بۇدان بۇرىن مەكتەپتەردە قاشىقتىقتان وقىتۋ ءۇشىن تەحنيكالىق دايىندىق بولماعان, ينتەرنەت پلاتفورمالاردا دايىن ەمەس, ۇستازداردىڭ ءۇي جاعدايىندا وقىتۋعا دايىندىعى جوق, سونداي-اق ينتەرنەت ماسەلەسى تاعى بار.
تۋىنداعان جاعدايعا بايلانىستى قازىر وڭىردە ينتەرنەت جىلدامدىعىن ارتتىرۋ نەمەسە ينتەرنەت جوق ەلدى مەكەندەرگە ينتەرنەت جۇرگىزۋ ءۇشىن ينتەرنەت پروۆايدەرلەرمەن كەلىسسوزدەر جۇرگىزىلۋدە. جۋىردا وسى ماقساتتا وبلىس اكىمى جانىندا جينالىس وتكىزىلىپ, ولارعا ناقتى تاپسىرمالار بەرىلدى. ناتيجەسىندە قاشىقتىقتان وقىتۋ ءۇشىن ەنگىزىلگەن ەلەكتروندى ءبىلىم بەرۋ پلاتفورمالارىن پايدالانۋ كەزىندە ينتەرنەت ترافيك اقىسىز, تەگىن جۇزەگە اسىرىلادى.
سونىمەن قاتار ينتەرنەت جوق ەلدى مەكەندەرگە ينتەرنەت تارتۋ جۇمىستارى جەدەلدەتىلدى. ەكىنشى قيىندىق - ماتەريالدىق-تەحنيكالىق قامتاماسىز ەتۋ. بۇدان باسقا, قاشىقتىقتان وقىتۋ ءۇشىن وقۋشىلار مەن مۇعالىمدەرگە تەحنيكالىق قۇرىلعىلاردىڭ (كومپيۋتەر, نوۋتبۋك, پلانشەت, ۇيالى تەلەفون) جەتكىلىكسىزدىگى ماسەلەلەرى بار. جۇرگىزىلگەن مونيتورينگ ناتيجەسىندە 6706 وقۋشىعا نەمەسە جالپى وقۋشى سانىنىڭ 5% -نا ەلەكتروندىق قۇرىلعىلار جەتىسپەيدى. بۇگىنگى تاڭدا, 1096 مۇعالىمگە, 548 وقۋشىعا مەكتەپ كومپيۋتەرلەرى ۋاقىتشا پايدالانۋعا بەرىلدى. بۇل جۇمىس 6 ساۋىرگە دەيىن جالعاسادى. ماسەلەنى شەشۋ ءۇشىن مەكتەپتەر ءوز بالانستارىنداعى قۇرىلعىلاردى ۋاقىتشا پايدالانۋعا بەردى. بۇدان باسقا, 31 ناۋرىزدان باستاپ ء«بىز قاشىقتىقتان وقىتۋدا قولداۋ كورسەتەمىز» تاقىرىبىندا اكتسيا باستادىق. اكتسيا اياسىندا جەكە كاسىپكەرلەر, مەتسەناتتار, ءتۇرلى قورلار بالالارعا ەلەكتروندى قۇرىلعىلاردى سىيعا تارتادى.
اكتسيا جاريالانعان ءبىرىنشى كۇنى اقتاۋ قالاسىندا 2 بالاعا سمارتفون, 2 بالاعا تەلەديدار, جاڭاوزەن قالاسىندا 3 بالاعا (2 پلانشەت, 1 روۋتەر), قاراقيا اۋدانىندا 3 بالاعا سمارتفون, 10 بالاعا ينتەرنەت-تاريف, مۇنايلى اۋدانىندا 4 بالاعا 3 پلانشەت, 1 سمارتفون, تۇپقاراعان اۋدانىندا 3 بالاعا سمارتفون, 1 وقۋشىعا تەلەديدار سىيعا تارتىلدى. بارلىعى 18 بالا. اۋداندىق, قالالىق ءبىلىم بولىمدەرى جانىنان CALL ورتالىقتارى قۇرىلدى. سەبەبى, وبلىس كولەمىندە 140 مىڭعا جۋىق وقۋشى, 20 مىڭعا جۋىق كوللەدج ستۋدەنتتەرى مەن 15 مىڭعا جۋىق پەداگوگتاردا قاشىقتىقتان وقىتۋ بارىسىندا كوپتەگەن سۇراقتار تۋىنداۋدا.
