وتكەن جىلى جامبىل وبلىسىنىڭ اۋماعىندا جالپى قۇنى 12 182,0 ميلليون تەڭگەنى قۇرايتىن 34 ينۆەستجوبالار ىسكە اسىرىلعان. ولاردىڭ ىشىندە قوناقۇي, مەيرامحانا, دەمالىس ايماقتارى, مادەني ورتالىقتار, جول بويىنداعى سەرۆيستىك كەشەندەر, كيىز ءۇي قالاشىقتارى, تاۋشاڭعى بازاسى سياقتى نىساندار بار. اتالعان نىساندار تۋريستەردى تارتۋ ماقساتىندا تاراز قالاسىندا جانە جامبىل, جۋالى, قورداي, مەركى, مويىنقۇم, سارىسۋ, ت.رىسقۇلوۆ, تالاس, شۋ اۋداندارىندا ورنالاسقان.
ونىڭ ىشىندە, «كونە تاراز» تاريحي-ەتنومادەني ورتالىعى, «تەكتۇرماس» ەتنو-تاريحي كەشەنى جانە «قارالما» تاۋ-شاڭعى كۋرورتى سياقتى ءۇش ءىرى تۋريستىك ينۆەستيتسيالىق جوبالاردىڭ قۇرىلىسى اياقتالىپ, ىسكە قوسىلدى. «جامبىل وبلىسى ەكونوميكاسىنىڭ باسىم باعىتتارىنىڭ ءبىرى رەتىندە تۋريزم سالاسىنىڭ دامۋىنا ەرەكشە كوڭىل ءبولىنىپ وتىر. جوسپارلانعان ماقسات پەن مىندەتتەرگە قول جەتكىزۋ ءۇشىن وبلىستىڭ وڭ تۋريستىك ءيميدجىن قالىپتاستىرۋ جانە تۋريستىك اعىمدى تارتۋ ءۇشىن قاجەتتى ينفراقۇرىلىممەن قامتاماسىز ەتۋ جۇمىستارى جۇرگىزىلۋدە», دەيدى جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا.
سونىمەن قاتار, تاراز قالاسىن اباتتاندىرۋ جانە جاسىلداندىرۋ جۇمىستارى جۇرگىزىلىپ, قورىتىندىسىندا 6 دەمالىس ورىندارى ىسكە قوسىلعان.
ءتۋريزمنىڭ تاريحي-مادەني, ارحەولوگيالىق, ەكولوگيالىق, مەديتسينالىق-ساۋىقتىرۋ, بالالار جانە جاسوسپىرىمدەر, اڭ, بالىق اۋلاۋ سەكىلدى تۇرلەرىن دامىتۋ باعىتىنداعى جۇمىستار دا بار. سونداي-اق, وزبەكستان, قىرعىزستان مەملەكەتتەرىن جامبىل وبلىسىمەن بايلانىستىراتىن « ۇلى جىبەك جولىنداعى تۋريزم» ترانسشەكارالىق تۋريستىك مارشرۋتى ازىرلەندى. ال, «تسيفرلىق كازاقستان» باعدارلاماسى اياسىندا وبلىستاعى نەگىزگى تۋريستىك نىساندارعا مەملەكەتتىك ستاندارتقا ساي كەلەتىن قازاق, ورىس, اعىلشىن تىلدەرىندەگى كورسەتكىشتەر مەن اقپاراتتىق تاقتايشالار ورناتىلعان. سونىمەن قاتار, اۋليەاتا ءتۋريزمىن دامىتۋ ماقساتىندا 5 تىلدەگى اۋديو جانە بەينە گيدتەرى بار «Taraz Tour» ءموبيلدى قوسىمشاسى ىسكە قوسىلىپ, QR-كودتار وبلىستىڭ 37 تۋريستىك وبەكتىلەرىندە ورناتىلدى. «الماتى-تاراز» جانە «شىمكەنت-تاراز» جولدارىندا ورنالاسقان تاراز قالاسىنا كىرەر كەزدەگى اركالاردا راديوتولقىندارعا ارنالعان رەترانسلياتسيالاناتىن تاراتقىش ورناتىلعان.
جامبىل وبلىسى