قازاقستان مەن سەربيا اراسىنداعى عىلىمي-اكادەميالىق, سونداي-اق تسيفرلاندىرۋ باعىتتارى بويىنشا ىنتىماقتاستىقتى ىلگەرىلەتۋ ماسەلەلەرىن تالقىلاۋ ماقساتىندا, قازاقستاننىڭ سەربياداعى ەلشىسى عابيت سىزدىقبەكوۆ سەربيا رەسپۋبليكاسىنىڭ ءبىلىم, عىلىم جانە تەحنولوگيالىق دامۋ ءمينيسترى ملادەن سارتسەۆيچپەن كەزدەستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
كەزدەسۋ بارىسىندا ءبىلىم جانە عىلىم, تسيفرلاندىرۋ سالالارىنداعى ەكىجاقتى ىنتىماقتاستىقتى جانداندىرۋ جولدارى تالقىلاندى.
اتاپ ايتقاندا, تاراپتار ەكى ەل مينيسترلىكتەرى اراسىندا ىنتىماقتاستىق جونىندەگى كەلىسىمگە قول قويۋ, جوعارى وقۋ ورىندارىنىڭ بايلانىستارىن نىعايتۋ بويىنشا ناقتى ۋاعدالاستىقتارعا قول جەتكىزدى.
م.سارتسەۆيچ قازاقستان ءبىلىم جانە عىلىم ءمينيسترى ا.ايماعامبەتوۆكە ىڭعايلى ۋاقىتتا سەربياعا ساپارمەن كەلىپ, قىزىعۋشىلىق تانىتاتىن باعىتتاردا پىكىر الماسۋعا شاقىرىپ, ءتيىستى حاتتى ديپلوماتيالىق ارنالار ارقىلى جاقىن ارادا جولدايتىنىن جەتكىزدى.