الماتى وبلىسىنداعى «ىلە» پوليگونىندا وتكىزىلگەن «دالا قىرانى-2013» حالىقارالىق اسكەري بىتىمگەرشىلىك وقۋ-جاتتىعۋ شاراسى ءوز مەجەسىنە كەلىپ جەتتى. قازاقستان, اقش, ۇلىبريتانيا, ليتۆا, شۆەيتساريا, يتاليا, قىرعىزستان, تاجىكستان مەملەكەتتەرى قارۋلى كۇشتەرىنىڭ وكىلدەرى بىرلەسىپ بەيبىتشىلىكتى ساقتاۋ ماقساتىندا كۇنى-ءتۇنى بەلسەندى تۇردە اسكەري وپەراتسيالار وتكىزدى.
الماتى وبلىسىنداعى «ىلە» پوليگونىندا وتكىزىلگەن «دالا قىرانى-2013» حالىقارالىق اسكەري بىتىمگەرشىلىك وقۋ-جاتتىعۋ شاراسى ءوز مەجەسىنە كەلىپ جەتتى. قازاقستان, اقش, ۇلىبريتانيا, ليتۆا, شۆەيتساريا, يتاليا, قىرعىزستان, تاجىكستان مەملەكەتتەرى قارۋلى كۇشتەرىنىڭ وكىلدەرى بىرلەسىپ بەيبىتشىلىكتى ساقتاۋ ماقساتىندا كۇنى-ءتۇنى بەلسەندى تۇردە اسكەري وپەراتسيالار وتكىزدى.
بىتىمگەرشىلىك وقۋ-جاتتىعۋىنىڭ بەلسەندى كەزەڭىن قورىتىندىلاۋ بارىسىندا بىرىككەن اسكەرلەر جەكە ادامداردى جانە كولىكتەردى تەكسەرۋ, تاكتيكالىق وپەراتيۆتىك ورتالىقتىڭ قىزمەتىن ۇيىمداستىرۋ, جەرگىلىكتى نىسانداردى كۇزەتۋ ءىسىن جۇرگىزۋ, تىكۇشاق ارقىلى تولىق باقىلاۋ شاراسىن مەڭگەرۋ جانە شابۋىل جاسالعان نىساننىڭ احۋالىن انىقتاۋ سەكىلدى نەگىزگى تاپسىرمالاردى ورىندادى.
وقۋ-جاتتىعۋ شاراسىنىڭ باعدارلاماسىنا سايكەس بىرىككەن بىتىمگەرلەر شتابىندا باقىلاۋعا الىنعان ايماقتىڭ كارتاسى جاسالىپ, ىقتيمال دۇشپاندار ورنالاسقان جەرلەر انىقتالدى. ءاربىر توپقا ناقتى تاپسىرمالار بەرىلىپ, «قازبات» دەسانت-شابۋىلداۋشىلارىنىڭ جەكە قۇرامى اعا لەيتەنانت ب.اقتانوۆتىڭ جەتەكشىلىگىمەن كولىك قۇرالدارىن جانە ادامداردى مۇقيات تەكسەرۋدەن وتكىزدى. دۇشپاندار باسىپ العان اۋىل ماڭىنا تۇسىرىلگەن 25 جاۋىنگەردەن تۇراتىن ۇتقىر توپ تەز ارادا ۇيلەر مەن جولدىڭ قالتارىسىنا قويىلعان جارىلعىش زاتتى انىقتاپ, ارنايى كيىم كيگەن ساپەردىڭ كومەگىمەن ونى اۋلاققا اپارىپ زالالسىزداندىردى. بتر-80 جانە حاممەر اسكەري اۆتوكولىكتەرى جەتكىزگەن قارۋلى توپ جاۋ بەكىنىسىنە شابۋىل جاساپ, جارالى اسكەريلەردى وت وشاعىنان الىپ شىقتى. اۋەدە ەكى تىكۇشاق مايدان دالاسىن ءجىتى باقىلاپ, بىتىمگەرلەر ورتالىعىنا اقپارات بەرۋمەن قاتار, باسقىنشىلار ورنالاسقان بەكىنىسكە اۋەدەن وق جاۋدىردى.
