اقتوبە وبلىسىندا جول ەرەجەلەرىن بۇزۋدىڭ الدىن الۋعا باعىتتالعان ءىس-شارا ءوتىپ جاتىر. بۇل تۋرالى Polisia.kz حابارلادى.
جەدەل پروفيلاكتيكالىق ءىس-شارا «كولىك قۇرالىن باسقارۋ قۇقىعىنان ايىرىلعان» دەپ اتالادى.
بۇگىن سوڭعى كۇن – جول ساقشىلارى جۇرگىزۋشىلەردىڭ جولداعى ءتارتىبىن باقىلاپ, ءتۇرلى اپاتتاردىڭ الدىن الادى, كولىكتى جۇرگىزۋشى كۋالىگىنسىز تىزگىندەپ جۇرگەندەردىڭ جولىن كەسەدى. پروفيلاكتيكالىق شارا وسى جۇمىستارعا باعىتتالعان.
رەسمي دەرەك بويىنشا, بۇگىنگى تاڭدا اقتوبە وبلىسىندا 278 جۇرگىزۋشى كولىك قۇرالىن باسقارۋ قۇقىعىنان ايىرىلعان. سولاردىڭ ىشىندەگى 10 ادامدى اقتوبە قالاسى پوليتسيا باسقارماسىنىڭ باتالونى ءبىر تاۋلىك ىشىندە انىقتاپ, قولعا ءتۇسىردى. ولاردىڭ ءبارى دە ماشينا باسقارۋ قۇقىعىنان ايىرىلسا دا ەمىن-ەركىن قالا كوشەلەرىندە كولىك تىزگىندەپ ءجۇر.
اكىمشىلىك قۇقىق بۇزۋشىلىق تۋرالى كودەكسكە سايكەس, كولىك قۇرالىن زاڭسىز باسقارعان ادام 50 ايلىق ەسەپتىك كورسەتكىشپەن ايىپپۇل تولەيدى نەمەسە 10 تاۋلىك مەرزىمگە اكىمشىلىك قاماققا الىنادى. بۇل باپ سوتپەن قارالادى.