بيىل 16-21 قىركۇيەك ارالىعىندا توعىزىنشى رەت وتەتىن IX حالىقارالىق «ەۋرازيا» كينوفەستيۆالى قازىلار القاسىنىڭ قۇرامىمەن وزگەشەلەنبەك.
بيىل 16-21 قىركۇيەك ارالىعىندا توعىزىنشى رەت وتەتىن IX حالىقارالىق «ەۋرازيا» كينوفەستيۆالى قازىلار القاسىنىڭ قۇرامىمەن وزگەشەلەنبەك.
الماتىعا الەمگە تانىمال كينەماتوگرافيستەردىڭ بىرقاتارى كەلەدى. ال, قازىلار القاسىنا جاڭازەلانديالىق جازۋشى جانە كانن كينوفەستيۆالىندە «التىن پالما بۇتاعى» جۇلدەسىن جەڭىپ العان («پيانينو») تۇڭعىش ايەل كينورەجيسسەر, سونداي-اق, «وسكار» سىيلىعى, ۆەنەتسيا كينوفەستيۆالىنىڭ «كۇمىس ارىستان» جۇلدەسىنىڭ يەگەرى دجەين كەمپيون تورايىمدىق ەتپەك. سونىمەن قاتار, قازىلار قۇرامىندا كانن كينوفەستيۆالى سىيلىعىنىڭ يەگەرى («التىن پالما بۇتاعى» «ۋبوي» ءفيلمى ءۇشىن), بەلگىلى ازيالىق كينورەجيسسەر, وپەراتور جانە پروديۋسەر بريليانتە مەندوس, ارت-حاۋس جانرى بويىنشا الەمدەگى بەدەلدى پروديۋسەرلەردىڭ ءبىرى, يسپاندىق پروديۋسەر, رەجيسسەر, اكتەر جانە ستسەناريست لۋيس ميناررو, بەلگىلى امەريكالىق ستسەناريست دەۆيد فراتسوني تورەلىك ەتەدى. دەۆيد ءفراتسونيدىڭ ستسەناريى بويىنشا تۇسىرىلگەن «گلادياتور» ءفيلمى «وسكار» سىيلىعىن بەس نوميناتسيا بويىنشا جەڭىپ العان. حالىقارالىق قازىلار القاسىنىڭ قۇرامىندا ءوزىمىزدىڭ ەمير بايعازين دە بار. بيىل اقپان ايىندا «بەرلينالە-2013» حالىقارالىق كينوفەستيۆالىنىڭ «كۇمىس ايۋ» جۇلدەسىن جەڭىپ العان 29 جاستاعى جەرلەسىمىز قازىلار القاسىنىڭ ەڭ جاس مۇشەسى.
وسى ارادا بيىلعى «ەۋرازيا» كينوفەستيۆالىنە جوعارىدا اتالعان اتاقتى كينوجۇلدىزداردىڭ كەلۋىنە بەرلين فەستيۆالىندەگى تابىسىمىز وڭ ىقپال ەتكەنى بايقالادى.
اتالمىش فەستيۆالدىڭ جاي-جاپسارىنا قاتىستى الدىن الا وتكىزىلگەن ءباسپاسوز ءماسليحاتىندا ش.ايمانوۆ اتىنداعى «قازاقفيلم» اق پرەزيدەنتى ەرمەك امانشاەۆ «ەۋرازيا» كينوفەستيۆالى بۇگىندە الەم كينەماتوگرافيستەرىنىڭ كاسىبي الاڭىنا اينالىپ كەلە جاتقاندىعىن اتادى.
– كەز كەلگەن كينوفەستيۆال سول ەلدىڭ كينەماتوگرافيا دەڭگەيىنىڭ كورسەتكىشى. مەملەكەت باسشىسىنىڭ مادەنيەت سالاسىندا جۇرگىزگەن كەشەندى ساياساتى وتاندىق كينەماتوگرافيانى سوڭعى جىلدارى ۇلكەن تابىستارعا جەتكىزە الدى. بۇل – ەلىمىزدەگى كينو ءوندىرىسىنىڭ دامۋ ءۇردىسىنىڭ, ۇلتتىق كينەماتوگرافتىڭ وسكەلەڭ بەدەلىنىڭ بەلگىسى, – دەدى ە.امانشاەۆ.
