وتكەن جۇمادا بىشكەكتەگى ماسكەۋ - راززاقوۆ اتىنداعى كوشەلەردىڭ قيىلىسى ماڭىندا تۇرعان «ۆاز 2106» كولىگىنە «تويوتا پرادو» ماشينەسى كەلىپ سوعىپ, جول-كولىك وقيعاسى ورىن الدى. «تويوتا پرادونى» وزبەكستاننىڭ قىرعىزستانداعى ەلشىسى كاميل راشيدوۆ ماس كۇيىندە جۇرگىزگەن بولىپ شىقتى. ءوزى كىنالى بولا تۇرا ول سول ساتتە «ۆاز 2106» اۆتوكولىگىنىڭ يەسىن ۇرىپ-سوعىپ, بالاعاتتاعان. بۇل تۋرالى «ۆەچەرني بيشكەك» گازەتى حابارلادى.
ءبىر ارىپتەسىنىڭ تۋعان كۇنىن اتاپ ءوتىپ شىققان كاميل راشيدوۆ قۇقىق قورعاۋ ورىندارىنىڭ قىزمەتكەرلەرىنە دە مويىنسىنعىسى كەلمەگەن. ءتىپتى, ماشينە ىشىندە بولعان ديپلوماتتاردىڭ ءبىرىنىڭ ايەلى ميليتسيا قىزمەتكەرىنە قارسى مىنەز كورسەتكەن.
ءبىر ايتا كەتەرلىگى, وقيعا ورنىنا كەيىننەن كەلگەن وزبەكستان ەلشىلىگىنىڭ جۇرگىزۋشىسى ءابدۋالي دەگەن ازامات جول-كولىك وقيعاسىنا قاتىستى كىنالى دەپ تانىلىپ, ونىڭ ۇستىنەن زاڭدىق قۇجاتتار تولتىرىلدى.
قازىرگى كەزدە قۇقىق قورعاۋ ورىندارىنىڭ قىزمەتكەرلەرى اتالعان ىسكە بايلانىستى تەكسەرۋ جۇمىستارىن جۇرگىزۋدە. ال وزبەكستان ەلشىلىگى بۇل وقيعاعا قاتىستى ەشقانداي مالىمدەمە جاساماي وتىر.
جولدىباي بازاروۆ.