بۇل كەزدە باتالون شتابىنداعى وفيتسەرلەردىڭ دە جۇمىسى قىزۋ جۇرگىزىلىپ, وپەراتيۆتى ءبولىمنىڭ باستىعى, كاپيتان ا.امىرەنوۆ تەحنيكالىق جانە مۋلتيمەديالىق قۇرالداردىڭ كومەگىمەن تاكتيكالىق جاعدايدى شەبەر باسقارىپ وتىردى. بۇدان كەيىن بىتىمگەرلەر گۋمانيتارلىق جۇك تيەلگەن كولوننا وتەتىن كوپىردى اەروۇتقىر اسكەرلەردىڭ جانە اۋە زۆەنوسىنىڭ كومەگىمەن باقىلاۋعا الدى. مۇندا دا جاۋدىڭ قويعان جارىلعىش زاتتارى تابىلىپ, جۇك ماشينەلەرىنە جاسالعان لاڭكەستىك شابۋىل تويتارىلدى. بىتىمگەرلەردىڭ جيناقىلىعى مەن جەدەل ارەكەت ەتۋىنىڭ ناتيجەسىندە گۋمانيتارلىق جۇك ەلدى مەكەنگە ۋاقتىلى جەتكىزىلىپ, ورتالىقتىڭ تاپسىرماسى تاپ-تۇيناقتاي ورىندالدى.
ارينە, بۇل وقۋ-جاتتىعۋ وپەراتسياسى. الايدا, وسىنداي بىرلەسكەن اسكەري قيمىلدار شەبەرلىكتى شىڭداي تۇسەرى انىق.
«ىلە» پوليگونىندا وسىمەن ونىنشى مارتە وتكىزىلىپ وتىرعان «دالا قىرانى» تاكتيكالىق-ارنايى بىتىمگەرشىلىك وقۋ-جاتتىعۋى قازاقستان رەسپۋبليكاسى مەن ناتو اراسىنداعى ارىپتەستىك قيمىلدارىنىڭ دەربەس جوسپارىن جۇزەگە اسىرۋ, سونىمەن قاتار, «بەيبىتشىلىك ءۇشىن ارىپتەستىك» باعدارلاماسى شەڭبەرىندە وتكىزىلىپ كەلە جاتقانىن تاعى دا ەسكە سالعىمىز كەلەدى. بيىلعى وقۋ-جاتتىعۋعا قازاقستان, اقش, ۇلىبريتانيا, ليتۆا, شۆەيتساريا, يتاليا, قىرعىزستان, تاجىكستان مەملەكەتتەرى قارۋلى كۇشتەرىنىڭ وكىلدەرى قاتىسسا, اسكەري جاتتىعۋلاردىڭ بارىسىن ناتو-مەن بىرلەسىپ يسپانيا, گەرمانيا جانە بەلارۋس رەسپۋبليكاسىنىڭ باقىلاۋشىلارى قاداعالادى.
جاتتىعۋعا قازاقستان تاراپىنان «قازبات» بىتىمگەرشىلىك باتالونى تولىق قۇرامدا, «قازبريگ» بىتىمگەرشىلىك بريگاداسىنىڭ شتابى جانە قازاقستان قارۋلى كۇشتەرى اەروۇتقىر اسكەرلەرى قولباسشىسى باسقارماسىنىڭ اسكەري قىزمەتشىلەرى مەن قۇرلىق اسكەرلەرى جانە اۋە قورعانىسى كۇشتەرىنىڭ بولىمشەلەرى قاتىستى.
قانات ەسكەندىر,
«ەگەمەن قازاقستان».
الماتى.
سۋرەتتەردى تۇسىرگەن
يۋري بەككەر.