ءبيللدىڭ بولجامى اقيقاتقا اينالدى

پاندەميانىڭ شارتاراپقا تيگىزەتىن زيانى تۋرالى بيلل گەيتس وسىدان 10 جىل بۇرىن العاش رەت مالىمدەگەن-ءدى. ول ءوزىنىڭ جەكە بلوگىندا  «شوشقا تۇماۋىنىڭ» ەپيدەمياسىنان كەيىن وسى ماسەلەگە نازار اۋدارىپ, الەم مۇنداي داعدارىسقا دايىن ەمەس دەپ كەسىپ ايتتى. ونىڭ پىكىرىنشە, «شوشقا تۇماۋى» ەپيدەمياسى كەزىندە ادامزاتقا ساتتىلىك جولداس بولدى. سونداي-اق بيلل گەيتس الداعى ۋاقىتتا مۇنداي ىن­دەتتىڭ تارالۋى كوبەيە بەرە­تىنىن ەسكەرتىپ, دەنساۋلىق ساق­تاۋ سالاسىنا ىجداعاتپەن قا­را­ۋ­دىڭ ماڭىزىنا ەكپىن بەرگەن ەدى.

بەس جىلدان كەيىن بيلل گەيتس بۇل ماسەلەگە تاعى دا توقتالدى. 2015 جىلى ۆانكۋۆەردەگى TED Talk كونفەرەنتسياسى كەزىندە الەمنىڭ قاۋىپتى دەرتكە ءازىر ەمەس ەكەنىن تاعى ايتتى. «ەگەر الداعى ۋاقىتتا 10 ميلليون ادام ءبىر نارسەنىڭ سالدارىنان قازا تاپسا, ونىڭ سەبەبى سوعىس ەمەس, وتە جۇقپالى ۆيرۋس بولادى» دەپ ايتقانى ەسىمىزدە. ءدال سول كەزدە افريكا قۇرلىعى ەبولا ۆيرۋسىنان زارداپ شەگىپ, بۇكىل الەمگە قاۋىپ تونگەن-تۇعىن.  بيلل گەيتس وسى باستان قامدانباساق, كەلەسى ەپيدەميانىڭ اۋقىمى ەبولادان اسىپ تۇسەتىنىن بولجادى. «ادامدار جۇقپالى اۋرۋمەن ناۋقاستانسا دا, ءوزىن جاقسى سەزىنىپ, ۇشاققا ءمىنىپ, بازارعا بارۋىنا كەدەرگى كەلتىرمەيتىن ۆيرۋسقا تاپ كەلۋىمىز ىقتيمال», دەپتى TED Talk كونفەرەنتسياسىندا. ءبىر قىزىعى, بيلل گەيتستىڭ قاۋپى شىندىققا اينالدى.

بيلل گەيتس 2016 جىلى BBC ارناسىنا بەرگەن سۇحباتىندا كەز كەلگەن تۇماۋدىڭ ءتۇرى الەم ەلدەرىنىڭ اياعىن ءبىر ەتىككە تىعۋى ىقتيمال ەكەنىنە تاعى توقتالدى. ونىڭ پايىمداۋىن­شا, جاھاندىق دەنساۋلىق ساق­تاۋ جۇيەسى ەبولا مەن زيكا ۆيرۋستارى ەپيدەمياسى سياقتى ىندەتتىڭ تارالۋىنا جول بەر­مەۋ­گە دايىن ەمەس.

ميللياردەردىڭ بولجامى مۇنىمەن بىتپەيدى. 2017 جىلى ميۋنحەندەگى قاۋىپ­سىزدىك جونىندەگى كونفەرەنتسيادا جۇقپالى ىندەتتىڭ جاھاندىق سيپات الىپ كەتۋىنەن قاۋىپتەنەتىنىن جەتكىزدى. ونىڭ سوزىنە سۇيەنسەك, ەپيدەميولوگتار اۋا ارقىلى تارايتىن كەز كەلگەن ۆيرۋس ءبىر جىل ىشىن­دە 30 ميلليونعا جۋىق ادام­دى اجال قۇشتىرۋى مۇم­كىن ەكەنىن الدەقاشان ەسكەرتكەن. سونداي-اق مۇنداي قاۋىپتى دەرت الداعى 10-15 جىلدا بولۋى ىقتيمال دەپ مالىمدەدى. «يادرولىق سوعىس پەن كليماتتىڭ وزگەرۋى سەكى­ل­دى اسا قاتەرلى پاندەميا يەگى­مىزدىڭ استىندا تۇر. يادرولىق قارۋعا جانە اۋا رايىنىڭ كۇرت قۇبىلۋىنا جول بەرمەۋ سەكىلدى, جاھاندىق پاندەميانىڭ الدىن الۋ دا ماڭىزعا يە», دەپتى بيلل گەيتس.

