سوڭعى حابارعا قاراعاندا سولتۇستىك قازاقستاندا 168 ادام توتەنشە جاعداي رەجىمىن بۇزعانى ءۇشىن اكىمشىلىك جاۋاپقا تارتىلدى. ونىڭ 93-ىنە ايىپپۇل سالىندى, 13-ءى قاماۋعا الىندى, ال قالعان ماتەريالدار سوتتا قارالۋدا.
قابىلدانىپ جاتقان شارالار مەن ءتۇسىندىرۋ جۇمىستارىنا قاراماستان, بۇزۋشىلىقتىڭ كوبەيۋى جالعاسۋدا. كوبىنە, دۇكەندەر, ءدارىحانالار مەن باسقا دا ۇيىمدار جابىلعانعاننان كەيىن, كەشكى ۋاقىتتا جۇرگەن قۇقىق بۇزۋشىلار دا كەزدەسەدى.
پەتروپاۆل قالاسىنىڭ كوشەلەرىندەگى اۆتوكولىك قوزعالىسى كەشكى مەزگىلدە ازايعانىمەن قوزعالىس جالعاسۋدا. كوبىنەسە, بۇل ۋاقىتتا تاكسي, جەتكىزۋ قىزمەتىنىڭ جۇرگىزۋشىلەرى, جۇمىستا كىدىرگەندەر جۇرەدى. پاترۋلدىك پوليتسيا قىزمەتكەرلەرى كولىكتەردى توقتاتىپ, جۇرگىزۋشىلەردىڭ قۇجاتتارىن تەكسەرەدى.
كەشە كەشكى ساعات 10-دا توقتاتىلعان كولىكتىڭ جۇرگىزۋشىسىندە قۇجاتتارى دۇرىس بولعانىمەن, جولاۋشىلارىنىڭ ەشقايسىسىندا جەكە باسىن كۋالاندىراتىن قۇجات, قالا بويىنشا ءجۇرىپ-تۇرۋعا رۇقسات بەرەتىن قانداي دا ءبىر انىقتاما جوق بولىپ شىقتى. تۇنگى ۋاقىتتا ەكى جاس جىگىتتىڭ قوناقتان كەلە جاتقانى بەلگىلى بولدى. جۇمىستان كەيىن قوناققا بارعاندارىن ايتادى. بىراق جۇمىس ورىندارىنان بەرىلگەن انىقتاما بولماعان. ولارعا قاتىستى توتەنشە جاعداي رەجىمىن بۇزعان دەگەن ايىپپەن اكىمشىلىك ماتەريالدار جينالدى.
«كارانتين كەزىندە كورشىلەرگە, تانىستارعا, تۋىستارعا جانە ارىپتەستەرگە بارۋعا تىيىم سالىنادى. فاكتىلەردەن كورىنىپ وتىرعانداي, كەيبىر ازاماتتار كەشكى ۋاقىتتا تاكسي قىزمەتىن پايدالانىپ, بۇل تالاپتى ەلەمەيدى», - دەيدى قالالىق جەرگىلىكتى پوليتسيا قىزمەتى ءبولىمى باستىعىنىڭ ورىنباسارى پوليتسيا پودپولكوۆنيگى ايدىن اقماعامبەتوۆ.
پەتروپاۆل