بۇل تۋرالى كەشە ءتۇن اۋا رەسەيدىڭ ەنەرگەتيكا ءمينيسترى الەكساندر نوۆاك مالىمدەدى, دەپ حابارلادى رف ەنەرگەتيكا مينيسترلىگىنىڭ ءباسپاسوز ءبولىمى.
كەشە تۇندە ا. نوۆاك «روسسيا 24» تىلشىسىنە بەرگەن سۇحباتىندا كەلىسىمگە 23 ەل قاتىسقانىن ايتتى.
«بارلىعى مامىر جانە ماۋسىم ايلارىندا وپەك جانە وعان ەنبەيتىن ەلدەر ءوندىرىستى تاۋلىگىنە 10 ميلليون باررەلگە قىسقارتۋعا كەلىستى. كەلەسى جارتى جىل ىشىندە ءبىز ءوندىرىستى تاۋلىگىنە 8 ميلليون باررەلگە دەيىن قىسقارتامىز. بۇل كەلىسىم ەكى جىلعا جارامدى, 2021 جىلى كەلىسىمدەگى پارامەترلەر تاۋلىگىنە 6 ميلليون باررەل دەڭگەيىندە بەلگىلەندى», دەپ ءتۇسىندىردى ا. نوۆاك.
ا. نوۆاكتىڭ ايتۋىنشا كەلىسىم 2022 جىلدىڭ 1 مامىرىنا دەيىن جارامدى.
«ەكى جىل – بۇل نارىق ءۇشىن سۇرانىس پەن ۇسىنىستىڭ تەپە-تەڭدىگىن قالپىنا كەلتىرۋدىڭ ماڭىزدى نيەتى تۋرالى سيگنال بەرەتىن ەڭ ءتيىمدى كەزەڭ ەكەندىگى تۋرالى كەلىسىمگە كەلدىك. بۇل كەزەڭدى ۇزارتۋعا, نارىق تەزىرەك قالپىنا كەلگەن جاعدايدا, ءوندىرىستى قىسقا مەرزىمدە قالپىنا كەلتىرۋ تۋرالى شەشىم قابىلداندى», – دەپ تولىقتىردى نوۆاك.
سونىمەن بىرگە, تاسس-تىڭ حابارلاۋىنشا, امەريكا قۇراما شتاتتارى مەكسيكاعا مۇناي ءوندىرىسىن ازايتۋعا كومەكتەسەدى. وڭتۇستىك امەريكا ەلى ءوندىرىستى تاۋلىگىنە 100 مىڭ باررەلگە, ال امەريكا قۇراما شتاتتارى كۇنىنە 250 مىڭ باررەلگە قىسقارتادى. جالپى, سولتۇستىك امەريكا ەلى قارا التىن ءوندىرىسىن تاۋلىگىنە 2 ميلليون باررەلگە ازايتۋدى جوسپارلاپ وتىر.
G20 كەلىسسوزدەرى اياسىندا Brent ماركالى مۇناي باعاسى ساۋدانىڭ جابىلۋىندا 31,82 دوللاردى قۇرادى. الايدا, كەشكە باعالارى باررەلىنە 35 دوللاردان جوعارى كوتەرىلدى, بىراق كوپ ۇزاماي ورتاشا دەڭگەيگە قايتا ورالدى. سونىمەن بىرگە, وپەك باس حاتشىسى موحاممەد باركيندو بولجامى بويىنشا, ساۋىردە الەمدە مۇناي تۇتىنۋ كۇنىنە 20 ميلليون باررەلگە دەيىن رەكوردتىق دەڭگەيدە تومەندەيدى. 2020 جىلعا قاراي ورتاشا جىلدىق قۇلدىراۋ تاۋلىگىنە 7 ميلليون باررەل بولادى.
وپەك مالىمەتتەرى بويىنشا, مۇناي قورى ماكسيمالدى 3900 ملن باررەل دەڭگەيىندە كوبەيەدى دەگەن بولجام بار. جىلدىڭ اياعىندا ولاردىڭ دەڭگەيى 3700 ميلليون باررەلدەن اسۋى مۇمكىن.
بۇعان دەيىن باس حاتشى باركيندو مۇنايعا سۇرانىستىڭ بۇرىن-سوڭدى بولماعان تومەندەۋىن بولجاعان بولاتىن. سول كۇنى وپەك + ەلدەرى ءوندىرىستى قىسقارتۋ تۋرالى كەلىسىمدى 10 ساۋىرگە دەيىن كەيىنگە قالدىردى. وعان مەكسيكانىڭ ءوندىرىستى تاۋلىگىنە 400 مىڭ باررەلگە قىسقارتۋ تۋرالى كەلىسپەۋشىلىگى سەبەپ بولدى. الايدا, الدىن الا كەلىسىم بويىنشا, ەلدەر ءوندىرىستى تاۋلىگىنە 10 ميلليون باررەلگە قىسقارتا الادى.