توتەنشە جاعداي كەزىندە ناۋقاستاردى قابىلدايتىن اۋرۋحانالاردىڭ ەكەۋىنىڭ جۇمىسى اياقتالۋعا جاقىن. ءتىپتى, ەلورداداعى ەمدەۋ ورىنى ەرتەڭ دارىگەرلەرگە بەرىلەدى دەپ كۇتىلۋدە. ەلىمىزدىڭ ءۇش مەگاپوليسىندە سالىنىپ جاتقان نىساندارعا «BI Group» قۇرىلىس كومپانياسى جاۋاپتى. بۇگىندە مىڭنان استام قۇرىلىسشى 3 اۋىسىممەن تاۋلىك بويى جۇمىس ىستەۋدە. ماماندار اۋرۋحانالاردىڭ ۋاقىتىندا پايدالانۋعا بەرىلەتىنىنە سەنىمدى.
جوسپارعا سايكەس, 15 ءساۋىر كۇنى باس قالاداعى قۇرىلىس جۇمىستارى اياقتالدى. قازىر بايلانىس مونتاجى مەن ارلەۋ جۇمىستارىنىڭ سوڭعى كەزەڭى جۇرگىزىلىپ جاتىر. كەستە بويىنشا, 17 ساۋىردە اۋرۋحانا جۇمىسىن باستايدى.
– جۇقپالى اۋرۋحانانى مۇنداي قىسقا مەرزىمدە تۇرعىزۋ – كۇردەلى تەحنيكالىق مىندەت. جوباعا وزگەرىستەر ەنگىزۋگە جانە ونى بىردەن وبەكتىدە ەسكەرۋگە تۋرا كەلدى. بۇل قيىندىقتارعا قاراماستان قويىلعان مىندەتتەردى ورىنداپ شىقتىق. ەلورداداعى اۋرۋحاناعا نەمىس تەحنولوگياسى بويىنشا جاسالعان مودۋلدىك بلوكتار سالىندى. بۇل تەحنولوگيا قۇرىلىستى قىسقا مەرزىمدە اياقتاۋعا مۇمكىندىك بەرگەنىن ايتا كەتكەنىمىز ءجون. قۇرىلىس كەزىندە قالانىڭ اۋا رايى دا ەسكەرىلدى, – دەدى جوبا ينجەنەرى ايسار جاعالشين.
الماتىداعى اۋرۋحانا ۆاحتالىق قالاشىق تيپىندە سالىنىپ جاتىر. قۇرىلىسشىلار ۋاقىت پەن بيۋدجەتتىڭ تىعىز بولۋىنا بايلانىستى باتىستاعى مۇناي جۇمىستارى ءۇشىن قولدانىلاتىن قالاشىق ۇلگىسىن نەگىزگە العان. ءۇش كەشەنگە تولىقتاي مەديتسينالىق گازدار جۇرگىزىلەدى. شىمكەنتتەگى اۋرۋحانانى سالۋدا كونتەينەرلىك تيپتەن تەمىربەتونعا دەيىنگى بارلىق نۇسقالار قاراستىرىلعان. دەسە دە جۇمىس ءسال كەشتەۋ باستالماق. وعان سەبەپ: اۋرۋحانا فورماتىنىڭ وزگەشەلىلىگى.
– قارقىندى جۇمىس ىستەسەك, قالعان ۋاقىتتا قۋىپ جەتەمىز دەگەن ويدامىن. وعان الاڭداۋدىڭ قاجەتى جوق. بارىنشا بەلسەندى بولۋعا تىرىسىپ جاتىرمىز. نۇر-سۇلتانداعى قۇرىلىستا ءتۇرلى سالاداعى 130-عا جۋىق, الماتىدا 150-گە جۋىق بريگادا جۇمىس ىستەۋدە. ولاردىڭ بارلىعىندا 1300-گە تارتا قۇرىلىسشى بار. قازىر ارلەۋ جۇمىستارى باستالدى. جۇمىستار كەستەگە سايكەس جۇرگىزىلۋدە, – دەدى ا.جاعالشين.
قازىرگى ۋاقىتتا «BI Group» قۇرىلىس كومپانياسى الماتى مەن نۇر-سۇلتانداعى اۋرۋحانانى سالىپ جاتىر. ال شىمكەنتتەگى نىسان جوباسىنىڭ پارامەترلەرىن دارىگەرلەر مەن بيلىك وكىلدەرى ناقتىلاۋدا. جوبا ديرەكتورى ارمان لەسبەكوۆ ەشتەڭەگە الاڭداۋدىڭ رەتى جوقتىعىن ايتادى.
– جۇمىس ساپاسى قازاقستاندىق تالاپتارعا عانا ەمەس, دۇنيەجۇزىلىك دەنساۋلىق ساقتاۋ ۇيىمىنىڭ تالاپتارىنا دا سايكەستەندىرىلگەن. جۇمىس ساپاسى مەملەكەت پەن دارىگەرلەر تاراپىنان ۇنەمى باقىلانادى. بارلىق اۋرۋحانادا اق جەلەڭدى ابزال جاندارعا ارنالعان ورديناتورلىق بولمەلەر, كابينەتتەر بولادى. ءمايىت ساقتايتىن ورىندار دا نەگىزگە الىنعان, – دەدى ا.لەسبەكوۆ.
ونىڭ ايتۋىنشا, قۇرىلىس ماتەريالدارى تولىقتاي جەتكىلىكتى. بارلىق كەرەك-جابدىقتار – وتاندىق ءونىم. سوندىقتان سىرتتان اكەلۋ تۋراسىندا ماسەلەسى جوق. شەتەلدىك ماتەريالدار كەرەك بولعان جاعدايدا, «جاسىل دالىزدەر» ارقىلى مەملەكەت قولداۋ كورسەتەدى. مىسالى, جاقىندا بەلارۋس ەلىنەن گەرمەتيكالىق ەسىكتەر اكەلىنىپتى. ەل بيلىگى گوسپيتالدىك ەسىكتەردى جەتكىزۋ ءۇشىن ارنايى چارتەرلىك رەيس ۇيىمداستىرۋعا كومەكتەسكەن.
ايتا كەتەيىك, نۇر-سۇلتان مەن شىمكەنتتەگى اۋرۋحانا ءبىر كۇندە 200 ناۋقاستى قابىلداي الادى. ارقايسىسىندا 20 ورىن ينتەنسيۆتى تەراپياعا ارنالماق. الماتىدا 280 ورىن بولسا, ونىڭ 28-ءى ينتەنسيۆتى تەراپياعا بەرىلەدى. نىساندار Modex زاۋىتى جاسايتىن مودۋلدەردەن قۇرىلعان. مامانداردىڭ ايتۋىنشا, مۇنداي مونوليتتىك قۇرىلىستاردى 50-70 جىل بويى پايدالانۋعا بولادى.