توتەنشە جاعداي شىمكەنتتەگى جول جوندەۋ جۇمىستارىنا قولبايلاۋ بولماۋى كەرەك. كوشەدەگى كولىك قوزعالىسىنىڭ ازدىعى مەن جۇرتتىڭ جاپپاي ۇيدە وتىرعان ءساتىن ءتيىمدى پايدالانعان ءجون. بۇگىن قالا اۋماعىندا ءجۇرىپ جاتقان جول قۇرىلىس جۇمىستارىنىڭ بارىسىمەن تانىسقان قالا اكىمى مۇرات ايتەنوۆ وسىلاي دەپ مالىمدەدى.
«قالانىڭ ورتالىعىندا تۇرساق تا تالايدان بەرى توپىراق كەشىپ ءجۇر ەدىك. ەندى مىنە كوشەمىزگە اسفالت جول توسەلىپ, سۋ اعار ارىقتار ورناتىلىپ جاتىر. اسىرەسە بۇل جاعدايعا بالالارىمىز قاتتى قۋاندى. كوشەمىزدىڭ اجارى كىردى. بۇل ءۇشىن قالا تۇرعىندارىنىڭ اتىنان العىسىمىز شەكسىز», دەدى قالا اكىمىمەن جۇزدەسكەن «سامال-2» شاعىن اۋدانىنداعى سەيىتوۆ كوشەسىنىڭ تۇرعىندارى.
قالاداعى گاگارين كوشەسى مەن رەسپۋبليكا داڭعىلىنداعى جول قۇرىلىسى دا قارقىندى جۇرۋدە. قالاعا كىرەبەرىستەگى ورتالىق داڭعىل بويىنداعى قۇرىلىستى ارالاعان قالا باسشىسى مەردىگەرلەرگە ءبىرىنشى كەزەكتە ساپاعا ءمان بەرۋدى تاپسىردى. وعان قوسا كارانتين كەزىندە جۇمىسشىلاردىڭ بارلىق ساقتىق شارالارىنا مۇقيات بولۋدى جۇكتەدى.
«سامال» بازارىنا بارار جول بويىنىڭ قوس قاپتالىنداعى اياقجولدار مەن سۋاعار لاتوكتاردىڭ اراسىندا اشىق جەرلەردى جاسىل جەلەكپەن كومكەرۋدى تاپسىردى. جول قۇرىلىس ساپاسىن بارلىق تالاپتارعا ساي جۇرگىزۋ ءۇشىن قۇرىلىس باسىندا كۇندەلىكتى باقىلاۋشىلار ساراپتاما جۇرگىزىپ جاتىر. وعان قوسا سول كوشە تۇرعىندارىن تىكەلەي قۇرىلىستى قاداعالاپ تۇرۋعا شاقىردى.
شىمكەنت قالاسىندا اۆتوموبيل جولدارىنىڭ جالپى ۇزىندىعى 297 606 شاقىرىمدى قۇرايدى. ونىڭ 56,5%-ى قاناعاتتانارلىق جاعدايدا. قالاداعى جول ساپاسىن دامىتۋ ماقساتىندا 417,6 شاقىرىم جولدى قۇرىلىس-جوندەۋ جۇمىستارىنا بيىل بيۋدجەتتەن 25,6 ملرد تەڭگە باعىتتالعان. ونىڭ 5,1 ملرد قارجىسى رەسپۋبليكالىق قازىنادان بولسا, قالعانى جەرگىلىكتى بيۋدجەت ەسەبىنەن جۇرگىزىلۋدە. ناتيجەسىندە 294 شاقىرىم جول مەن 6 كوپىر جانە 1 جولايرىق پايدالانۋعا بەرىلەدى.
قالا اكىمى سونداي-اق شىمكەنت اۋەجايىنداعى جاڭا تەرمينال قۇرىلىسىمەن تانىستى. مۇنداعى قۇرىلىس بىرنەشە كەزەڭ بويىنشا جۇرۋدە. بارلىق قۇرىلعى زاماناۋي ۇلگىدە بولادى. جولاۋشىلاردى وتكىزۋ جانە جۇك قابىلداۋ تسيفرلى تۇردە جۇرگىزىلەدى. ودان كەيىن اۋە كەمەلەرىنە ارنالعان پەرروندى كەڭەيتۋ جوسپاردا بار. تەرمينالعا اپاراتىن جاڭا جول مەن ينجەنەرلىك قۇرىلىم مەن اباتتاندىرۋ جۇمىستارى دا بىرگە اياقتالادى, دەپ جوسپارلانعان. مەردىگەرلەرمەن جۇزدەسكەن قالا اكىمى جۇك تاسىمالداۋشى كولىكتەردىڭ ءجۇرىپ-تۇرۋى ءۇشىن بارلىق جاعداي جاسالعانىن اتاپ ءوتتى.
«قۇرىلىسقا قاجەتتى زاتتاردىڭ باسىم بولىگى وتاندىق. سوندىقتان ساپاسى جوعارى بولادى», دەپ اتاپ ءوتتى كومپانيا وكىلدەرى.
شىمكەنت