فۋتبولدان قازاقستان قۇراماسى بۇرناعى كۇنى تۇندە ەلورداداعى «استانا-ارەنا» سپورت كەشەنىندە گرۋزيا كومانداسىمەن جولداستىق كەزدەسۋ وتكىزىپ, 1:0 ەسەبىمەن جەڭىسكە جەتتى.
قازاقستان — گرۋزيا 1:0 (1:0)
تورەشى: سەرگەي تسينكەۆيچ (بەلارۋس).
قازاقستان: سيدەلنيكوۆ (موكين, 46), مۋلداروۆ (گۋرمان, 46), كيسليتسىن, نۇرداۋلەتوۆ, دميترەنكو, جۇماسقاليەۆ (بايجانوۆ, 78), بوگدانوۆ, شومكو (يۋرين, 90), حيجنيچەنكو (وستاپەنكو, 62), كوروبكين, ششەتكين (ەنگەل, 69).
گرۋزيا: رەۆيشۆيلي, كاشيا, حيزانيشۆيلي, اميسۋلاشۆيلي, گريگالاۆا, كوباحيدزە, كانكاۆا, وكرياشۆيلي, تارگامادزە, انانيدزە, سيربيلادزە
گول: حيجنيچەنكو (17).
جاسىراتىنى جوق, بۇعان دەيىنگى بىرنەشە ويىندى قاتارىنان ءساتسىز اياقتاعان قازاقستان قۇراماسى ويىنشىلارىنىڭ بۇل جولى تابىستى ويناي قوياتىنىنا جانكۇيەرلەردىڭ كوپشىلىگى ونشالىقتى سەنە قويعان جوق. وسى ماتچتا كوماندا تاعى جەڭىلىسكە ۇشىراسا, وزىنە دەگەن سەنىمنىڭ دە سەلكەۋى ءبىرجولاتا سەتىنەپ كەتەتىنىن باس جاتتىقتىرۋشى ميروسلاۆ بەرانەك تە جاقسى ءبىلدى. سوندىقتان ول كەزدەسۋدە قالايدا بەتبۇرىس جاساۋعا بارىن سالدى.
ال ماتچتىڭ باستاپقى جاعى قازاقستاندىقتار ءۇشىن بۇل جولى دا جاقسى ناتيجە كۇتىپ جاتۋدىڭ قۇر اۋرەشىلىك بولاتىنىن العا تارتقانداي بولىپ كورىندى. كەزىندە «كەڭەستىك برازيليالىقتار» دەگەن ات العان گرۋزيندەر شىنىندا دا وزدەرىنىڭ ويناۋ تەحنيكاسىن جاقسى مەڭگەرگەندەرىن تانىتىپ, كوپكە دەيىن دوپتى ءبىزدىڭ باعلاندارعا ۇستاتا قويمادى. سول سەنىمدىلىكتىڭ سۇرلەۋىندە ولار بىرنەشە رەت قاقپاعا دا دوپ باعىتتاپ ۇلگەردى. سونىڭ ىشىندە الەكساندر كوباحيدزە ۇرعان دوپ قاقپاشى اندرەي سيدەلنيكوۆتى ءبىر سىلكىندىرىپ ءوتتى.
ءبىزدىڭ جەرلەستەرىمىز قارسى جاققا ءبىرىنشى شابۋىلدى تەك 15-مينۋتقا قاراي عانا جاساي الدى. ايىپ الاڭىنىڭ ىشىنە ەكپىندەي كىرگەن سەرگەي حيجنيچەنكو ۇرعان دوپ بۇل جولى گولكيپەر نۋكري رەۆيشۆيليدىڭ قولىنان تابىلدى. الايدا, وسىنىڭ ارتىنشا قايتا جاسالعان شابۋىل تۇسىندا سەرگەي ءمۇلت كەتپەدى. ايىپ الاڭىندا دوپ قابىلداپ العان قاراعاندىلىق جىگىت كەنەت كىلت بۇرىلدى دا, دوپتى قاقپاعا قاراي شىرەنە تارتتى. گول! ءۇش باعاننىڭ اياسىنا قاراي زۋىلداپ ۇشقان دوپ تورعا بارىپ قادالا قالدى.
