- مەديتسينا قىزمەتكەرلەرى ەپيدەميامەن كۇرەس بارىسىندا كەيدە جۇمىستا قالىپ جاساۋعا تۋرا كەلەدى. ولاردىڭ دا وتباسىلارى بار, بىرەۋىندە قارتتارى ەندى بىرەۋلەردە كىشكەنتاي بالالارى بار. ءبىزدىڭ قىزمەتكەرلەرگە قولداۋ كورسەتىپ جاتقاندارعا العىسىمىز شەكسىز, اسىرەسە ءۇش مەزگىل ىستىق تاماقپەن قامتاماسىز ەتۋدى ۇيىمداستىرعان شاعىن جانە ورتا بيزنەس وكىلدەرىنە. سونىمەن قاتار تەحنيكالىق قىزمەت كورسەتۋ سەرۆيسىنىڭ جەتەكشىسى راۋف اليەۆ جەدەل جاردەم ستانتسياسىنىڭ كولىكتەرىن تەگىن جوندەۋگە قول ۇشىن بەردى. كومەك قولىن سوزۋدان اقتاۋ حالىقارالىق اۋەجايى دا شەت قالمادى. ال, «ماڭعىستاۋمۇنايگاز» كومپانياسى جەدەل جاردەم قىزمەتىنە ەكى اۆتوكولىك ءبولدى. قولداۋ كورسەتۋشىلەردىڭ بارلىعىن ءتىزىپ ايتۋ مۇمكىن ەمەس, - دەيدى ماڭعىستاۋ وبلىسى دەنە ساقتاۋ باسقارماسى باسشىسىنىڭ ورىنباسارى ءلاززات ەسەنعاليەۆا.
قازىر مەديكتەر ەكى ەسە قيىندىقتى سەزىنۋدە, سەبەبى ولارعا فيزيكالىقتان بولەك پسيحولوگيالىق سالماق ءتۇسىپ وتىر. اق حالاتتىلاردى قولداۋعا يمانعازى دوسمۇحامەدوۆ باستاعان ء«بىز ادامدار - ءبىز بىرگەمىز» قايىرىمدىلىق قورىنىڭ كومانداسى كىرىسىپ كەتتى.
- ءبىزدىڭ ەرىكتىلەر تاتتىلەر مەن ىستىق تاماقپەن قامتۋدى قولعا الدى. بۇل ۋاقىتشا قيىندىق دەپ ويلايمىن. قازىر بارشامىز دارىگەرلەرگە قولداۋ ءبىلدىرۋىمىز كەرەك, - دەيدى يمانعازى يبات ۇلى.