تاراز قالاسىنىڭ تۇرعىندارى ءۇشىن قوعامدىق كولىك ءالى دە وزەكتى ماسەلەلەردىڭ ءبىرى. بەردىبەك ساپارباەۆ جامبىل وبلىسىنا اكىم بولىپ كەلگەن ساتتە قوعامدىق كولىكتەردىڭ ءجۇرۋ كەستەسىن تۇنگى ساعات ونعا دەيىن ۇزارتۋدى تاپسىرعان ەدى. بىراق ول تالاپ ورىندالمادى. سول سياقتى, تارازدىقتاردان بۇگىندە اۆتوبۋس مارشرۋتتارىنا قاتىستى كوپتەگەن شاعىم تۇسۋدە. اسىرەسە, تۇرعىندار الەۋمەتتىك جەلىلەر ارقىلى مەرەكە كۇندەرى قوعامدىق كولىك قوزعالىسىنىڭ ايتارلىقتاي سيرەگەنىن جەتكىزگەن.
وبلىس ورتالىعىنداعى مارشرۋتتاردىڭ 40 پايىزىنا «اۋليەاترانسپاسس» جشس قىزمەت كورسەتەدى. كۇن سايىن سەرىكتەستىككە تيەسىلى 162 اۆتوبۋس 17 باعىت بويىنشا قاتىنايدى. مۇندا جىل سايىن جاڭا تەحنيكالار قاتارى تولىقتىرىلىپ, GPS جۇيەسى ەنگىزىلگەن. الايدا كورسەتىلىپ وتىرعان قىزمەتتەردىڭ ساپاسىنا تۇرعىنداردىڭ كوڭىلى تولمايدى ەكەن. بۇل اكىم بەردىبەك ساپارباەۆ وسى ماسەلەگە قاتىستى تەكسەرۋ جۇرگىزگەندە بەلگىلى بولدى.
«سوڭعى بىرنەشە كۇن ىشىندە ازاماتتاردان شاعىمدار كوپ تۇسۋدە. اۆتوبۋستاردىڭ وتە سيرەك جۇرگەنى مەرەكە كۇندەرى تۇرعىندارعا ايتارلىقتاي قيىندىقتار تۋعىزعان. اۆتوپاركتەر تاراز قالاسى اكىمدىگىمەن جاسالعان شارتقا قول قويعان. ول سىزدەردى قوعامدىق كولىكتى تازا ۇستاۋعا, تاسىمال كەستەسىن جانە حالىقپەن قارىم-قاتىناس جاساسۋ مادەنيەتىن بارىنشا ساقتاۋعا مىندەتتەيدى. بۇگىنگى تاڭدا اۆتوبۋس پاركىنىڭ بارلىق پۋنكتتەرى بويىنشا نارازىلىق بار» دەگەن بەردىبەك ساپارباەۆ.
سونداي-اق, اكىم ەندى بۇل سەكىلدى كەلەڭسىزدىكتەر قايتالاناتىن بولسا, تاسىمالداۋشى كومپانيالارعا قاتاڭ شارالار قابىلداناتىنىن ايتتى. دەگەنمەن, «اۋليەاترانسپاسس» جشس ديرەكتورى راشيد ءپىرمانوۆتىڭ ايتۋىنشا, ۇجىممەن ءتۇسىندىرۋ جۇمىستارى جۇرگىزىلگەن. بۇدان باسقا دا تاسىمال ماسەلەسىندە بىرقاتار ماسەلە بار. ماسەلەن, بۇگىندە اۆتوبۋستاردىڭ توزۋى وتكىر ماسەلەگە اينالعان. ناشار جولداردىڭ سالدارىنان قولداعى بار تەحنيكالار جارامسىز كۇيگە تۇسۋدە. بۇل رەتتە تاراز قالاسىنىڭ اكىمى ايتقازى قارابالاەۆ وبلىس ورتالىعىنىڭ كوشەلەرىن جوندەۋ جۇمىستارى كوپ ۇزاماي باستالاتىنىن ايتتى. ال, «ساپارترانس 2012» جشس ديرەكتورى باۋىرجان ءادىلوۆ «تاعى ءبىر وزەكتى ماسەلە – كاسىبي جۇرگىزۋشىلەردىڭ جەتىسپەۋشىلىگى بولىپ وتىر. بىزگە جۇمىس ىستەۋگە كوپ ادامدار كەلە بەرمەيدى» دەيدى. سوندىقتان تاسىمالداۋشى كومپانيالار ءوز جۇمىستارىنىڭ ساپاسىن جاقسارتۋ ءۇشىن جەرگىلىكتى بيلىكتەن ءتاريفتى كوتەرۋدى نەمەسە سۋبسيديالاۋ ارقىلى كومەك بەرۋدى سۇراپ وتىر. بۇل ماسەلەگە بەردىبەك ساپارباەۆ ء«تاريفتى كوتەرۋ ماسەلەسى مۇقيات قاراۋدى تالاپ ەتەدى. سەبەبى ول قالا تۇرعىندارى ءۇشىن, اسىرەسە, الەۋمەتتىك جاعىنان وسال توپتاعى ازاماتتار ءۇشىن وڭاي سوقپاسى انىق. مەنىڭ ويىمشا, قىزمەت كورسەتۋ ساپاسىن ارتتىرۋعا قول جەتكىزبەي تۇرىپ, ءتاريفتى ارتتىرعان دۇرىس ەمەس. ونىڭ ۇستىنە مىنانداي قيىن ۋاقىتتا وعان ءجىتى ءمان بەرۋ كەرەك» دەپ جاۋاپ بەردى.
ايتا كەتەيىك, بۇگىندە اۆتوبۋستاردى دەزينفەكتسيالاۋ شارالارى جۇرگىزىلۋدە. تاراز قالاسىندا كوروناۆيرۋسپەن كۇرەسۋ ءۇشىن سانيتارلىق جۇمىستارمەن اينالىساتىن ءتورت كومپانيا بار. بۇل رەتتە قوعامدىق كولىك پەن ايالدامالار كۇنىنە ەكى رەت دەزينفەكتسيالانۋدا.
جامبىل وبلىسى