اۋىل تۇرعىندارىنىڭ ءومىر ءسۇرۋ ساپاسى مەن ءال-اۋقاتىن ارتتىرۋدا, جالپى اۋىل ينفراقۇرىلىمىن جاقسارتۋدا ەلىمىزدە قولعا الىنىپ وتىرعان «اۋىل – ەل بەسىگى» جوباسىنىڭ ماڭىزى زور. اتالعان جوبا اياسىندا رەسپۋبليكا بويىنشا جالپى 6,6 ميلليون ادام نەمەسە 85 پايىز اۋىل تۇرعىندارى تۇراتىن 3447 پەرسپەكتيۆالى ەلدى مەكەن ىرىكتەلىپ الىنادى.
ال, جامبىل وبلىسىنىڭ قورداي اۋدانى, قورداي اۋىلدىق وكرۋگى بويىنشا اعىمداعى جىلى جالپى 21 جوبانى ىسكە اسىرۋ ماقساتىندا 898 ميلليون 615,0 مىڭ تەڭگە بولىنگەن. اۋدان اكىمدىگىنىڭ مالىمەتىنشە, بۇگىندە اتالعان جوبا اياسىندا اۋدان ورتالىعىندا قارقىندى جۇمىستار باستالىپ كەتكەن. اۋدان ورتالىعى قورداي اۋىلىنىڭ 5 اۋىلىشىلىك كوشەلەرى مەن 2 جاياۋ جۇرگىنشىلەرگە ارنالعان جولدارعا جوندەۋ جۇمىستارى جۇرگىزىلۋدە. اتالعان 5 كوشەنىڭ جۇمىستارى ءساۋىر ايىندا اياقتالادى دەپ جوسپارلانۋدا ەكەن. وسىلايشا 16 كوشەگە ۋكەزەڭ-كەزەڭىمەن جوندەۋ جۇمىستارى جۇرگىزىلەتىن بولادى.
سونىمەن قاتار اتالعان باعدارلاما اياسىندا جەرگىلىكتى بيۋدجەتتەن دە قارجى قاراستىرىلعان. بۇل قاراجاتقا اۋداندىق مادەنيەت ءۇيىنىڭ الدىنداعى سۋبۇرقاقتىڭ قۇرىلىسى باستالعان. ال, مەردىگەر «كانا» جەكە كاسىپكەرلىگى بۇل نىساننىڭ جۋىق ارادا پايدالانۋعا بەرىلەتىنىن ايتادى. سونداي-اق, اۋىلعا كىرەبەرىس تۇستاعى اينالمالى جولعا دا اباتتاندىرۋ جۇمىستارى جۇرگىزىلۋدە. ال, نۇرداۋلەت الىبەك ۇلى اتىنداعى ماگيسترالدى كانالىنىڭ تولە بي مەن قازىبەك بي كوشەلەرىنىڭ ارالىعىنداعى بولىگىن قورشاۋدى «قاراتاەۆ» جەكە كاسىپكەرلىگى قولعا العان. ولار دا جۇمىستىڭ جاقىن ارادا بىتەتىنىن ايتادى.
جامبىل وبلىسى