جاۋاپتى ءارى ساۋاپتى قىزمەت بولعان سوڭ ادامداردىڭ اماندىعى ءۇشىن بارىمىزدى سالامىز. ازاماتتىق ارىمىز سىنعا تۇسكەن وسىناۋ قيىن-قىستاۋ ساتتە ءبىر ءۇيدىڭ بالاسىنداي, ءبىر قولدىڭ سالاسىنداي جۇرت بولىپ جۇمىلىپ ەڭبەك ەتۋدەمىز. قانشاما قالالار كارانتينگە جابىلىپ, ساقتىق شارالارى كۇشەيتىلدى.
ارينە ونىڭ ءبارى ازاماتتاردىڭ اماندىعى ءۇشىن جاسالىپ جاتقان شاراپاتتى شارالار ەكەنىن ەسكەرۋىمىز كەرەك. مەن 1-توپتاعى قاۋىپتىلىگى جوعارى مەديتسينا قىزمەتكەرلەرىنىڭ قاتارىندامىن. ءبىز التى ساعاتتان كەزەك بويىنشا جۇمىس ىستەۋدەمىز. كەزەگىمىز اياقتالعاندا جاتاقحاناعا الىپ كەتەدى.
وسى ورايدا قاۋىپتى ىندەتپەن بىلەك ءتۇرىپ كۇرەسىپ جاتقان مەديتسينا قىزمەتكەرلەرىنىڭ ماڭداي تەر ماشاقاتى مەن ەڭبەگىن ەسكەرىپ, باتىلدىعىن باعالاپ, تولەماقى بەرۋگە شەشىم قابىلداعان پرەزيدەنت قاسىم-جومارت كەمەل ۇلىنا العىس بىلدىرگىم كەلەدى. وسى بەرىلگەن مەملەكەتتىك تولەماقى مەديتسينا سالاسىندا ىندەتپەن كۇرەسىپ جۇرگەن قىزمەتكەرلەردىڭ جىگەرىن جانىپ, جۇمىستارىنا ىنتا سىيلايتىنىنا سەنىمدىمىن.
عاليا حاۋەزحانقىزى,
سولتۇستىك قازاقستان وبلىستىق №1 قالالىق اۋرۋحاناسى جۇقپالى اۋرۋلار ءبولىمىنىڭ مەڭگەرۋشىسى