مىنا ساتسىزدىكتەن كەيىن مەيماندار تاعى ىشقىندى. ولاردىڭ جاپپاي العا ۇمتىلعان جويقىن جورىعى بارىسىندا كوباحيدزە ءبىر رەت باسىمەن قاقپاعا دوپ باعىتتادى. ال جانو انانيدزەنىڭ الىستان اتقىلاعان دوبى نىسانادان قيىس كەتتى. سونىڭ ارتىنشا بۇرىشتاما بەرىلىپ, ودان ۇشقان دوپتى زۋراب حيزانيشۆيلي قاقپاعا ءدوپ تۇسىرۋگە ۇمتىلدى. بىراق بۇل دا اندرەي تۇرعان شەڭبەردىڭ ۇستىنەن زۋ ەتە ءتۇستى. وسىدان كەيىن شابۋىل دا بىرتىندەپ باسەڭسي بەردى.
كەزدەسۋدىڭ ەكىنشى بولىگى تاعى دا گرۋزيندەردىڭ شابۋىلىمەن باستالدى. الدىمەن رەۆيشۆيلي وزىنە كەلگەن دوپتى الا قاشتى. ول ايىپ الاڭى ماڭىنا كەلە بەرگەندە الەكسەي ششەتكين قاۋىپتىڭ بەتىن قايتارىپ ۇلگەردى. مۇنىڭ سوڭىن الا قوناقتار ايىپ دوبىن ۇردى. ونى ماتچتىڭ ەكىنشى بولىگىندە الاڭعا شىققان داربازاشى الەكساندر موكين شەبەرلىكپەن قايتاردى. وسىدان باستاپ, گرۋزيندەردىڭ بۇرىشتاما دوبىن بەرۋلەرى دە جيىلەي بەردى. سولاردىڭ قاي-قايسىسى بولسا دا, قاۋىپ ءتوندىرىپ تۇردى. ءبىر جاقسىسى, ءبىزدىڭ قورعانىس شەبىندەگى جىگىتتەر بۇل تۇستا وتە مۇقيات وينادى.
سول ارالىقتاردا شابۋىلشىلارىمىز دا وزدەرىنىڭ الاڭعا بوسقا شاقپاعاندارىن كورسەتىپ قويدى. ايتالىق, سەرگەي وستاپەنكونىڭ جەكە-دارا شابۋىلىن گرۋزين قورعاۋشىلارىن جاندارىن سالىپ بارىپ قانا كەيىن سەرپىلتتى. وسىلايشا كەزدەسۋدىڭ سوڭعى جاعى الما-كەزەك شابۋىلمەن ءوتىپ جاتتى. دەگەنمەن, بۇل ويىندا قوناقتاردىڭ دوپقا كوبىرەك يەلىك ەتكەندەرىن دە, قاقپاعا ارتىعىراق ۇرعاندارىن دا, ستاندارتتى جاعدايعا مولىراق تاپ بولعاندارىن دا ايتا كەتۋىمىز كەرەك. وسىنداي تارتىستى كەزدەسۋدىڭ 1:0 ەسەبىمەن ءبىزدىڭ قۇراما پايداسىنا شەشىلگەنىنىڭ ءوزى داتكە قۋات.
ەندىگى ءبىر ايتا كەتەتىن ءجايت, بۇعان دەيىن بۇل ەكى قارسىلاس 2 رەت كەزدەسكەن بولاتىن. 2005 جىلعى تامىزدىڭ 17-سىندە الماتىدا وتكەن ءبىرىنشى ويىندا قوناقتار 2:1 ەسەبىمەن جەڭىسكە جەتتى. ال 8 قازاندا تبيليسيدە وتكەن قارىمتا ويىن 0:0 ەسەبىمەن تەڭ اياقتالدى. سونىمەن, ءۇشىنشى ويىندا قازاقستاندىقتار جەڭىس سانىن دا, دوپ ايىرماشىلىعىن دا تەڭەستىرىپ وتىر.
رۋسلان يگىلىك.