بۇگىن ءماجىلىستىڭ جالپى وتىرىسىندا پارلامەنت ءماجىلىسىنىڭ دەپۋتاتى گۇلشارا ابدىقالىقوۆانىڭ وكىلەتتىگى مەرزىمىنەن بۇرىن توقتاتىلدى.
جيىندا پارلامەنت ءماجىلىسى اپپاراتىنىڭ باسشىسى سەرىك ايداربەكوۆ 28 ناۋرىزدا پرەزيدەنت جارلىعىمەن گۇلشارا ناۋشاقىزى ابدىقالىقوۆانىڭ قىزىلوردا وبلىسىنىڭ اكىمى بولىپ تاعايىندالۋىنا بايلانىستى ورتالىق سايلاۋ كوميسسياسىنان تۇسكەن ۇسىنىمدى وقىپ بەردى.
«ورتالىق سايلاۋ كوميسسياسى قازاقستان رەسپۋبليكاسى كونستيتۋتسياسىنىڭ 52-ءشى بابىنا, پارلامەنت جانە ونىڭ دەپۋتاتتارىنىڭ ۇلەسى تۋرالى 1995 جىلعى 16 قازانداعى قر كونستيتۋتسياسى زاڭىنىڭ 24-بابى ەكىنشى, ءۇشىنشى جانە سەگىزىنشى تارماقتارىنا سايكەس پرەزيدەنتتىڭ گۇلشارا ناۋشاقىزى ابدىقالىقوۆانىڭ قىزىلوردا وبلىسىنىڭ اكىمى قىزمەتىنە تاعايىنداۋ تۋرالى 2020 جىلعى 28 ناۋرىزداعى №295-ءشى جارلىعى نەگىزىندە پارلامەنت ءماجىلىسىنىڭ دەپۋتاتى گۇلشارا ناۋشاقىزى ابدىقالىقوۆانىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەنى شەشۋ ءۇشىن ۇسىنىم ەنگىزىپ وتىر», دەدى سەرىك ايداربەكوۆ.
بۇدان سوڭ جالپى وتىرىسقا قاتىسقان دەپۋتاتتار اتالعان ۇسىنىستى ءبىراۋىزدان قابىلدادى.
ء«بىزدىڭ ارىپتەسىمىز گۇلشارا ناۋشاقىزى وسىعان دەيىن ۇلكەن قىزمەت جولىنان ءوتتى. كوپتەگەن لاۋىزىمدى جۇمىستاردى ابىرويمەن اتقاردى. سوندىقتان ارىپتەسىمىز جاڭا قىزمەتتە دە قاسيەتتى قىزىلوردا وبلىسىنىڭ دامۋى ءۇشىن ايانباي ەڭبەك ەتەدى دەپ سەنەمىز. وسى جەردە ەرەكشە ايتۋ كەرەك, ەگەمەن ەلىمىز تاريحىندا العاش رەت ايەل ادام وبلىس اكىمى بولىپ تاعايىندالدى. بۇگىن بەلگىلى سەبەپتەرمەن گۇلشارا ناۋشاقىزى جالپى وتىرىسقا قاتىسا المادى. ونى وزدەرىڭىز ءتۇسىنىپ وتىرعان بولارسىزدار. قازىرگى جاعدايدا وبلىس اكىمى رەتىندە جۇمىسىن باستاپ, ءوڭىردىڭ ماڭىزدى ماسەلەلەرىن شەشۋگە كىرىسىپ كەتتى. سوندىقتان وسى وتە جاۋاپتى جۇمىسىندا زور تابىستار تىلەيمىز», دەدى نۇرلان نىعماتۋلين.