«قازاقستان» تەلەارناسىنداعى «اشىق الاڭ» باعدارلاماسىندا تىكەلەي ەفيردە ماجىلىستە قاراستىرىلىپ جاتقان دەنساۋلىق كودەكسىنىڭ جاڭا جوباسى تالقىلاندى.
تىكەلەي ەفيردە قوعام قايراتكەرى مۇرات ابەنوۆ حالىق ترانسپلانتولوگ دارىگەرلەرگە سەنبەيتىنىن ايتتى.
«جاقىندا ەكى ترانسپلانتولوگ دارىگەر شەتەل ازاماتتارىنا ورگان ساتىپ, ۇستالىپ جاتىر. بيزنەس جاساعان. ءبىز 3 مىڭ ادام كەزەكتە تۇر دەيمىز, ال اعزا شەتەلگە كەتىپ جاتىر. وكىنىشكە قاراي, حالىق ترانسپلانتولوگ دارىگەرلەرگە سەنبەيدى», - دەدى مۇرات ابەنوۆ.
ونىڭ ايتۋىنشا, جاقىندا قوعامدا شۋ شىعارعان اقتوبەدەگى جاس جىگىتتىڭ اعزاسىن دونورلىققا الۋ جاعدايىندا جىگىتتىڭ ميى ولگەن.
«مەديتسينا ماماندارى ادامنىڭ جۇرەگى سوعىپ تۇرسا دا, ميى ولسە ونى قالپىنا كەلتىرۋ مۇمكىن ەمەس دەيدى. وسىلايشا اعزانى دونورلىققا سۇرايدى. ال 2014 جىلى ءمۇفتياتتىڭ ءپاتۋاسى بويىنشا جۇرەگى سوعىپ تۇرعان ادامنىڭ اعزاسىن دونورلىققا الۋعا بولمايدى», - دەيدى مۇرات ابەنوۆ.
ونىڭ ايتۋىنشا, دونورلىقتىڭ باسقا جاعىن دا قاراۋ كەرەك.
«بىرەۋدىڭ تۋىسقانى رەانيماتسيادا جاتىپ, ءونڭى ەمىن ويلاپ وتىرعاندا, دارىگەرلەر ونى ەمدەۋمەن جۇمىس جوق, ونىڭ اعزاسى كىمگە سايكەس كەلەدى دەپ ىزدەۋمەن بولادى. كوپ ادامنىڭ قورقاتىنى سول عوي. ونى ەمدەۋدى ەمەس, دونورلىققا اعزاسىن الۋ تۋرالى عانا ويلاپ كەتەدى. سول جاعىن دا ويلاۋ كەرەك», - دەدى ول.
ال ترانسپلانتتاۋدى ۇيلەستىرۋ جونىندەگى رەسپۋبليكالىق ورتالىعى ديرەكتورىنىڭ مىندەتىن اتقارۋشى ءادىل جۇماعاليەۆتىڭ ايتۋىنشا, ميى ولگەن ادامدى قالپىنا كەلتىرۋ مۇمكىن ەمەس. سونىمەن قاتار ول قازاقستان تمد ەلدەرى اراسىندا قازاقستانداعى ترانسپلانتولوگيا ءۇشىنشى ورىندا ەكەنىن ايتتى.