ەلدە توتەنشە جاعداي جاريالانعالى ينتەرنەتتىڭ ءليميتسىز ترافيگىن قوستىرۋعا ءوتىنىش بىلدىرۋشىلەر كوبەيگەن. بۇل تۋرالى «قازاقتەلەكوم» اق باسقارما توراعاسى قۋانىشبەك ەسەكەەۆ ايتتى.
ء«بىز قازىرگى ۋاقىتتا تۇرعىندار ءۇشىن تەلەكوممۋنيكاتسيا قىزمەتتەرىنىڭ الەۋمەتتىك ماڭىزدىلىعىن تۇسىنەمىز. سوندىقتان ءبىز قازاقستاندىقتاردىڭ بولاشاق قاجەتتىلىكتەرىن بولجاۋعا تىرىسامىز. قازىر ينتەرنەت, تەلەديدار, تەلەفونيا – جالپى كەز-كەلگەن بايلانىس قۇرالدارى وتە ماڭىزدى رولگە يە بولا باستادى. كارانتينگە بايلانىستى, بەكىتىلگەن ينتەرنەتتىڭ ءليميتسىز ترافيگىن قوستىرۋعا وتىنىشتەر سانى ايتارلىقتاي كوبەيدى. بۇرىن تۇرعىندار, ءموبيلدى ينتەرنەتكە كوشىپ, بۇل قىزمەت ءتۇرىن قاجەتسىز دەپ اجىراتقان بولسا دا, قازىر وسى قىزمەتتى قايتا قوستىرۋعا ءوتىنىش بەرۋدە. وتىنىشتەردىڭ كوپتىگىن ەسكەرە وتىرىپ, ءبىزدىڭ ورناتۋ قىزمەتتەرىمىزدىڭ جۇمىسى بىرنەشە كۇن بۇرىن الدىن-الا جوسپارلانعان», دەدى «قازاقتەلەكوم» اق باسقارما توراعاسى قۋانىشبەك ەسەكەەۆ.
بەلگىلى بولعانداي, «قازاقتەلەكوم» تەلەكوممۋنيكاتسيا قىزمەتتەرىن ۇسىنۋدىڭ جەڭىلدەتىلگەن رەجيمىنە كوشكەن. تەلەفون, ينتەرنەت جانە اقىلى تەلەديدار قىزمەتىنىڭ اقىسىن ۋاقىتىلى تولەمەگەن جاعدايدا ابونەنتتىڭ بايلانىسى وشىرىلمەيدى.
«تەلەفون, ينتەرنەت جانە اقىلى تەلەديدار قىزمەتىنىڭ اقىسىن ۋاقىتىلى تولەمەگەن ابونەنتتەر ءۇشىن بايلانىستى وشىرمەۋ تۋرالى شەشىم قابىلدادىق. بۇل قادام كارانتيننىڭ ساقتالۋىنا ىقپال ەتەتىنىن تۇسىنەمىز. بىزدە ءالى دە كليەنتتەرمەن تىكەلەي جۇمىس ىستەيتىن بىرقاتار قىزمەتكەرلەر ادەتتەگى جۇمىسىن جالعاستىرۋدا. بارىنەن بۇرىن, جەلىنى ورناتۋمەن جانە وعان قىزمەت كورسەتۋمەن اينالىساتىن تەحنيكالىق قىزمەتكەرلەردىڭ جۇكتەمەسى ارتتى. ايتپاقشى, ولار وزدەرىن قاۋىپسىزدىك جاعىنان جابدىقتاپ قانا قويماي, تۇتىنۋشىلارعا ماسكا كيۋ كەرەك ەكەنىن ەسكەرتەدى - ونسىز ءبىزدىڭ قىزمەتكەرلەر پاتەرگە كىرمەيدى», دەدى ول.