بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە «ماڭعىستاۋ» تەمىرجول ۆوكزالىنىڭ باسشىسى الما ايىمقۇلوۆا حابارلادى.
20 ناۋرىزدان باستاپ نۇر-سۇلتان جانە الماتى قالالارىندا كارانتين ەنگىزىلگەنىنە بايلانىستى, «ماڭعىشلاق – نۇرسۇلتان» باعىتىنداعى پويىزىنىڭ سوڭعى بەكەتى بولىپ اتباسار بەلگىلەنسە, «ماڭعىشلاق – الماتى» باعىتىنداعى جولاۋشىلار پويىزى تەك شۋ بەكەتىنە دەيىن ءجۇردى. اتالعان باعىتتار 30 ناۋرىز كۇنى جولاۋشىلاردى تاسۋدى توقتاتتى.
سونداي-اق, جەرگىلىكتى «ماڭعىستاۋ – بەينەۋ» باعىتىنداعى پويىز دا 30 ناۋرىز كۇنى سوڭعى رەت جونەلتىلدى. ايتا كەتەيىك, 1 ساۋىردەن باستاپ ماڭعىستاۋدان اتىراۋ, اقتوبە قالالارىنا قاتىنايتىن بارلىق پويىزدار توقتايدى.
ءوز كەزەگىندە, الما ايىمقۇلوۆا توتەنشە جاعداي اياسىندا ۆوكزالدىڭ جۇمىس ىستەۋ ءتارتىبىن, ساقتىق شارالارىن ايتىپ ءوتتى. كەلىپ-كەتۋشى جولاۋشىلاردىڭ بارلىعىن ەكپيدەميولوگتار ارنايى قۇرال-جابدىقتارمەن, تەپلوۆيزورلارمەن تەكسەرەتىنىن مالىمدەدى.
- وسى كۇنگە دەيىن ۆوكزالدا كوروناۆيرۋستىق ينفەكتسيا انىقتالعان جوق. قىزمەتكەرلەرىمىز بەن جولاۋشىلاردىڭ قاۋىپسىزدىگى ءتيىستى مامانداردىڭ ءجىتى باقىلاۋىندا, - دەدى الما ايىمقۇلوۆا.
ماڭعىستاۋ وبلىسى