كاسىپكەرلەرگە ۋاقىتىلى ءونىم جەتكىزبەگەنى ءۇشىن ايىپپۇل سالىنبايدى

قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆ ءوزىنىڭ Facebook-تەگى پاراقشاسىندا 12 ناۋرىزدان باستاپ كاسىپكەرلەردەن 30,3 مىڭنان استام ءوتىنىش (ساۋالناما, call-ورتالىق, جازباشا وتىنىشتەر مەن الەۋمەتتىك جەلىلەر) تۇسكەنىن حابارلادى. ءوتىنىش بىلدىرگەندەردىڭ 60%-ى ەنگىزىلگەن شەكتەۋلەرگە بايلانىستى شارتتىق مىندەتتەمەلەردى بۇزۋعا ءماجبۇر بولعانىن حابارلادى.

مەملەكەتتىك ساتىپ الۋلار, سونداي-اق كۆازيمەملەكەتتىك سەكتور سۋبەكتىلەرىنىڭ ساتىپ الۋلار شارتتارى شەڭبەرىندە تاۋارلاردى جەتكىزۋدى جۇزەگە اسىراتىن (جۇمىستاردى ورىندايتىن, قىزمەتتەردى كورسەتەتىن) كاسىپكەرلەر وزدەرىن مازالاپ جۇرگەن سۇراقتاردى قويدى. مەملەكەتپەن جاسالعان كەلىسىم-شارتتار تالاپتارىنىڭ ەڭ ەلەۋسىز بۇزىلۋىنىڭ ءوزى وسىماقى تولەتۋ مەن ەكى جىلعا قارا تىزىمگە ەنگىزۋ قاۋپىن تۋدىرادى.

بيزنەس-ومبۋدسمەن كاسىپكەرلەردەن العاشقى وتىنىشتەر لەگى تۇسە باستاعاندا-اق ۇكىمەتكە مەملەكەتتىك ورگاندارمەن جانە كۆازيمەملەكەتتىك سەكتورمەن جاسالعان شارت مىندەتتەمەلەرىن بۇزعانى ءۇشىن بيزنەستى جاۋاپكەرشىلىكتەن بوساتۋ قاجەتتىلىگى تۋرالى ۇسىنىستاردى دايىنداۋ قولعا الىنعاندىعىن ايتىپ ءوتتى.

رۋستام ءجۇرسىنوۆ 23 ناۋرىزدا پرەزيدەنت توتەنشە جاعدايلار جونىندەگى مەملەكەتتىك كوميسسيانىڭ وتىرىسىندا سويلەگەن سوزىندە «مەملەكەتتىك ورگاندار مەن كۆازيمەملەكەتتىك كومپانيالار ايىپپۇل سانكتسيالارىن ءوندىرىپ الماۋى جانە ەگەر شارتتىڭ ورىندالماۋى ەكونوميكاداعى اعىمداعى كەلەڭسىز قۇبىلىستارعا بايلانىستى بولسا, جەتكىزۋشىنى جوسىقسىز جەتكىزۋشىلەر تىزىلىمىنە ەنگىزبەۋى ءتيىس», دەپ اتاپ وتكەندىگىن ەسكە سالدى.

«جاقىن ارادا پرەزيدەنتتىڭ تاپسىرماسىن ورىنداۋ ءۇشىن مەملەكەتتىك ساتىپ الۋلار بويىنشا ۇكىمەت قاۋلىسى قابىلدانادى دەپ كۇتىپ وتىرمىز. ەگەر ەلدە ەنگىزىلگەن شەكتەۋلەرگە بايلانىستى مىندەتتەمەلەردى بۇزۋعا جول بەرىلگەن بولسا, بيزنەس تج رەجيمى جاعدايىندا مەملەكەتتىك ساتىپ الۋلار بويىنشا جەتكىزۋگە قاتىستى شارت تارالپتارىن بۇزعانى ءۇشىن جاۋاپكەرشىلىكتەن بوساتىلۋى ءتيىس», دەپ اتاپ ءوتتى قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل.