى سايكەستەندىرۋدەن ءوتۋى ءتيىس. ودان ءارى, پويىزعا وتىرعىزۋ كەزىندە, جولسەرىك بيلەت ساتىپ العان جولاۋشىنىڭ تۇلعاسىن سمارتفونداعى بج كومەگىمەن فوتوسۋرەت ارقىلى نەمەسە ۆاگوننىڭ تولىعۋىن ونلاين رەجيمدە قاداعالاۋعا مۇمكىندىك بەرەتىن, ۆاگونعا ورناتىلعان كامەرا مەن كومپيۋتەر ارقىلى تەكسەرە الادى.   

ىنتىماقتاستىق اياسىندا «جولاۋشىلار تاسىمالى» اق «Instant payments» جشس-مەن بىرلەسە وتىرىپ الماتى-ورال باعىتىنداعى Digital ID تۇلعانى قاشىقتان سايكەستەندىرۋ سەرۆيسىنىڭ كومەگىمەن بيلەت ساتۋ ايرىقشا قۇقىعىنا يە ءبىر ۆاگوندى بەرىپ تە ۇلگەردى.  

يدەيا اۆتورلارى مۇنداي تسيفرلىق قۇرالداردى ەنگىزۋ جولاۋشىلار تاسىمالىنىڭ بارلىق قاتىسۋشىلارى ءۇشىن پايدالى بولاتىنىنا سەنىمدى. جولاۋشىلاردىڭ ەندى بيلەت ساتىپ الۋ كەزىندە وزدەرىنىڭ دەرەكتەرىن تولتىرۋى, سونداي-اق پويىزعا وتىرۋ كەزىندە جولسەرىكتەرگە جەكە كۋالىكتەرى مەن بيلەتتەرىن كورسەتۋى قاجەت ەمەس. ال تاسىمالداۋشى, «جولاۋشىلار تاسىمالى» اق, شىنايى ۋاقىت تارتىبىندە ۆاگونداردىڭ تولىعۋىن قاداعالاپ, بيلەتسىز جول ءجۇرۋ پروبلەماسىنىڭ الدىن الۋعا, سونىمەن قاتار ىندەت نەمەسە جاھاندىق قاتەر جاعدايىندا تاۋەكەل توبىنا جاتاتىن تۇلعالار ءتىزىمىن جىلدام انىقتاۋعا مۇمكىندىك الادى. 

«اتالعان شەشىم بيلەت ساتىپ الۋ پروتسەسىن انعاۇرلىم اشىق ءارى ءتيىمدى ەتپەك. ءبىزدىڭ رەسپۋبليكا دەڭگەيىندە ءىرى جوبالاردى ىسكە اسىرۋ, جەكەلەي العاندا, ەتسق-نى قاشىقتان شىعارۋ كەزىندەگى تاجىريبەمىز بار. قتج-مەن بىرلەسكەن تاجىريبەنىڭ قازاقستاندىقتاردىڭ ءومىر ساپاسىن كوتەرەتىنىنە مەن ۇلكەن ءۇمىت ارتامىن», - دەدى Digital ID باسشىسى ولەگ گانزي.

يدەيانى ىسكە اسىرۋدان كۇتىلەتىن تاعى ءبىر وڭ اسەر – ول بيلەتتەردى زاڭسىز قايتا ساتۋمەن كۇرەس, اتالعان جاعداي مەرەكەلەر مەن جازعى دەمالىس كەزەڭىندە مەيلىنشە بەلەڭ الادى, بيلەتتەردىڭ ەركىن ساتىلىمدا بولماۋىنا بايلانىستى ادامدار ادەتتە ولاردى دەلدالداردان جوعارى باعامەن ساتىپ الۋعا ءماجبۇر.

«ەۋروپالىق وداق, جاپونيا, قىتاي, مالايزيا, سينگاپۋر ەلدەرىنىڭ حالىقارالىق تاجىريبەسى تەمىرجول تاسىمالىنا بيومەتريا نەگىزىندەگى يت-شەشىمدەردى ەنگىزۋدىڭ تيىمدىلىگىن كورسەتتى.  جاڭا تەحنولوگيالاردى ەنگىزۋ جولاۋشىلار تاسىمالى كەزىندە ادام فاكتورىن بارىنشا ازايتۋعا, دەمەك سىبايلاس جەمقورلىق تاۋەكەلدەرىن, اسىرەسە مەرەكە كۇندەرىندەگى بيلەت تاپشىلىعىن دا تومەندەتۋگە مۇمكىندىك بەرەدى. كەلەسى ماڭىزدى فاكتور, سوڭعى جاعدايلار كورسەتكەندەي, جاڭا تەحنولوگيالاردى ەنگىزۋ جولاۋشىلار قاۋىپسىزدىگىن ايتارلىقتاي ارتتىرادى, بيومەتريا تەحنولوگياسى بار كامەرالار ىزدەۋ سالىنعان نەمەسە بايلانىسۋشى تۇلعا بولىپ تابىلاتىن جولاۋشىلاردى اۆتوماتتى تۇردە تاني الاتىن بولادى. ونىڭ بارلىعى قانداي پارامەترلەر قويىلعانىنا بايلانىستى بولماق», -  دەپ ءتۇسىندىردى يدەيا اۆتورلارىنىڭ ءبىرى جانە «ادال جول» جوبالىق كەڭسەسىنىڭ قىزمەتكەرى جاقپاروۆ كاماليدين.

تەمىرجول بيلەتتەرىن ساتىپ الۋدىڭ جاڭا فورماتى ولاردى قايتارۋ ساياساتىنا ەشقانداي اسەر ەتپەيدى.  بيلەتتەردى جولاۋشىلار اعىمداعى ۋاقىتتا قولدانىستا جۇرگەن بارلىق قاعيدالارعا ساي   اۋىستىرا نەمەسە قايتارا الادى. بالالارمەن جولعا شىققان جاعدايدا, بالالاردىڭ دەرەكتەرى سايكەستەندىرۋسىز ەنگىزىلەتىن بولادى.