جامبىل وبلىسىنىڭ اكىمى بەردىبەك ساپارباەۆ تۇرعىنداردى جەكە سۇراقتارى بويىنشا قابىلدادى. اكىم اۋليەاتالىقتاردىڭ الەۋمەتتىك ماسەلەلەرىنە باسا نازار اۋدارىپ, كوتەرىلگەن ماسەلەلەر ءتيىستى زاڭدارعا سايكەس رەتتەلەتىنىن ايتتى.
قابىلداۋعا 65 ازامات كەلگەن. ولاردىڭ كوتەرگەن ماسەلەلەرى نەگىزىنەن تۇرعىن ءۇي, جەر تەلىمدەرىن بەرۋ, شارۋاشىلىق داۋلاردى شەشۋ جانە باسقا دا اسپەكتىلەرگە قاتىستى بولدى. بەردىبەك ساپارباەۆ تۇرعىن ءۇي ماسەلەسى ءتيىستى زاڭدارمەن رەتتەلەتىنىن ايتىپ, پاتەر ءبولۋ كەزەگىن جىلجىتۋ دا بەلگىلەنگەن ءتارتىپ پەن ەرەجەلەرگە سايكەس قاتاڭ تۇردە جۇزەگە اسىرىلاتىنىن جەتكىزدى.
مەركى اۋدانى, سۇرات اۋىلىنىڭ تۇرعىندارى جەرگىلىكتى شارۋا قوجالىق باسشىلارىنىڭ ءبىرىنىڭ شەكتەن اسقان ءىس-ارەكەتىن اكىمگە جەتكىزبەك بولىپ, شاعىم ايتا كەلگەن ەكەن. اۋىل تۇرعىندارىنىڭ ايتۋىنشا, شارۋاشىلىقتىڭ باسشىسى جەر يەلەرىنە ەسكەرتپەي, ولارعا تيەسىلى جەر تەلىمدەرىن ءوز اتىنا زاڭداستىرىپ العان. بۇل رەتتە بەردىبەك ساپارباەۆ ەگەر زاڭ بۇزۋشىلىق انىقتالسا, بۇل ماسەلەمەن وبلىستىق پروكۋراتۋرا اينالىساتىنىن اتاپ ءوتتى.
سونىمەن قاتار اكىم مەركى اۋدانىنا بارعان ءىسساپارى كەزىندە تۇرعىنداردىڭ وسى شاعىمىنا ەگجەي-تەگجەيلى تالداۋ جاسايتىنىن جەتكىزدى. ال, بەرىك ءۋاليحانوۆ اكىمنەن مەركى اۋدانىندا ورنالاسقان كەنەسارى حان ەسكەرتكىشىنە بايلانىستى تۋىنداعان تۇيتكىلدى ماسەلەنى شەشىپ بەرۋدى سۇرادى. سونىمەن قاتار, ول تاراز قالاسىنداعى مەكتەپتەردىڭ بىرىنە كەنەسارى حاننىڭ ەسىمىن بەرۋ تۋرالى ۇسىنىسىن ايتتى. اكىممەن كەزدەسۋدە ءبىلىم سالاسىنىڭ ارداگەرى كاميليا قوجىقوۆا سالانى دامىتۋ ءۇشىن بولىنەتىن قازىنا قارجىسى ءتيىمدى جۇمسالۋى كەرەك ەكەنىن ايتىپ, ول مۇنداي جاعداي تالاس اۋداندىق ءبىلىم بولىمىندە كورىنىس تاۋىپ وتىرعانىن, قاراجاتتى ماقساتسىز جۇمساۋ ارەكەتتەرى ورىن الىپ وتىرعانىن جەتكىزدى. ءوز كەزەگىندە تاراز قالاسى, «مىڭبۇلاق» شاعىناۋدانى تۇرعىندارىنىڭ تىلەك-ءوتىنىشىن جەتكىزە كەلگەن راحاتگۇل يتقۇلوۆا كوپقاباتتى ۇيلەردىڭ اراسىنا شاعىن بيزنەستىڭ زاڭسىز نىسانى سالىنىپ جاتقان فاكتىسى ورىن العانىن ايتتى. سونىمەن قاتار, ولگا پيمەنوۆا تاراز قالاسىندا بالالارعا ارنالعان ارنايى دەمالىس ورىندارى اشىلسا دەگەن تىلەگىن جەتكىزسە, مۇساتيللا توحانوۆ اكىمنەن مەيىز بەن ورىك ونىمدەرىن دايىنداۋ بويىنشا جوبانى جۇزەگە اسىرۋعا كومەك كورسەتۋىن سۇرادى.
كەزدەسۋدە كوپشىلىك كوتەرگەن ماسەلەلەر بويىنشا ءتيىستى باسشىلار جاۋاپتارىن بەردى. قابىلداۋ بارىسىندا بىرقاتار ماسەلەلەر دە شەشىمىن تاپتى. ال, بەردىبەك ساپارباەۆ كوتەرىلگەن ماسەلەلەر وڭ شەشىمىن تابۋى ءۇشىن جەكە باقىلاۋىنا الاتىنىن جەتكىزدى.
جامبىل وبلىسى