كوروناۆيرۋس ينفەكتسياسىنا بايلانىستى قابىلدانعان ساقتىق شارالارى نەگىزىندە الدىمەن ماڭعىستاۋ وبلىسىندا بىرقاتار شەكتەۋ شاراسى ەنگىزىلدى. ودان سوڭ كوپ ۇزاماي كارانتين ەنگىزىلىپ, ەندى 6 ساۋىردەن باستاپ كۇشەيتىلمەك. وعان الەمدەگى, ەلىمىزدەگى جانە وڭىرىمىزدەگى اتالعان ينفەكتسيانىڭ تارالۋ اۋقىمى سەبەپ.
حالىققا شەكتەۋ قويىلعان قىزمەتتەر تىزبەسى مەن جول قاتىناسى قوزعالىسى تۋرالى مالىمەتتەر ۇسىنىلىپ الدىن الا حابارلاندى. مەنشىك نىسانىنا قاراي ءار ساۋدا نۇكتەسىنىڭ, قىزمەت كورسەت ورتالىقتارىنىڭ جانە ءتۇرلى كەڭسە-عيماراتتاردىڭ جۇمىسى رەتتەلدى. ادامدارعا قاجەتتى ازىق-ت ۇلىك دۇكەندەرى مەن ءدارىحانالار جۇمىسىنا رۇقسات ەتىلدى.
بىراق, قالا ىرگەسىندەگى اۋىل تۇرعىندارى ءۇشىن قولدارىنداعى ازىن-اۋلاق مالدارى مەن قۇستارىنىڭ ازىعىن تاۋىپ بەرۋ كۇردەلى ماسەلەگە اينالىپ شىعا كەلدى. تۇپقاراعان اۋدانىنا قاراستى اقشۇقىر, سايىن اۋىلدارىندا جەم-ءشوپ ساتاتىن بارلىق ساۋدا ورىندارى كارانتينگە جابىلعاندىقتان تۇرعىندار تىعىرىققا تىرەلىپ وتىر. ولار ارنايى مالشىسى ورىسكە شىعاراتىنداي وتار قوي نەمەسە ءىرى شارۋاشىلىق ەمەس – ءار ۇيدەگى بەس-التى جاندىق, ءبىر-ەكى ءىرى-قارا جانە از-ماز ۇيرەك, قاز, تاۋىق سىندى قۇس تۇرلەرى. كارانتين كەزىندە اۋىل ادامدارىنىڭ تۇس-تۇستان تىراعايلاتىپ قۇس قۋىپ, اندىزداپ ورىسكە مال ايداپ بارا جاتۋى دا ورىندى ەمەس. ونىڭ ۇستىنە اعىندى سۋى جوق وڭىردە قۇس بالاسى اۋلادا, ۇنەمى ءۇي ماڭىندا بولادى. وعان قازىر قىستىڭ قۇرساۋىنان كەشە قۇتىلعانمەن سىزى ءالى سەيىلىپ ۇلگەرمەگەن دالادا مال ەزۋىن جارىتىپ, قارنىن قامپايتاتىن كوكتىڭ ءوسىپ-جەتىلە قالماعانى تاعى بار.
- اقشۇقىر, سايىن اۋىلدارىنداعى مالعا جەم ساتاتىن ساۋدا ورىندارىن تۇگەل جاپتىرعان. ەلدەگى جاعدايدى, ىندەتتى, كارانتيندى تولىق تۇسىنەمىز, بىراق جاعدايدى جان-جاقتى ويلاستىرۋ كەرەك قوي, ءتىپتى جەتكىزىپ بەرۋ ماسەلەسىن جولعا قويسا دا جاقسى بولار ەدى. حالىق نە ىستەۋى كەرەك - مالدارىن دالاعا شىعارۋعا بولمايدى, قورادا جەم جوق. اۋىلدىق جەر ءۇشىن وسى جاعدايلار ناقتىلانىپ قارالعانى دۇرىس. قۇزىرلى ورىنداردان كومەك سۇرايمىز, جاعدايدىڭ قيىن ەكەندىگىن تۇسىنەمىز, بىراق كارانتيننەن سوڭ دا ولمەگەن جانعا ءومىر بار, تىرلىگىنىڭ وزەگى بولعان مال-قۇستىڭ دا جايىن تاسادا قالدىرۋعا بولمايدى, - دەيدى اۋىل تۇرعىندارى.
سونىمەن, ماڭعىستاۋدا «جەم-ءشوبى جوق, ءورىس جوق, مالدار قايتىپ كۇن كورەر؟» دەگەندەي, قوراسىنا مال ۇستاعان اعايىن ابدىراپ وتىر. «قىستىڭ كوزى قىراۋدا» دەپ مال ازىعىن ارتىعىمەن جيناپ قوياتىن قىس مەزگىلى ەمەس, جەر اياعى كەڭي باستاعان مامىراجاي شاق, الدى جاز بولعان سوڭ قامدانباي قالعان مالدى جۇرتتىڭ مازاسىن قاشىرعان ماسەلە وسى بولىپ تۇر.
ماڭعىستاۋ وبلىسى