سونداي-اق قاراقيا اۋدانى, اققۇدىق ورتالاۋ مەكتەبىنىڭ وقۋشىلارى شتاتتىق رەجيمدە مەكتەپتە وقىتۋ مۇمكىندىكتەرى قارالۋدا. سەبەبى ول مەكتەپتەردە وقۋشى سانى از. ءۇشىنشى ماسەلە - وقىتۋ ساپاسى مەن مازمۇنى. بۇل بويىنشا 31 ناۋرىزدا ءبىلىم جانە عىلىم ءمينيسترىنىڭ «پاندەميا كەزەڭىندە ءبىلىم بەرۋ ۇيىمدارىندا, COVID-19 كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى شارالاردى كۇشەيتۋ تۋرالى» №121 بۇيرىعى شىقتى. بۇيرىقتا بالاباقشالار, مەكتەپتەر, قوسىمشا ءبىلىم بەرۋ, ارنايى ءبىلىم بەرۋ, كوللەدجدەردە قاشىقتىقتان وقىتۋدىڭ ادىستەمەلىك ۇسىنىمدار بەرىلگەن.
بۇيرىققا سايكەس مينيسترلىك وسى جۇمىستاردى 4 باعىتتا ۇيىمداستىرۋدى جوسپارلاپ وتىر. ونىڭ ءبىرىنشىسى, «EL ARNA», «balapan» تەلەارنالارى ارقىلى قازاق جانە ورىس تىلدەرىندە ترانسلياتسيالار جىبەرۋ. بۇل ساباقتار كۇنىنە 8 ساعاتتى قاتيتىن تۇسىلىمدەردەن تۇرادى, جالپى ءتورتىنشى توقسانعا 3300 ساعاتتىق تۇسىرىلىمدەر ازىرلەنەدى. ەكىنشى باعىت بۇل «قازاق راديوسى» ارناسى ارقىلى كەستە بويىنشا ساباقتار جۇرگىزۋ.ءۇشىنشى, شالعاي ەلدى مەكەندەردە وقۋ ماتەريالدارىنىڭ سىلتەمەلەرى ءبىلىم الۋشىنىڭ مەكەنجايىنا جاقىن ورنالاسقان «قازپوشتا» بولىمىنە جولدانادى. ال ءتورتىنشى باعىت جانە نەگىزگى باعىت بۇل ارنايى ازىرلەنگەن ينتەرنەت پلاتفورمالار. بۇل ماقساتتا قازىرگى كەزدە تسيفرلىق رەسۋرستاردا ساباقتار ازىرلەندى. ەندى ۇستازداردىڭ وسى پلاتفورمالارمەن جۇمىس جاساۋى ماڭىزدى. دايىندىق جۇمىستارىن سىناپ كورۋ ءۇشىن 1 ساۋىردەن سىناما ساباقتار باستالادى. مۇعالىمدەر وزدەرىنىڭ ساباقتارىن قالاي قوسىلاتىنىن تەكسەرەتىن بولادى.
2 ساۋىردە ەلەكتروندىق پلاتفورمالاردا اتا-انالار جينالىستارى بولادى. ول جەردە اتا-انالارعا بالالارمەن جۇمىستى قالاي ۇيىمداستىرۋ مەن قالاي ساباقتارعا قوسىلۋ كەرەكتىگى تۇسىندىرىلەدى. 3 ءساۋىر كۇنى سىنىپ ساعاتتارى جۇرگىزىلەدى, بۇل جەردە دە قاشىقتىقتان ساباق وقۋدىڭ ەرەكشەلىكتەرى تۇسىندىرىلەدى. 6 ساۋىرگە تولىق دايىن بولۋ ءۇشىن ءبىلىم بەرۋ سالاسىندا كورسەتىلگەن باعىتتا جۇمىستار اتقارىلۋدا.