بۇرىن-سوڭدى بولماعان جاھاندىق توتەنشە جاعدايدا بالالاردىڭ ۋاقىتىن ءتيىمدى پايدالانۋ دا وزەكتى جايتتەردىڭ قاتارىن كوتەرىلدى. بالانىڭ كوڭىلىن ونەرمەن, بىلىممەن اۋلاۋ بارىنەن دە كوكەيكەستى بولىپ تۇر.
وسىعان وراي, قازاقستاندا «جانۋارلار – مەنىڭ دوستارىم» اتتى سۋرەت سالۋدان رەسپۋبليكالىق بالالار بايقاۋى باستالدى. بىردەن ايتا كەتۋ كەرەك, بۇل بايقاۋ الەمدىك ىندەت باستالماي تۇرىپ-اق, قولعا الىنعان-دى. الدىن الا جوسپارلانعانادي, جەڭىمپاز بالالار ۆەناعا بارا الا ما؟ ول ۋاقىتتىڭ ەنشىسىندە.
سونىمەن 1 ساۋىردەن باستاپ 6-17 جاس ارالىعىنداعى بالالار مەن جاسوسپىرىمدەر ءوز تۋىندىلارىن بايقاۋعا جىبەرە الادى.
تۋىندىدا بەينەلەۋ ونەرىنىڭ كەز كەلگەن تەحنيكاسىن: كوركەم سۋرەت, گرافيكا, اپپليكاتسيا, كوللاج, كومپيۋتەرلىك گرافيكانى قولدانۋعا بولادى. باستى شارت – اۆتورلىق ءارى تۇپنۇسقادا تاپسىرىلعان جۇمىستىڭ بولۋى. بايقاۋعا قاتىسۋشى ءۇش كومپوزيتسياعا دەيىن ۇسىنا الادى. كوركەم تۋىندىعا ەسسە جازسا, قۇبا-قۇپ. وتىنىشتەر 2020 جىلدىڭ 30 ماۋسىمىنا دەيىن قابىلدانادى.
– كونكۋرس وتكىزۋ يدەياسىن بالالاردىڭ وزدەرى كارانتين باستالماي تۇرىپ ۇسىنعان. نەگە دەسەڭىز, ولار ۇلكەندەردىڭ ءۇي جانۋارىنا قاتىگەزدىك تانىتىپ, جابايى تابيعاتتى ماقساتسىز جويۋ ارەكەتىنە بەي-جاي قارامايدى, ءتىپتى كوبىنە جۇرەكتەرى اۋىرادى. وسى ورايدا اتالعان بايقاۋ جاس بۋىننىڭ دۇنيەجۇزىلىك بيولوگيالىق تەپە-تەڭدىكتى ساقتاۋ ماسەلەسىنە قاتىستى جەكە پىكىرىن بىلدىرۋگە مۇمكىندىك بەرىپ, كارانتيندە وتىرعان ۋاقىتتى پايدالى وتكىزۋگە كومەكتەسەدى, - دەيدى باستاما يەسى قر بالا قۇقىعى جونىندەگى ۋاكىل ارۋجان ساين.
بايقاۋعا «Edu Stream» كومپانياسى ۇسىنعان باستى سىيلىق – ۆەنادا وتەتىن بالالار سۋرەتىنىڭ كوركەمونەر كورمەسىنە قاتىسۋ (COVID 19 پاندەمياسى اياقتالعاندا). سونداي-اق, جەڭىمپازدار قر مادەنيەت جانە سپورت مينيسترلىگىنەن ديپلوم مەن باعالى سىيلىق يەلەنەدى, جوبا سەرىكتەسى «ناستوياششي بۋراتينو» ساۋدا ماركاسىنان دا ىنتالاندىرۋ سىيلىعى بولادى. توپ جارعانداردىڭ تۋىندىسى قازاقستاننىڭ بارلىق ايماعىندا كوشەگە بيلبوردقا ىلىنەدى. بارلىق قاتىسۋشى ەلەكتروندىق ديپلوم يەلەنەدى.
بالالاردىڭ ەڭبەگىن ۇيىمداستىرۋشىلار مەن قازاقستاننىڭ بەدەلدى مادەنيەت جانە ونەر قايراتكەرلەرىنەن قۇرالعان ءادىل قازىلار القاسى باعالايدى. جەڭىمپازدار ءتورت جاس دەڭگەيى بويىنشا انىقتالادى. بايقاۋ ناتيجەسى 2020 جىلدىڭ 5 شىلدەسى جاريالانادى. توپ جارعان ونەرلى بالالاردى سالتاناتتى تۇردە ماراپاتتاۋ شاراسى الماتىدا جازدىڭ سوڭىنا قاراي وتەدى.
كونكۋرس قازاقستان پرەزيدەنتىنىڭ قامقورلىعىمەن, بۇۇ قورشاعان ورتانى قورعاۋ باعدارلاماسىنىڭ دۇنيەجۇزىلىك قورشاعان ورتانى قورعاۋ كۇنى اياسىندا, ءبىلىم جانە عىلىم مينيسترلىگى, مادەنيەت جانە سپورت مينيسترلىگىنىڭ قولداۋىمەن, «بالالار الەمدى بەينەلەيدى» قوعامدىق قورى, باس سەرىكتەس «Edu Stream» كومپانياسى مەن «ناستوياششي بۋراتينو» سەرىكتەسىنىڭ قاتىسۋىمەن وتەدى.
تۋىندىنى تۇپنۇسقادا مىنا پوشتالىق ادرەسكە: قازاقستان رەسپۋبليكاسى, الماتى ق., 050026, م. اۋەزوۆ كوش., 14ا. «بالالار الەمدى بەينەلەيدى» قوعامدىق قورى, «جانۋارلار – مەنىڭ دوستارىم» بايقاۋىنا جىبەرۋ كەرەك. سونداي-اق ەلەكتروندىق پوشتا: alembala.kz@gmail.com. تولىق اقپارات www.alembala.kz سايتىندا.