سونىمەن, بيىلعى «ەۋرازيا» كينوفەستيۆالىنە قاتىسۋعا الەمنىڭ تۇكپىر-تۇكپىرىنەن 170-تەن استام كينوتۋىندى كەلىپ تۇسكەن. ونىڭ ىشىنەن 12 فيلم عانا ىرىكتەلىپ الىندى. ولاردىڭ قاتارىندا: «سۇيىكتىم» (يتاليا, 2013), «انري» (فرانتسيا, 2012) «مەنىڭ اپكە-سىڭلىلەرىم» (گەرمانيا, 2013), «ۆادجدا» (ساۋد ارابياسى, گەرمانيا, 2012), «مازالانبا, سارا» (يران, 2013), «يلو يلو» (سينگاپۋر, 2013), «تسيكل» (تۇركيا, 2012), «قىمسىنۋ» (رەسەي, 2013), «گۇلدەنۋ» (گرۋزيا, 2013), «قۇشتارلىق» (قىرعىزستان, 2013), «زاراندۋد» (تاجىكستان, 2013) جانە قازاقستاندىق فيلم – «باۋىر» (رەج. س.اپرىموۆ, 2013 – فيلم ۆەنەتسيا كينوفەستيۆالىنىڭ باعدارلاماسىنا ىرىكتەلىپ الىندى).
فەستيۆال اياسىندا ءداستۇرلى كونكۋرستان تىس «ورتاازيالىق پانوراما», «شىعىس-باتىس» (باتىس كينورەجيسسەرى – دجەين كەمپيون جانە شىعىس كينورەجيسسەرى – بريليانتە مەندوسانىڭ رەتروسپەكتيۆالارى ەنگىزىلگەن) باعدارلامالار ۇسىنىلادى. سونداي-اق, World Cinema Fund, رەسەي كينوسىنىڭ كۇندەرى جانە «قارقىندى دامۋشى قازاق كينوسى» باعدارلامالارى بار. كورەرمەندەر حالىقارالىق كينوفەستيۆالدەردىڭ جۇلدەلەرىنە يە بولعان قازاقستاندىق فيلمدەردى جانە رەجيسسەر دارەجان ومىرباەۆتىڭ رەتروسپەكتيۆالىق فيلمدەرىن تاماشالاي الادى.
«ەۋرازيا» كينوفەستيۆالىنىڭ نەگىزگى ماقساتتارىنىڭ ءبىرى ەۋروپا جانە ازيا ەلدەرىنىڭ پروديۋسەرلەرى اراسىنداعى بايلانىستى نىعايتۋ بولىپ تابىلادى. بيىلعى جىلى كينوفەستيۆالدە كينوقورى بويىنشا دوڭگەلەك ۇستەل وتكىزىلمەك. ۇيىمداستىرۋشىسى – بەرلين كينوفەستيۆالى جانىنداعى World Cinema Fund ديرەكتورى ۆينچەنتسو بۋنو. اتالمىش كينوقور فەستيۆالدەردە جۇلدەلى ورىنداردى يەلەنگەن جوبالارعا قولداۋ كورسەتىپ كەلەدى. دوڭگەلەك ۇستەلگە حالىقارالىق جەتەكشى كينوقورلارى مەن ورتالىق ازيا جانە قازاقستان اۋماعىندا ىنتىماقتاستىق تاجىريبەسى بار پروديۋسەرلەر قاتىسادى.
«ەۋرازيا» كينوفەستيۆالى اياسىندا الەمنىڭ جەتەكشى كينەماتوگرافيستەرىنىڭ قاتىسۋىمەن ءداستۇرلى شەبەرلىك دارىستەرى ۇيىمداستىرىلادى. جاس كينوتانۋشىلار ءۇشىن فرانتسيانىڭ بەلگىلى كينوسىنشىسى مەتيۋ دارراس, امەريكالىق ستسەناريست دەۆيد فراتسوني شەبەرلىك دارىستەرىن جۇرگىزبەك. ءساتى تۇسە بەرمەيتىن شەبەرلىك ساعاتتارىنا ونەر سالاسىندا وقيتىن جوعارى وقۋ ورنى ستۋدەنتتەرى مەن كينەماتوگرافيستەر ارنايى ىرىكتەلىنىپ الىنادى. پروديۋسەرلىك بويىنشا شەبەرلىك كلاستارىن امەريكالىق پروديۋسەر «300 سپارتاندىق», «الەكساندر», «سوعىس ءتاڭىرى: ولىمنەن دە كۇشتىلەر» فيلمدەرىن تۇسىرگەن دجانني نۋنناري وتكىزبەك.
ايناش ەسالي,
«ەگەمەن قازاقستان».
الماتى.