بريفينگتە مەديتسينالىق ماسكانىڭ جەتىسپەۋشىلىگى دە ءسوز بولدى.
كەشە وسكەمەندەگى اقپاراتتىق ورتالىقتا وبلىس اكىمىنىڭ ورىنباسارى الىشەر مارحابات باستاپ, بىرنەشە باسقارما, دەپارتامەنت باسشىلارى قوستاپ بريفينگ وتكىزىپ, كوروناۆيرۋس ينفەكتسياسىنىڭ الدىن الۋ شارالارىنا جان-جاقتى توقتالىپ, جۋرناليستەردىڭ ساۋالدارىنا جاۋاپ بەردى.
«شىعىس قازاقستان وبلىسىندا وڭىرلىك شتاب قۇرىلىپ, الدىن-الۋ شارالارىنىڭ كەشەندى جوسپارى بەكىتىلدى. ينفەكتسيانىڭ تارالۋىنا جول بەرمەۋ جانە جەرگىلىكتى حالىقتىڭ سانيتارلى ەپيدەميولوگيالىق جاعدايىن قامتاماسىز ەتۋ ءۇشىن اعىمداعى جىلدىڭ 20 اقپانىنان 1ا ساناتتى ەلدەردەن كەلگەن ازاماتتاردى ارنايى مەديتسينالىق ستاتسيونارلارعا 14 كۇنگە كارانتينگە جابۋ باستالدى. دەنساۋلىق ساقتاۋ ءمينيسترى ەلجان ءبىرتانوۆ قازاقستانعا كوروناۆيرۋستى انىقتايتىن 60 مىڭ تەست جاقىن ارادا جەتكىزىلەتىنىن, بۇدان بولەك 40 مىڭ تەستكە تاپسىرىس بەرىلگەنىن ايتتى. ۇكىمەت بەرگەن تاپسىرمالارعا سايكەس ءبىزدىڭ وبلىستا ءتيىستى ءىس-شارالار قولعا الىنادى. ءوڭىردىڭ بارلىق مەديتسينالىق ۇيىمدارى جوعارى دايىندىق رەجيمىندە جۇمىس ىستەۋدە» دەدى وبلىس اكىمىنىڭ ورىنباسارى.
وبلىستىق دەنساۋلىق ساقتاۋ باسقارماسى باسشىسى ءىلياس مۇحامەدجان قازىرگى تاڭدا وڭىردە 69 ادام 14 كۇندىك كارانتينگە جاتقىزىلعاندىعىن جەتكىزدى. «ونىڭ 64-ءى اۋرۋحانالاردان شىعارىلدى. 13 ناۋرىزعا قاراعان كۇنى 5 ادام باقىلاۋعا الىنعان. تەكسەرۋلەر اياقتالىسىمەن ۇيلەرىنە بارادى» دەدى ول.
بريفينگتە مەديتسينالىق ماسكانىڭ جەتىسپەۋشىلىگى دە ءسوز بولدى. وبلىستىق كاسىپكەرلىك جانە يندۋستريالدىق-يننوۆاتسيالىق دامۋ باسقارماسىنىڭ باسشىسى ەرجان شورمانوۆ جاقىن كۇندەرى بۇل ماسەلە شەشىمىن تاباتىنىن ايتتى. «وبلىس اكىمىنىڭ تاپسىرماسىنا وراي جەرگىلىكتى كاسىپورىنداردا داكەدەن مەديتسينالىق ماسكا وندىرىلەتىن بولادى» دەدى ول.
وسكەمەن