دارىگەرلەر اللەرگياسى بارلارعا پاندەميا كەزىندە ساق بولۋدى ەسكەرتەدى

الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەسپۋبليكالىق اللەرگولوگيالىق ورتالىعىنىڭ جەتەكشىسى, مەديتسينا عىلىمدارىنىڭ كانديداتى, جوعارى ساناتتاعى دارىگەر دينارا تالعاتبەكوۆا ماۋسىمدىق اللەرگياسى بار, تىنىس جولدارىنىڭ سوزىلمالى اللەرگيالىق اۋرۋلارىنا شالدىققان ادامدارعا كوروناۆيرۋستىڭ تارالۋىنا بايلانىستى جوعارى قاۋىپ ءتونۋى مۇمكىن, دەيدى.

دينارا جەڭىسبەكقىزىنىڭ ايتۋىنشا, مۇرىن-جۇتقىنشاق  – ۆيرۋستار مەن اللەرگەندەردىڭ نەگىزگى قاقپاسى. قاۋىپتى اگەنتتەردىڭ العاشقى كەدەرگىسى بولىپ تابىلاتىن مۇرىن-جۇتقىنشاقتىڭ سىلەمەيلى قابىعىنا ەرەكشە نازار اۋدارۋ قاجەت. تىنىس جولدارىنىڭ سوزىلمالى اللەرگيالىق قابىنۋى پاتسيەنتتىڭ سىلەمەيلى قابىعىن ۆيرۋستارعا وسال ەتەدى.

سوندىقتان, كوكتەم مەزگىلىندە, اسىرەسە ءساۋىر ايىنىڭ اياعىندا – مامىردا, اعاشتار شاڭ باسا باستاعاندا, مەگاپوليس تۇرعىندارى ساق بولۋلارى كەرەك.

مۇرىن قۋىسى ءوزىنىڭ سىلەمەيلى قابىعىمەن ۇنەمى ۆيرۋستارمەن كۇرەسىپ, مۇرىن ارقىلى وتەتىن اۋانى تازارتىپ وتىرادى. وعان ءارتۇرلى باكتەريالار, ۆيرۋستار, توزاڭ جينالادى. ۆيرۋستىق ينفەكتسيا اعزاعا تىنىس الۋ جولىمەن ەنىپ, تىنىس الۋ جولدارىنىڭ جاسۋشالارىندا – كومەي, تراحەيا, برونحتاردا جينالادى. بۇل اللەرگەننىڭ سىلەمەيلى قابىققا وڭاي ەنەتىندىگىن بىلدىرەدى. يممۋنيتەت السىرەگەن كەزدە زاقىمدالعان سىلەمەيلى قابىقتار ارقىلى ۆيرۋستار مەن اللەرگەندەر ورگانيزمگە زيان كەلتىرەدى. ەگەر ۆيرۋسقا كوكتەمدەگى وسىمدىكتەر مەن شوپتەردىڭ گۇلدەنۋىنە بايلانىستى اللەرگيا قوسىلسا, ناۋقاستىڭ جاعدايىنا اسەر ەتۋى  مۇمكىن.

سوندىقتان, ينفەكتسيا اللەرگيانىڭ بارىسىن, ال اللەرگيا – ۆيرۋستىق ينفەكتسيانىڭ اعىمىن ناشارلاتادى. سول سەبەپتى, اۋرۋدىڭ الدىن-الۋ وتە ماڭىزدى. ەڭ قاراپايىمى – مۇرىندى, اۋىزدى جانە تاماقتى تۇزدى سۋمەن شايۋ. بۇل تاڭەرتەڭ ءتىستى تازالاۋ سياقتى. ءبىز تىستەرىمىزدى كەشكە دە تازالايمىز, قولىمىزدى دا كۇنىنە بىرنەشە رەت جۋامىز, مۇرىننىڭ سىلەمەيلى قابىعىمەن دە سولاي جاساۋ كەرەك. ۆيرۋستىق ينفەكتسيا كەزىندە مۇرىن-جۇتقىنشاقتىڭ ۋاقتىلى ەمدەلمەگەن اۋرۋلارى (سينۋسيتتەر, فارينگيت) اۋىر اسقىنۋعا اكەلۋى مۇمكىن.

اللەرگياسى بار ناۋقاس, اسىرەسە قازىر وسىمدىكتەردىڭ گۇلدەنۋ كەزەڭىندە اۋرۋدىڭ بەلگىلەرى مەن اۋىرلىعىن باقىلاۋ ءۇشىن دارىگەردىڭ تاعايىنداعان تەراپياسىن قابىلداۋى كەرەك. ۆيرۋستار ءاردايىم اللەرگيالىق اۋرۋلاردىڭ, اسىرەسە برونح دەمىكپەسىنىڭ ءورشۋىنىڭ ارانداتۋشىسى رەتىندە ارەكەت ەتەدى.

برونح دەمىكپەسى بولعان جاعدايدا, پاتسيەنت دارىگەر تاعايىنداعان نەگىزگى قابىنۋعا قارسى تەراپيانى الۋى كەرەك, سونىمەن قاتار ۆيرۋستىق-باكتەريالدى ينفەكتسياسىنىڭ قوسىلۋ ەرەكشەلىكتەرىن ەسكەرە وتىرىپ, ەمدەۋدە ۆيرۋسقا, باكتەرياعا قارسى, يممۋنومودۋلياتورلىق ءدارى-دارمەكتەردى قولدانۋعا بولادى.

الماتى