قازاقستاندىق ارتىستەر ونلاين رەجيمدە كونتسەرت وتكىزەتىن بولدى

كوروناۆيرۋس ىندەتىنىڭ تارالۋىنا جانە ەلىمىزدە توتەنشە جاعداي جاريالانۋىنا بايلانىستى مادەنيەت جانە سپورت مەكەمەلەرى ونلاين كەڭىستىكتى يگەرە باستادى.

«كارانتين كەزىندە حالىقتىڭ الەۋمەتتىك جەلىلەردى كوپتەپ قولدانا باستاعانىن ەسكەرگەن قر مادەنيەت جانە سپورت مينيسترلىگى «قازاقتەلەكوم» اق-مەن بىرلەسە وتىرىپ, Live فورماتىنداعى «كارانتيندەگى جۇلدىزدار» اتتى جاڭا جوبانى ىسكە قوسۋدى قولعا الدى. جوبا قازاقستاندىق مۋزىكا ونەرىن ەلىمىزدىڭ بارلىق ءوڭىرى ءۇشىن قولجەتىمدى ەتەدى», - دەلىنگەن قر مادەنيەت جانە سپورت مينيسترلىگىنىڭ ءباسپاسوز قىزمەتىنىڭ حابارلاماسىندا.  

سونىمەن, كوپ ۇزاماي قازاقستاندىق ارتىستەر ونلاين رەجيمدە كونتسەرت قويادى جانە ولاردىڭ ونەرى تانىمال الەۋمەتتىك جەلىلەردە كورسەتىلەدى.  

ونلاين-كونتسەرتتەر «قازاقتەلەكوم» اق قولداۋىمەن YouTube ارناسى ارقىلى كورسەتىلمەك. سونداي-اق, كونتسەرتتىڭ قايتالاۋى قر مادەنيەت جانە سپورت مينيسترلىگىنىڭ Facebook پاراقشاسىندا جانە YouTube-تەگى قازاقكونتسەرت ارناسىندا – @qazaqconcert كورسەتىلەتىن بولادى.  

فولكلورلىق, كلاسسيكالىق جانرلارداعى, ەسترادالىق باعىتتاعى شىعارمالار قويىلاتىن ونلاين-كونتسەرتتەردى كورەرمەن ءوز تاڭداۋى بويىنشا كورە الادى جانە ارتىستەرگە تىكەلەي سۇراقتار قويىپ وتىرۋعا مۇمكىندىك الادى.  

ۇيىمداستىرۋشىلار اتاپ وتكەندەي, «كارانتيندەگى جۇلدىزدار» اتتى العاشقى ونلاين-كونتسەرت بۇگىن, ياعني 24 ناۋرىزدا كەشكى ساعات 21.00-دە telecomkz-ءتىڭ YouTube ارناسىندا كورسەتىلەتىن بولادى. بۇگىنگى كونتسەرتتە كورەرمەندەر ۇيدە وتىرىپ-اق, ءانشى, كومپوزيتور جۇبانىش جەكسەن ۇلىنىڭ ورىنداۋىنداعى سۇيىكتى اندەرىن تىڭداي الادى