قاراعاندى وبلىسىنىڭ اكىمى جەڭىس قاسىمبەك حالىققا ەسەپ بەرۋ جيىنىندا حالىقتىڭ ءومىر ءسۇرۋ ساپاسىن جاقسارتۋعا باعىتتالاتىن ءبىرىنشى كەزەكتەگى جۇمىس ستراتەگياسىن ءمالىم ەتتى.
– قولجەتىمدى, ساپالى ۇيلەر مەن جولدار سالۋ, تۇرعىنداردى تۇراقتى جۇمىسپەن جانە ەڭبەكاقىمەن قامتاماسىز ەتۋ, وڭىردەگى ەكولوگيالىق ماسەلەلەردى شەشۋ – باسىم باعىتتاعى مىندەتتەر, – دەپ اتاپ ءوتتى ول.
وبلىس باسشىسى وڭىردە جولدار مەن ۇيلەردىڭ قۇرىلىسى بويىنشا ارنايى جول كارتاسى ازىرلەنگەنىن حابارلادى. ياعني, بۇل سالالارداعى جۇمىس قارقىنىن ەسەلەپ ارتتىرۋ جوسپاردا بار.
جەرگىلىكتى بيلىك وبلىستاعى 1800 كوپ بالالى وتباسىن الداعى ەكى جىلدىڭ ىشىندە تۇگەلدەي باساپانمەن قامتاماسىز ەتۋدى ماقسات ەتىپ قويعان.
– مەملەكەت باسشىسى تۇرعىن ۇيمەن قامتاماسىز ەتۋ – بۇل الەۋمەتتىك ساياساتتىڭ باسىم باعىتى ەكەنىن ايتتى. ءبىزدىڭ تاراپىمىزدان وسى جىلى تۇرعىن ءۇي قۇرىلىسىن وبلىس بويىنشا كەمىندە ءبىر جارىم ەسە جانە وبلىس ورتالىعىندا ەكى ەسە ۇلعايتۋ ءۇشىن بارلىق مۇمكىندىكتەر جاسالۋدا. بىزدە ەكى جىل ىشىندە 1800 كوپبالالى وتباسىن قامتاماسىز ەتۋگە تولىق مۇمكىندىك بار دەپ ەسەپتەيمىن, دەدى جەڭىس قاسىمبەك.
سونىمەن قاتار وبلىس اكىمى ەلباسىنىڭ 2030 جىلعا قاراي ءبىر ادامدى تۇرعىن ۇيمەن قامتاماسىز ەتۋدى 30 شارشى مەترگە دەيىن جەتكىزۋدى تۋرالى تاپسىرما بەرگەنىن ەسكە سالدى. ال بۇگىنگى كۇندە وڭىردەگى بۇل كورسەتكىش 23 شارشى مەتردەن اساتىن كورىنەدى.
وتكەن جىلدى ەسكە الساق, وڭىردە 421 مىڭ شارشى مەتر تۇرعىن ءۇي سالىنىپ, 1148 وتباسى باسپانالى بولدى. ونىڭ ىشىندە «باقىتتى وتباسى» باعدارلاماسى بويىنشا 226 وتباسى قونىس تويىن تويلادى.
ال بيىل 5 600 وتباسى پاتەرگە يە بولۋى ءۇشىن 600 مىڭ شارشى مەتردەن استام تۇرعىن ءۇي تاپسىرىلۋى ءتيىس. بۇل پاتەرلەردىڭ جارتىسى الەۋمەتتىك قورعالاتىن ساناتتارعا ارنالعان. بۇدان بولەك, جەتىم بالالار ءۇشىن باسپانا كەزەگىنىڭ جىلجۋىن جەدەلدەتۋ جوسپاردا بار.
ەسەپ بەرۋ جيىنىندا جەڭىس قاسىمبەك بۇل قۇرىلىستاردىڭ ساپاسىن باقىلاۋدىڭ كۇشەيتىلەتىنىنە ەرەكشە ءمان بەرىلەتىنىن اتاپ ءوتتى.
قاراعاندى وبلىسى