بيىلعى, ياعني 2020 جىلدىڭ 31 ناۋرىزىنا دەيىن مەديتسينالىق ساقتاندىرۋ قورىنا 298,1 ملرد تەڭگەدەن استام قارجى جيناقتالدى. بۇل تۋرالى بۇگىن «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى وكىلدەرى حابارلادى.
«الماتى قالاسى رەسپۋبليكا بويىنشا جارنالار مەن اۋدارىمداردىڭ كولەمى جاعىنان كوش باستاپ تۇر – جيناقتالعان سومانىڭ بەستەن ءبىر بولىگى بۇرىنعىشا, وڭتۇستىك استانالىقتارعا تيەسىلى. جالپى, ساقتاندىرۋ جۇيەسى ىسكە قوسىلعان 2017 جىلدىڭ 1 شىلدەسىنەن 2020 جىلدىڭ 31-ناۋرىزىنادەيىنگى ارالىقتا الماتى قالاسىنان قورعا 60 ملرد تەڭگەدەن استام جارنا اۋدارىلدى. ونىڭ 54,7 ملرد تەڭگەسى – جۇمىس بەرۋشىلەردىڭ قاراماعىنداعى جۇمىسكەرلەر ءۇشىن جاساعان اۋدارىمدارى», - دەدى «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى نۇرلىبەك قابدىقاپاروۆ.
سونداي-اق جىل باسىنان بەرى ءوزىن-ءوزى جۇمىسپەن قامتىعان 10 مىڭعا جۋىق ادام 40,1 ملن تەڭگە كولەمىندە بىرىڭعاي جيىنتىق تولەم تولەگەن.
ەستەرىڭىزگە سالا كەتسەك, بىرىڭعاي جيىنتىق تولەم 2019 جىلدىڭ 1 قاڭتارىنان باستاپ ەنگىزىلگەن بولاتىن. جيىنتىق تولەمنىڭ ىشىندە وزگە الەۋمەتتىك تولەمدەرگە قوسا ساقتاندىرۋ جارناسى دا بار. ول جالپى سومانىڭ 40 پروتسەنتىن قۇرايدى.
بجت – رەسپۋبليكالىق ماڭىزى بار قالالار ءۇشىن 1 ايلىق ەسەپتىك كورسەتكىش (اەك) نەمەسە 2651 تەڭگە, اۋىلدىق جەرلەر ءۇشىن – 0,5 اەك نەمەسە 1326 تەڭگە كولەمىندە بەلگىلەنگەن. تولەمنىڭ بۇل ءتۇرىن فريلانسەرلەر, سانتەحنيكتەر, قۇرىلىسشىلار, تاكسي جۇرگىزۋشىلەرى ت.ب. تولەي الادى.