بۇل تۋرالى ورتالىق كوممۋنيكاتسيالار قىزمەتى الاڭىندا وتكەن ونلاين بريفينگتە Beeline قازاقستان باس اتقارۋشى ديرەكتورى ەۆگەني ناسترادين ايتتى.
«توتەنشە جاعداي رەجيمى ەنگىزىلگەن ساتتەن باستاپ Beeline جەلىسىندەگى ءموبيلدى ترافيكتى تۇتىنۋ ورتا ەسەپپەن 10%-عا ءوستى. بۇل اي سايىنعى ءوسۋ قارقىنىنان ءسال عانا ارتىق, ادەتتە اي سايىنعى ءوسۋ قارقىنى 5% دەڭگەيىندە بولاتىن. سونداي-اق ورنىقتى, ياعني سىمدى ينتەرنەت ترافيگى 30%-عا ءوستى. بۇل ورايدا, ترافيك ءبولۋ كارتاسى ءبىرشاما وزگەردى. ابونەنتتەرىمىز ۋاقىتىنىڭ باسىم بولىگىن ۇيدە وتكىزەدى. سايكەسىنشە, ورنىقتى ينتەرنەتكە قوسىلۋ مۇمكىندىگى بار جەرلەردە ءموبيلدى جەلىگە مۇلدە جۇك تۇسكەن جوق. ءبىز ادامداردىڭ قاشىقتان جۇمىس ىستەۋگە قالاي كوشكەنىن, ۋاقىتىنىڭ باسىم بولىگىن ۇيدە وتكىزە باستاعانىن جۇكتەمەدەن كوردىك», دەدى ەۆگەني ناسترادين.
وسى ورايدا ول Beeline كومپانياسىنىڭ توتەنشە جاعدايعا قاڭتار-اقپان ايلارىندا-اق دايىندىق جۇمىستارىن باستاپ كەتكەنىن اتاپ ءوتتى.
«قاڭتاردا ىندەت قىتايدا تارالا باستاپ, قاتاڭ كارانتين ەنگىزىلگەن كەزدە, تۇتىنۋشىلاردىڭ كوپتىگىنەن وپەراتورلار جەلىسىندەگى جۇكتەمەنىڭ قالاي وزگەرگەنىن كوردىك. قىتايداعى سەرىكتەستەرىمىز بولىپ جاتقان ىسكە شولۋ جاساپ, اقپاراتتارىن بىزبەن ءبولىستى. سوندىقتان قاڭتار-اقپان ايلارىندا-اق الدىن الۋ شارالارىن جاسادىق. ءموبيلدى جەلىدە دە, ورنىقتى بايلانىستا دا تىرەك جەلىسى كەڭەيتىلدى. تاسىمالداۋشى ارنالاردا سىيىمدىلىقتى ۇلعايتتىق. قۇرىلعان رەزەرۆ قازىر بىزگە جەتەدى. Beeline جەلىسىندە شامادان تىس جۇكتەمە, ايتارلىقتاي اپات تىركەلگەن جوق», دەدى ول.
سونداي-اق ول الداعى ۋاقىتتا ارتىق جۇك ءتۇسىپ, اقاۋلار ورىن الماس ءۇشىن, سىيىمدىلىقتىڭ ارتاتىنىن ايتتى.
«قازاقستانداعى بارلىق وپەراتورمەن بىرىگىپ, ءبىر جىلدىڭ ىشىندە 1000-نان استام ەلدى مەكەندى كەڭ جولاقتى ينتەرنەتپەن قامتۋدى جوسپارلاپ وتىرمىز. جوبا جۇزەگە اسىرىلا باستادى. ستۋدەنتتەر مەن وقۋشىلاردىڭ ءبىلىم بەرەتىن رەسۋرستارعا قوسىلۋىن قامتاماسىز ەتۋ ءۇشىن, بعم-عا ونلاين-وقۋدى ۇيىمداستىرۋعا قاتىستى تەحنيكالىق كەڭەستەرى بار حات ازىرلەدىك. قازاقستاندا 2,7 ميلليون وقۋشى مەن ميلليونعا جۋىق ستۋدەنت قاشىقتان وقۋعا كوشىرىلدى. 1 ءساۋىر كۇنى سىناقتاما تۇرىندە وتكەن ونلاين ساباقتار بارىسىندا Beeline جەلىسىندە اپات تىركەلگەن جوق. ءبىزدىڭ دەرەكتەر بويىنشا, وقۋعا جۇمىلدىرىلعان سەرۆيستەر جۇكتەمەنى كوتەرە المادى», دەدى ە.ناسترادين.