«قازاقتەلەكوم» دارىگەرلەرگە ينتەرنەتتى تەگىن تاراتادى

قۇجاتتىڭ نەگىزگى مازمۇنى – قازاقستان رەسپۋبليكاسىنىڭ پرەزيدەنتى جاريالاعان ەلدەگى توتەنشە جاعداي كەزەڭىندە, دەنساۋلىق ساقتاۋ سالاسىن قولداۋ. ناقتىراق ايتقاندا, ەلدەگى ەپيدەميالوگيالىق جاعدايدىڭ كۇرت قيىنداعان كەزەڭىندە اۋىرتپالىقتى مويىندارىنا ارتقان 5000-نان استام مەديتسينا قىزمەتكەرلەرى Tele2, Altel, Kcell جانە Activ بايلانىس جەلىلەرىندە تەگىن, توقتاۋسىز بايلانىسپەن جانە ءموبيلدى ينتەرنەتپەن قامتاماسىز ەتىلەتىن بولادى. ايتا كەتۋ كەرەك, بۇل باستاما قازاقستاننىڭ ءىرى تەلەكوممۋنيكاتسيا وپەراتورىنا تيەسىلى.

«قازاقتەلەكوم» كومپانيالار توبى قالىپتاسقان جاعدايدىڭ قيىندىعىن بارىنشا سەزىنىپ وتىر. كوروناۆيرۋسپەن كۇرەستە دارىگەرلەردىڭ الدىڭعى شەپتە جۇرەتىنى بەلگىلى. ولار قاۋىرت رەجيمدە جۇمىس ىستەۋدە. وسى رەتتە مەديتسينا قىزمەتكەرلەرىنىڭ ۇنەمى بايلانىستا بولۋى ماڭىزدى. قازىرگى تاڭدا شۇعىل تۇردە بۇل باستامانى جۇزەگە اسىرۋ بارىسىن ۇيلەستىرىپ جاتىرمىز. سونىمەن قاتار قازاقستان رەسپۋبليكاسىنىڭ دەنساۋلىق ساقتاۋ مينيسترلىگىنەن مەديتسينالىق قىزمەتكەرلەر ءتىزىمىن الۋ ءىسى باستالدى, – دەپ اتاپ ءوتتى «قازاقتەلەكوم» اق باسقارما توراعاسى قۋانىشبەك ەسەكەەۆ.

كوروناۆيرۋس انىقتالعان وزگە ەلدەردىڭ تاجىريبەسىنە سۇيەنسەك, پاندەميا كەزەڭىندە مەديتسينالىق مەكەمەلەرگە ارتىلاتىن جۇكتەمە وتە جوعارى بولادى. اتاپ وتەيىك, ەلىمىزدىڭ مەديتسينالىق قىزمەتكەرلەرىن ىندەتپەن كۇرەسكە جۇمىلدىرۋ باعىتىندا, ساپالى بايلانىس ماڭىزدى فاكتور بولىپ تابىلادى.«موبايل تەلەكوم-سەرۆيس» جشس باس ديرەكتورى رومان ءۆولوديننىڭ ايتۋىنشا, ەلدە جاريالانعان توتەنشە جاعداي مەرزىمىندە Tele2 جانە Altel ابونەنتتەرى ءۇشىن ارنايى شارالار كەشەنى دايىندالۋدا.

وسىنداي كۇردەلى كەزەڭدە دارىگەرلەر ءۇشىن ۇزدىكسىز ءارى ساپالى بايلانىستىڭ قانشالىقتى ماڭىزدى ەكەنىن تۇسىنەمىز, سوندىقتان ۇيالى بايلانىس قانا ەمەس, ءموبيلدى ينتەرنەت پەن اۋديو سەرۆيستى دە تەگىن قامتاماسىز ەتۋگە دايىنبىز, – دەدى ول.

«Kcell» اق باسقارما توراعاسى كاسپارس كۋكەليس ازاماتتاردىڭ دەنساۋلىعى مەن قاۋىپسىزدىگىنە قاتىستى ماسەلەدەن تىس قالمايتىنىن ءمالىم ەتتى.

قازىرگى تاڭدا ەل توتەنشە جاعداي رەجيمىنە كوشكەن كەزدە, ۇيالى بايلانىس وپەراتورلارىنا جۇكتەلگەن مىندەت تە جوعارىلايدى. ءبىز بايلانىس تۇراقتى بولۋى ءۇشىن 24/7 رەجيمىندە جۇمىس ىستەپ جاتىرمىز. ءبىز ءۇشىن وسىنداي سىن ساعاتىندا دارىگەرلەرگە قولداۋ كورسەتۋ ۇلكەن مارتەبە. بىرلەسە وتىرىپ, ءبىز ءبارىن جەڭەمىز, – دەدى ول.