ەلوردادا ينۆاتاكسي كولىگىنىڭ سانى ارتىپ, مۇمكىندىگى شەكتەۋلى بالالارعا كرەسلو-اربا سىيعا تارتىلدى. دەمەۋشىلىك قاراجات ەسەبىنەن 10 ارنايى كولىك ساتىپ الىندى. بۇل تۋرالى قالا اكىمدىگىنىڭ ءباسپاسوز حاتشىسى اقمارال ولجاباەۆا حابارلادى.
"قايرات بورانباەۆ ەلىمىزدىڭ جەتەكشى مەتسەناتتارىنىڭ ءبىرى. ول مۇمكىندىگى شەكتەۋلى ادامدارعا جاعداي جاساۋعا كومەكتەسىپ, ينۆاتاكسي ماشينەسىن ساتىپ الۋعا نيەت ءبىلدىردى. بۇل كولىكتەر سوڭعى الەمدىك ستاندارتتارعا ساي جابدىقتالعان جانە بەيىمدەلگەن", - دەدى "المالى" اا ۆيتسە-پرەزيدەنتى باقىت ساپاروۆ.
ەلوردا اكىمى التاي كولگىنوۆ قاتىسۋشىلاردى العىس كۇنىمەن قۇتتىقتاپ, ەرەكشە قاجەتتىلىگى بار ادامداردى قولداۋ ءۇشىن قانداي شارالار قابىلداناتىنىن اتاپ ءوتتى.
"مەملەكەت ەرەكشە قاجەتتىلىگى بار ادامدارعا قولداۋ كورسەتۋگە ەرەكشە كوڭىل بولەدى. قالا تۇرعىندارىمەن كەزدەسۋ بارىسىندا ولار ارنايى كولىكتەردىڭ جۇمىسى تۋرالى بىرقاتار ماسەلە ايتتى. قايرات سوۆەتاي ۇلىنا, ۇكىمەتتىك ەمەس ۇيىمداردىڭ وكىلدەرىنە جانە باسقا دا مەتسەناتتارعا كورسەتكەن قولداۋى ءۇشىن العىس ايتامىن. سوڭعى ۋاقىتتا ينۆاتاكسيدىڭ سانى ەكى ەسە ءوستى. 22-دەن 46 دەيىن كولىك سانىن ارتتىردىق. الداعى ۋاقىتتا دا قولداۋ كورسەتىپ, قاجەتتى شارالار قابىلدايتىن بولامىز", - دەدى قالا اكىمى التاي كولگىنوۆ.
ەلوردادا ەرەكشە قاجەتتىلىگى بار 27 مىڭ ادام تۇرادى, ونىڭ 5,5 مىڭى بالالار. قالادا ەكى وڭالتۋ ورتالىعى سالىنادى, قازىر يپپوتەراپيامەن اينالىسۋعا ارنالعان ات سپورتى كەشەنىنىڭ قۇرىلىسى جۇرگىزىلىپ جاتىر. قالالىق اۋرۋحانا بازاسىندا تۇڭعىش پرەزيدەنت قورىمەن بىرلەسە وڭالتۋ ورتالىعى اشىلادى. بۇدان باسقا, جاڭا تۇرعىن ءۇي كەشەندەرىنىڭ ءبىرىنشى قاباتتارىندا بالالارعا ارنالعان شاعىن ورتالىقتار, وڭالتۋ ورتالىقتارى, ەمحانالار سياقتى الەۋمەتتىك نىساندار اشىلادى.
ەلوردادا مۇمكىندىگى شەكتەۋلى ادامدارعا سپورتپەن اينالىسۋ ءۇشىن بىلىكتى قىزمەتكەرلەرى بار زاماناۋي ەكى سپورت كەشەنى ۇسىنىلعان: پاراليمپيادالىق جاتتىعۋ ورتالىعى جانە "تارلان" مۇز ايدىنى.