باتىس قازاقستان وبلىسىنىڭ ورتالىعى – ورال قالاسىندا تۇراتىن ءبىر ايەل بۇدان 14 جىل بۇرىن تۋعان اعاتايىن باۋىزداپ ولتىرگەنىن مويىندادى. بۇل تۋرالى «ۋرالسكايا نەدەليا» اپتالىعى حابارلادى.
باتىس قازاقستان وبلىسىنىڭ ورتالىعى – ورال قالاسىندا تۇراتىن ءبىر ايەل بۇدان 14 جىل بۇرىن تۋعان اعاتايىن باۋىزداپ ولتىرگەنىن مويىندادى. بۇل تۋرالى «ۋرالسكايا نەدەليا» اپتالىعى حابارلادى.
تامىزدىڭ 20-سى كۇنى 31 جاستاعى ءبىر ايەل ورال قالاسىنداعى شاعان پوليتسيا بولىمىنە كەلىپ, ءوزىنىڭ بۇدان 14 جىل بۇرىن تۋعان اعاتايىن باۋىزداپ ولتىرگەنىن بايانداپ بەرەدى. پوليتسەيلەردىڭ سوزىنە قاراعاندا, كەلىنشەك 1999 جىلدىڭ كوكتەمىندە, جاسى 17-دە كەزىندە ءوزىنىڭ 41 جاستاعى اعايىنىڭ تاماعىن پىشاقپەن ورىپ جىبەرۋ ارقىلى ولتىرگەن بولىپ شىقتى. وسىدان كەيىن ءمايىتتىڭ ۇستىنە سولياركا قۇيىپ ورتەيدى. قىز سوسىن قاڭقانى اۋىلداعى ءبىر اجەتحانانىڭ ىشىنە اپارىپ تاستايدى.
قۇقىق قورعاۋشىلار بويجەتكەننىڭ نەگە مۇنداي قادامعا بارعانىن دا انىقتايدى. سويتسە, قىزعا تۋعان ناعاشى بولىپ كەلەتىن اعاسى سول كەزدە بۇلارمەن ءبىر ۇيدە تۇرعان ەكەن. سول كۇنى ۇيدەگىلەردىڭ ءبارى ءبىر جاققا كەتىپ قالادى دا, ەكەۋى وڭاشا قالادى. وسىنىڭ الدىندا عانا تۇرمەدەن بوساپ كەلگەن 41 جاستاعى ەركەك جاس قىزعا تيىسەدى. وسى ارپالىستىڭ كەزىندە قىز اعاسىنىڭ تاماعىن ورىپ جىبەرەدى.
كەلىنشەكتىڭ ايتۋىنان كەيىن پوليتسەيلەر اتالعان ورىندى بارىپ تەكسەرەدى. ليۆكينو كەنتىندەگى اجەتحانانىڭ 1,5 مەتر تەرەڭدىگىنەن شىنىندا دا ادامنىڭ قاڭقاسى شىعادى. ول سوسىن ساراپتاماعا جىبەرىلەدى.
پوليتسيا جاس ايەلدىڭ قالىپتى ءومىر ءسۇرىپ جاتقان ادام ەكەنىن دە مالىمدەپ وتىر. ونىڭ بۇگىندە 4 بالاسى بار. ازىرگە وعان ەشقايدا كەتىپ قالماۋ شاراسى قولدانىلىپ وتىر.
قىلمىستىق ءىس تەكسەرىلىپ جاتىر.
قۇرىش نۇرىمبەت.