جۋىردا سولتۇستىك قازاقستان وبلىسىنىڭ اكىمى قۇمار اقساقالوۆ اكىمدىكتىڭ وتىرىسىن وتكىزىپ, 2020 جىلدىڭ قاڭتار ايىنىڭ قورىتىندىلارىن جانە الداعى جۇمىستاردىڭ باعدارىن انىقتادى.
ونداعى ماسەلەلەردىڭ بىرىندە وبلىستىڭ ينفراقۇرىلىمىن دامىتۋدىڭ 3 جىلدىق جوسپارى جاسالاتىنى بەلگىلى بولدى. اۋىلداردىڭ ماسەلەسى بويىنشا ايتقاندا قۇمار اقساقالوۆ: «بولاشاعى بار اۋىلداردى دامىتۋ كەرەك. جوسپار بولۋى ءتيىس. كەزەك بويىنشا جولدار جوندەلىپ, سۋ تارتىلۋى قاجەت. ءبىز تۇرعىندارى كوپ اۋىلدارعا قارجى قۇيامىز», - دەدى.
حوش... ءبىز قازىر حالىقتىڭ مۇڭ-مۇقتاجىنا قۇلاق اساتىن مەملەكەت قۇرامىز دەپ وتىرمىز. پرەزيدەنت ق.توقاەۆ ءوزىنىڭ العاشقى جولداۋىندا وسىنى ايتتى. الايدا ءبىزدىڭ جەرگىلىكتى بيلىك حالىقتىڭ ءۇنىن ەستىگىسى كەلمەيتىن سياقتى.
ءبىز جۋىردا عانا «ەگەمەنگە» ماقالا جازىپ, دۇرىسىندا اۋىل ۇلكەن بولمايتىنىن, تۇرعىندارى از دەپ ولاردى قۇرتاتىن بولساق, جەرىمىز جالاڭاشتانىپ قالاتىنىن شامامىز كەلگەنشە دالەلدەپ جازعان بولاتىنبىز. قازىر ءتىپتى 30-50 ءۇيلى اۋىلدار (مىسال رەتىندە «دايىندىق», «نوعايباي» اۋىلدارىن ايتقانبىز) ۇلكەن شارۋانى دوڭگەلەتىپ, استىق تا, مال دا ءوسىرىپ وتىرعانىن ايتقانبىز. «بولاشاعى جوق» دەگەن تۇجىرىمنىڭ ءوزى ءۇستىرت جاسالعانىن, شاعىن اۋىلداردى قۇرتپاي, كەرىسىنشە, ولارعا جول تارتۋ قاجەتتىلىگىن, قازاق اۋىلدارى تابيعي جولمەن دامىعاندا ەشقاشان ۇلكەن بولماعانىن جەتكىزگەن ەدىك... دامىعان شەت ەلدەردە دە ونداي وڭ تاجىريبە بارىن ايتىپ, مىسالعا مالايزيانى اۋىزعا العانبىز. وسى ماقالانى كوپتەگەن ادام قولداپ, فەيسبۋكتە ءوز پىكىرلەرىن قوستى.
اۋىلدىق ەلدى مەكەندەردى داليتىپ, تىم ۇلكەيتۋدىڭ ءوزى كەڭەستىك كەڭكەلەستىك ساياساتتىڭ سالدارىنان بولعانىن دا ايتىپ, كەلىمسەكتەردى قاپتاتىپ توككەن ونداي اۋىلدار شىنىندا دا ءتيىمسىز بولىپ, قازىر تاراپ جاتقانىن جازدىق. «تابيعي جولمەن دامۋدى ەسكەرسەك, اۋىل ەشقاشان ۇلكەن بولمايدى, شاعىن اۋىل ادامعا دا, شارۋاعا دا ىڭعايلى. ال بالاسىن اۋدان ورتالىعىنان نەمەسە قالادان وقىتۋ, اۋرۋحاناعا جەتۋ, ۇلكەن ساۋدا ورتالىقتارىنا بارۋ, ءوز ونىمدەرىن وتكىزۋ ت.ت. ءۇشىن اۋىلدىقتارعا تەك جول كەرەك. اسىرەسە, قازىرگى, ءار اۋلادا ءبىر-ءبىر ماشينادان دۇرىلدەپ تۇرعان زاماندا جولدان باسقا ەشتەڭە كەرەك ەمەس» دەپ قورىتقان ەدىك.
وسىنىڭ ۇستىنە سولتۇستىك قازاقستان سياقتى شەكارالىق وبلىستىڭ جەرىندەگى شاعىن اۋىلداردى «بولاشاعى جوق» دەگەن سىلتاۋمەن قۇرتاتىن بولساق, جەر بوس قالادى. مۇنىڭ ءوزى ەلدىڭ قاۋىپسىزدىگىن ساقتاۋعا دا كەرى اسەرىن تيگىزەدى. ەجەلدەن «بوس جەر جاۋ شاقىرادى» دەگەن ءتامسىل بار. ونى دا ەسكەرۋ كەرەك.
الايدا ءبىزدىڭ ءسوزىمىزدى ەلەيتىن بيلىك جوق. وبلىس اكىمى ق.اقساقالوۆتىڭ ءسوزى سول باياعى: ء«بىز تۇرعىنى كوپ اۋىلدارعا قارجى قۇيامىز» بولىپ وتىر. قازىر تۇرعىندارى كوپ اۋىلدى قايدان تاباسىڭ. بارلىق مەكەندەر دە تۇرعىندارىنان ەسەلەپ ايىرىلىپ قالعان. حالىقتىڭ مۇڭ-مۇقتاجىن ەستيتىن ۇكىمەت بولسا تىم بولماسا ايتىلعان ماسەلەلەرگە كوڭىل اۋدارار ەدى. الايدا بىزدە ەستيتىن بيلىك جوق پا دەپ ويلايمىز. مۇنداي ىستەردى كەرىسىنشە, ەشتەڭەنى ەستىمەيتىن كەرەڭ مەملەكەتتىڭ قىلىعى ما دەپ قالاسىڭ...
سولتۇستىك قازاقستان وبلىسى