ال 2018 جىلى ماسسا­چۋسەتس مەديا قوعامىنىڭ جىل سا­يىن­عى جيىنىندا دا الەم­نىڭ پاندەمياعا دايىن ەمەسى­نە تاعى ءبىر مارتە توق­تالدى. «تاريحتان ءتالىم الماعان­دىق­تان, كەلەشەكتە اسا قاتەرلى, جاھان­دىق پاندەميانى بولجاۋ قيىن ەمەس», دەدى ميللياردەر.

بيلل گەيتستىڭ دەنساۋلىق ساقتاۋ سالاسىنىڭ كەمشىلىگىنە ءجيى توقتالۋىنا تاڭعالۋدىڭ رەتى جوق. ميللياردەر – وسى باعىتقا ەڭ كوپ قارجى قۇيعان ساناۋلى ادامنىڭ ءبىرى. ول بۇۇ-نىڭ دۇنيەجۇزىلىك دەنساۋلىق ساقتاۋ ۇيىمىنا تالاي جىلدان بەرى قامقورلىق جاساپ كەلەدى. ءوزىڭىز ەسەپتەپ كورىڭىز. ددۇ-عا قارجىلاي كومەك جونىنەن اقش ءبىرىنشى ورىندا تۇرسا, بيلل گەيتس ەكىنشى ساتىعا جايعاسقان. ءبىر ادامنىڭ قۇيعان اقشاسى كوپ ەلدەن الدەقايدا ارتىق. ايتا كەتەرلىگى, بيلل مىرزا ددۇ-نىڭ دونورى رەتىندە سانالعان العاشقى جەكە ادام.

بيلل گەيتستىڭ مۇنشالىق­تى قايىرىمدىلىعى دۇنيە­جۇزىلىك دەنساۋلىق ساقتاۋ ۇيىمىنداعى بەدەلىن ارتتىرا تۇسكەنى انىق. سوندىقتان شىعار, ۇيىم باسشىلىعى ميللياردەردىڭ اقىل-كەڭەسىن تىڭدايتىنى ءجيى ايتىلاتىن. ءتىپتى, مۇنى سىناعاندار دا تابىلدى. اسىرەسە, بيلل گەيتستىڭ ۇسىنىسىمەن ددۇ پوليوميەليتپەن كۇرەسكە ەرەكشە كوڭىل بولگەنى دە سىنعا ۇشىرادى.

2017 جىلى ددۇ باسشىسىن سايلاۋ كەزىندە دە بيلل گەيتستىڭ ۇيىمعا ىقپالى تۋرالى ءجيى جازىلدى. ونىڭ ۇيىمنىڭ قازىرگى باس ديرەكتورى تەدروس ادانوم گەب­رەي­سۋستى قولدايتىنى دا تال­قى­لاندى. ايتسە دە, بيلل گەيتس­تىڭ ۇيىمى مۇنى جوققا شىعاردى.

قورىتا ايتقاندا, بيلل گەيتس تالاي جىلدان بەرى دەن­ساۋلىق ساقتاۋ سالاسىنا ەرەك­شە كوڭىل ءبولىپ كەلەدى. سون­­دىقتان ونىڭ الەمدىك پان­دە­ميا تۋرالى بولجام جاساۋىنا تاڭعالۋدىڭ رەتى جوق. ۆيرۋستان كەلەتىن قاۋىپتى باسقا-باسقا, Microsoft كومپانياسىنىڭ نەگىزىن سالعان بيلل گەيتس جاقسى تۇسىنسە كەرەك-ءتى...