پرەزيدەنت جانىنداعى ورتالىق كوممۋنيكاتسيالار قىزمەتىنىڭ اقپاراتتىق الاڭىندا كوروناۆيرۋستان ساقتانۋعا ارنالعان ءباسپاسوز ءماسليحاتى ءوتتى. جيىن بارىسىندا دەنساۋلىق ساقتاۋ مينيسترلىگى دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعى باس ديرەكتورى ارنۇر نۇرتاەۆ دەنى ساۋ ادامدارعا مەديتسينالىق ماسكا كيۋ قاجەت ەمەس ەكەنىن اتاپ ءوتتى.
«اقپان ايىنىڭ باسىندا ءدارىحانالاردىڭ بولشەك جەلىلەرىندەگى مەديتسينالىق ماسكالاردىڭ قالدىعى 9 ميلليوننان استام بولدى. الايدا كوروناۆيرۋستىق ينفەكتسيانىڭ اينالاسىندا پايدا بولعان دۇرلىگۋگە بايلانىستى وعان دەگەن قاجەتتىلىك 30 ميلليونعا دەيىن ارتتى. بۇگىندە وتاندىق وندىرۋشىلەردىڭ مەديتسينالىق ماسكالار ءوندىرىسىنىڭ ايلىق كولەمى 6 ملن بىرلىكتى قۇرايدى. ءبىرىنشى كەزەكتە الۋشىلار – مەملەكەتتىك مەديتسينالىق مەكەمەلەر. ماسكالاردى جاپپاي ساتىپ الۋعا بايلانىستى ۆەدومستۆوارالىق كوميسسيا ءونىمنىڭ ەكسپورتىنا تىيىم سالدى. مەديتسينالىق ماسكالار نەگىزىنەن اۋرۋ جۇقتىرعان پاتسيەنتتەن اۋرۋدىڭ تارالۋىن بولدىرماۋعا ارنالعان. سوندىقتان دەنى ساۋ ادامدارعا مەديتسينالىق ماسكا كيۋ قاجەت ەمەس», دەدى ا.نۇرتاەۆ.
ال جۇقپالى اۋرۋلار بويىنشا جەتەكشى مامان ديناگۇل باەشەۆا دۇرلىگۋ جاعدايىن قولدان تۋدىرۋدىڭ قاجەتى جوق دەيدى.
«ددۇ جانە كوروناۆيرۋس بويىنشا جۇمىس ىستەيتىن ۇيىمدار بۇل دەرتتەن قورعانۋدىڭ ەڭ باستى امالى ماسكا تاعۋ ەمەس ەكەنىن ايتادى. سەبەبى بۇل – اۋادا ۇشىپ جۇعاتىن اۋرۋ ەمەس. ەڭ باستىسى, جەكە باس گيگيەناسىن دۇرىس ساقتاۋ كەرەك. مەديتسينالىق ماسكا اۋرۋ ادام تۇشكىرگەن كەزدە سىلەكەيىن شاشپاۋى ءۇشىن جانە ناۋقاستارمەن جۇمىس ىستەيتىن مەديتسينالىق قىزمەتكەرلەرگە كەرەك. ۆيرۋس جاقىن بايلانىس بولعان كەزدە جۇعادى. جاساندى دۇرلىگۋ جاعدايىن تۋدىرۋدىڭ قاجەتى جوق. دۇنيەجۇزىلىك دەنساۋلىق ساقتاۋ ۇيىمىنىڭ جەتەكشى ماماندارى ايتىپ جاتقانداي, بۇل ۆيرۋستان ساقتانۋدىڭ ەڭ ءتيىمدى جولى ماسكالار ەمەس, باستى پروفيلاكتيكالىق قۇرال – جەكە گيگيەنانى ساقتاۋ, قوعامدىق ورىندارعا بارماۋ, اۋرۋ تاراعان ەلدەرگە شىقپاۋ. اۋرۋدىڭ 80%-ى وڭاي دارەجەدە جۇعادى. ءبىزدىڭ باستى مىندەت – پروفيلاكتيكانى ۇمىتپاۋ. سەبەبى ىندەت جۇقتىرماۋدىڭ 50%-ى ءوزىمىزدىڭ ساقتىق شارالارىن ساقتاۋىمىزعا بايلانىستى. وسىنى ەستە ۇستاساق ۆيرۋسپەن كۇرەسە الامىز», دەدى مامان.
ال فارماتسەۆتيكالىق قىزمەتتى قولداۋ جانە دامىتۋ قاۋىمداستىعىنىڭ پرەزيدەنتى مارينا دۋرمانوۆا ۆيرۋستىق اۋرۋلاردىڭ الدىن الۋ ءۇشىن ءتيىستى پرەپاراتتار بارىن تىلگە تيەك ەتتى.
«ونىڭ ىشىندە پاراتسەتامول, اتسيكلوۆير, وكسالين جاقپاسى بار. دەگەنمەن, جەكە گيگيەنانىڭ ءمانى زور. ماسكالارعا بايلانىستى ايتاتىن بولساق, ماسكا ەمەس وكسالين جاعۋ ءتيىمدى. اپتەكالىق ۇيىمداردا ۆيرۋسقا قارسى جانە دەزينفەكتسيالىق پرەپاراتتار دا جەتكىلىكتى», دەدى ول.