بۇگىن قىزىلوردادا وبلىس پەداگوگتارىنىڭ ءداستۇرلى تامىز ءماسليحاتى ءوتتى. بۇل تۋرالى وبلىس اكىمى ءباسپاسوز قىزمەتىنە سىلتەمە جاساعان «قازاقپارات» ءتىلشىسى حابارلادى.
كەڭەستە جينالعانداردى ءبىلىم كۇنىمەن قۇتتىقتاعان وبلىس اكىمى قىرىمبەك كوشەرباەۆ ءبىلىمنىڭ دامۋى بۇگىنگى ادامزات وركەنيەتىنىڭ ولشەمى, قوعام دامۋىنىڭ باستى كورسەتكىشى ەكەنىن اتاپ ءوتتى. ءسوزىنىڭ تۇيىنىندە ايماق باسشىسى مەملەكەتتىك ءبىلىم گرانتتارىن ءبولۋ ەرەجەسىن قايتا قاراپ, مەملەكەتتىك جوعارعى وقۋ ورىندارىنا وبلىستاعى تاپشى ماماندىقتار بويىنشا كۆوتا ءبولۋدى ەنگىزۋدى ۇسىندى.
«ول بۇگىنگى كۇننىڭ تالابىنا ساي كەلمەيدى. سەبەبى, ءار ايماقتىڭ وزىندىك ەرەكشەلىكتەرى بار. سوعان ساي ماماندار دايارلانۋى ءتيىس. كۆوتا بولىنگەن جاعدايدا وڭىرگە قاجەتتى ماماندىقتارعا بولىنەتىن ماڭىزدى گرانتتارعا قول جەتكىزە الامىز», - دەدى ق.كوشەرباەۆ.
ازىرگە بۇل وزەكتى ماسەلەنى ايماقتىڭ الەۋمەتتىك-ەكونوميكالىق دامۋىن ايقىندايتىن ماماندىقتار بويىنشا كادر دايىنداۋ وبلىس اكىمىنىڭ 116 گرانتىن ءبولۋ ارقىلى عانا جۇزەگە اسىرىلىپ جاتىر.
«تابانى قۇمعا كۇيگەن, ماڭدايى كۇنگە كۇيگەن, تاعدىردىڭ تەپەرىشىن كورسە دە, اسقاق ارماندارىنان باس تارتپاعان, الدىنا ءىرى ماقساتتار قويعان, اسىرەسە, اۋىلدىق جەردەن شىققان تالانتتى بالالارىمىزدى ءبىز قولداماساق, كىم قولدايدى؟!» - دەدى ايماق باسشىسى.
ايتا كەتەيىك, وسى ماقساتتاعى گرانتتىڭ 60-ى قورقىت اتا اتىنداعى مەملەكەتتىك ۋنيۆەرسيتەتكە بولىنگەن. كەلەسى جىلى بۇل كورسەتكىش 300-گە دەيىن جەتەتىن بولادى.
ساكەن مايلىباي.